真人真事改篇﹕師生戀﹕《最接近的陌生距離》: 第九章之七

果然，往後三堂「人渣添」都係冇返嚟課室。哈⋯⋯哈⋯⋯佢應該被周Sir開發緊用嚟痾屎嘅器官
 
不過喺最後嘅班主任課，我就有唔好嘅感覺。自從同Miss關係進步咗之後，佢一入課室會望我一眼，佢心情靚嘅仲會對住我點頭。但頭先佢一入嚟個氣場好唔同，直頭當我冇到咁店行店過。唉，我都知咩事。佢一定嬲我同人打交。所以成堂班主任堂我都度緊點同Miss解釋。
 
鈴——！放學鐘聲響起。我等啲同學走晒時，慢慢走去Miss度。
 
「Miss， 今日⋯⋯我想留堂。」
 
Miss繼續做埋啲文件，眼尾都冇望我一眼。唉⋯⋯成個氣場同今朝好唔同。佢真係好嬲。
 




「Miss? 我想留堂。我做錯咗事。」
 
啪——佢稍為用力放低咗枝紅筆，吸咗一口氣。表情相當複雜。然後向我望嚟，話：「你犯咩事要留堂？」
 
我聽得出佢夾硬冷靜緊。
 
「打交⋯⋯我同阿添今日Lunch打交。對唔住。」
 
「對唔住？」Miss企起身，表情漸露不悅：「對唔住有用咩？你都打咗人啦！」
 




「我衰衝動。我記得你教過我唔可以衝動。但今日⋯⋯我忍唔住，我係有苦衷。」正當我想同佢講我忍受唔到佢比人羞辱時，Miss用一把好惡嘅聲截停咗我。
 
「謝子匡！你誠實啲答我！點解你兩個打交，最後得你一個冇事！」佢指住我嚟嬲，佢隻手指呢刻好似把劍咁利：「點解阿添而家仲比人罰緊！你做咗啲咩！！」
 
我比佢嚇親，原來佢唔係嬲我打交⋯⋯死啦，點解釋好呢？一時間我被佢問到口啞啞。
 
「⋯⋯係黎Sir話放過我。佢知我⋯⋯打交⋯⋯因為幫你追阿添功課。」
 
「黎Sir放得你，都會放埋阿添。我唔要聽呢啲解釋！」
 




「我⋯⋯我⋯⋯」唉！佢咁問得，其實佢知我做咗啲咩⋯⋯死就死啦！「周Sir⋯⋯」
 
「咩話？！」Miss好嬲又好大聲咁講。
 
我深吸咗一口氣講：「我同周Sir講，阿添唔交功課仲要四圍唱衰你。」
 
Miss聽完之後抖咗一下大氣，就搖晒頭，佢壓一壓把聲話：「點解你要咁做？」
 
「阿添太過份！佢要受下教訓！」
 
「我係指點解你會搵周Sir? 」Miss翹埋雙手，不滿咁講：「點解你唔搵我？關周Sir咩事呀？！」
 
我又被佢問到啞晒。如果我話Miss佢鎮唔住「人渣添」咁即係眨低佢唧？不過好快Miss幫我答咗個答案。
 
「因為你知道周Sir罰學生罰得特別重！」Miss好惡咁鬧我：「特別如果係關我事嘅，周Sir就一定會攬晒上身，佢唔會放過個學生！」




 
「咁⋯⋯阿添佢咁對你⋯⋯佢真係好過份呀！我睇唔過眼呀！」我對Miss唔領我情開始有啲嬲：「今朝早上堂佢公然挑戰你！我好憎佢咁做⋯⋯佢⋯⋯佢仲四圍唱衰你⋯⋯我⋯⋯我⋯⋯」
 
有句說話我想衝口而出，理性講我知接著呢句一講咗出口，我就正式越界，我就唔可以再做Miss隻兵。
 
但連日嚟同佢相處，令我已經唔滿足於做佢隻兵。我想貪心啲，我想再多啲⋯⋯我想⋯⋯
 
「我唔鍾意你比人蝦呀！」
 
我終於講咗出口。雖然唔係「鍾意你」，但已經足夠呢令段師生關係發生改變。

= = = = =

ig: ar_hong_91





#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學