真人真事改篇﹕師生戀﹕《最接近的陌生距離》: 第九章之六

我呢個「臭格」常客睇嚟都改變唔到經常落訓導處嘅命運。唉⋯⋯呢次真係大鑊，幫Miss追功課但最終變咗打交。份口供紙真係唔知要點寫好。打交一定會惹到麻煩比Miss啦！

心係煩，又好擔憂。但更令我吞唔落呢啖氣嘅就係「人渣添」隨便咁唱衰Miss。 一定要諗方法阻止佢！但邊個可以做到呢？

「⋯⋯打交係一個唔要得嘅行為。如果喺街，你比人打。你打返人。咁就變公眾場所毆鬥，係刑事嚟架⋯⋯」

眼前嘅黎Sir同我講經講咗成堂，不斷loop緊點解打交唔啱⋯⋯睇佢咁戇鳩，應該都鎮唔住「人渣添」。

鈴⋯⋯轉堂鐘響起。黎Sir就話：「見你有苦衷先會郁手，我比多次機會你。下次就記缺點架啦。」



「多謝黎Sir。」

「咁便宜佢呀黎Sir?」喺我要走嗰時，有把令我討厭嘅男人聲喺門外傳入嚟。唉⋯⋯撞鬼，周Sir。

「打交最少一個小過啦。」周Sir喺門邊挨住，翹埋雙手。

周Sir對我微笑，係笑裡藏刀嗰種。上次我唔肯屈Matthew師兄，佢一定諗緊計點樣可以濕我一鑊。唉⋯⋯今次打交實走唔甩。

「周Sir，今次謝同學佢有苦衷。其實唔一定要罰嘅，關心佢仲有用啦。」



周Sir扮到好似發現新大陸咁，扮到好驚訝，仲長長咁「哦？」咗聲。

「咁係咩苦衷呀？」周Sir

點可能同佢講我因為幫Miss追功課搞到打交⋯⋯？咦？！係喎！

「『人渣添』囉。Miss Wong叫佢交功課又唔交。咁我係班長嘛，睇唔過眼未幫Miss手追功課囉！」

講完，我好想笑出聲。「人渣添」我就睇你點應付周Sir!



「追功課追到同人打交？我唔係好信喎。」周Sir一聽到關Miss事，態度明顯冇咁惡，似乎想同我合作。

敵人個敵人就係朋友，我同周Sir都鍾意Miss，咁就自然視蝦Miss嘅「人渣添」為敵人。點睇呢次魔鬼交易合作得過。

「我同『人渣添』有一啲私人恩怨咁啦。係！係我衰！」周Sir咁自我膨脹，一定好鍾意學生喺佢面前踩低自己：「係我賤！係我唔啱。衰衝動同佢打交。周Sir 對唔住！」

的確『人渣添』羞辱Miss就係私人恩怨。但我特別唔講咁清楚。用「私人恩怨」含糊過去。重點比周sir覺得我認咗衰仔就得。果然佢冇追問係咩私人恩怨，只係點頭。我繼續講：「佢把口好臭架。佢近排唔知搞咩，成日同Miss Wong搞對抗。Miss都冇佢符呀。而且⋯⋯」

「而且啲咩？」周Sir聽到Miss被人蝦，面色都變晒。

「我仲聽到佢喺唔同同學面前講Miss壞話。詳細可以問返3A班人，『人渣添』講到好⋯⋯⋯好⋯⋯唉！」

說話要有啲技巧嘅，我特登喺重點位度停一停，吊一吊條狗公癮。

「佢講得好難聽？」佢好冷靜但其實好緊張。



「幾難聽唔重要啦！最重要佢變相煽動其他同學唔聽Miss Wong 話！」我講得咬牙切齒。本來我想講埋「人渣添」唱佢同Miss分手、搞婚外情啲嘢，但咁樣好易辣中埋杰少，所以都係見好就收。

周Sir而家成個黑面神咁唔出聲。我加多兩錢重，話：「周Sir, 以前我好衰。唔聽教。但我改緊架啦。我地成班都知Miss辛苦，所以我地知要查簿就清晒啲功課架啦。係得『人渣添』死都唔交咋，擺明恰Miss新嚟咩都唔識啦！」

我挨近少少，壓低把聲咁講：「周Sir，你知查簿好緊要架嘛。Miss又新入職⋯⋯」

「得！」周sir斬釘截鐵講：「唔洗再講。你而家返上去課室上堂。」

「多謝周Sir! 」

喺我離開時，我不禁笑咗出聲。「人渣添」我睇你點死！

= = = = 



ig: ar_hong_91


#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學