真人真事改篇﹕師生戀﹕《最接近的陌生距離》: 第九章之五

Miss同周Sir啲嘢唔知傳到咩程度，搞到我好擔心。如果揚晒，加上佢同Matthew師兄嘅緋聞，我想像唔到會對佢嘅事業打擊有幾大。萬一⋯⋯查簿嗰度出埋事，咁Miss實比人炒都似！

唔得！ 一定要幫Miss追「人渣添」啲功課！

午息我飯都唔食，就去六樓男廁。嗰度係「人渣添」散裝煙嘅交易現場。當我一入到去，就一片煙霧彌漫。「人渣添」同幾位中五師兄剛剛做完交易，即場就整返飛。

「喂？匡哥？」「人渣添」張起好虛假嘅笑：「咁啱嘅！呢飛請你食啦！」

「唔食啦戒咗啦。我嚟講正經嘢架。」我：「阿添，呢兩星期嘅功課，幫手清清佢啦！」





「人渣添」對我冷笑一聲，剛好啲師兄食完煙準備走。「人渣添」寧願同佢地吹多兩句水都費事彩我。態度極度囂張。

「今個星期校長查簿呀。」

佢喺我身邊店行店過，去到洗手盆前。

「全班就爭你就齊章架啦！」

佢濕一濕隻手，整下啲頭髮。





「幫幫手啦，阿添。」

「嘿⋯⋯⋯」佢鏡中嘅倒影望住我笑，然後擰轉身對住我吞雲吐霧，話：「我冇聽錯啊嘛？你真係會幫老師手？」

「中四啦，我想大個仔嘛。」我求其作個藉口：「新學年，新開始咁囉。」

「唉⋯⋯阿匡。老實講你真係好令我失望。」佢用夾住煙嘅手指住我，語帶輕蔑咁講：「枉我以前真心睇得起你。竟然好幫唔幫，幫嗰個女人。」

喺學校賣散裝煙，同埋其他滑頭嘢都係我教佢。難怪佢之前會服我，可以同我fd到。冇諗過佢而家比我玩得更純熟，慢慢唔將學校放喺眼內。





「諗在有份交情，幫個手啦。」

「哈哈哈⋯⋯」佢一聲嘲笑就將煙頭彈走，然後施施然咁離開。

我尾隨佢，又求又盛，開埋啲甜頭比佢，面都比埋佢⋯⋯佢就係當我冇到！最後我同佢去到中三班房。

「B仔！」佢同其一個肥仔交頭接耳，喺衣袋拎支煙出嚟，一手收錢一手交貨。

然後「人渣添」走去班房一角，同三個圍埋做緊功課嘅男仔吹水。

「阿添，考慮成點呀？你求其撩啲嘢當交咗佢啦！」我開始唔耐煩。

「人渣添」當我冇到繼續同人傾計，但明顯佢係講說話比我聽。

「咦？你地又清功課呀？中文科⋯⋯哈哈，MissWong嗰科喎！」





「係呀！添哥，搏緊命架。咪阻住啦！」

「超！驚閪咩！冇人會罰你地架！」

呢一句，令我心底開始燒啲怒火出嚟。

「添！」我叫停佢，我知佢想揚Miss 啲嘢出嚟！

「嗰個女人得個樣架咋！剩係識留堂！佢惡咩？係佢條仔惡之嘛！」

「添！屌你咪再亂講呀！」我開始壓唔住憤怒！

「Sor!係佢以前條仔惡！佢同周Sir散咗啦！呢個女人一直狐假虎威！都唔明你地驚乜！」「人渣添」講完就一面囂張望住我，擺明就同我講：「我偏要講呀！」





呢一刻我已經緊握拳頭！ 旁邊做緊功課嘅同學都放晒手腳，好好享受呢粒花生！佢再亂傳落去，咁Miss就⋯⋯？！

「哈哈⋯⋯提起狐狸呀？你地知唔知周Sir其實係有老婆架？Miss Wong 搞人老公，其身不正，隻狐狸精邊有資格教我地呀？係咪先？做條柒功課咩！」

「咪再亂講呀！」

我大吼一聲，我就上前同佢扭作一團。混亂之下我聽到身邊人係咁叫囂同吶喊助威！我食咗佢幾腳，我又請佢食幾下「兜鎚窩面」。一陣劇痛喺身體各處漫延之時，我先清醒過嚟，發現自己同「人渣添」已經打到出走廊。

「嚟呀！屌你老母！一陣我班馬打撚死你呀！」「人渣添」比中三嘅師弟拉住。

「亂鳩咁噏！打爆你棚牙呀！」我又被人拉住。

「我跟老尖金毛達嘅！你因撚住嚟呀！」

「好撚驚呀黑社會！今日接我放學呀笨！」





喺盛怒之下其實冇咩人可以撳得住我地。而且我腦入面不斷回憶住「人渣添」羞辱Miss嘅說話，令我唔理佢跟邊範！總之我要好好教訓呢條人渣！

最終我同佢掙開所以束縛，準備嚟場Round two! 點知一個高大身影介入咗，一手撳住咗我。「人渣添」亦被其他同學拉住咗！

「同學，做咩事打交？知唔知打交係唔啱架？」

講嘢咁長氣，一聽就知係黎Sir。

我抬一抬頭望佢，平時佢副眼鏡令佢戇值爆燈。但係唔知點解喺呢一刻，鏡片下嘅眼神卻出奇地鋒利起嚟。

= = = = 

ig: ar_hong_91





#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學