真人真事改篇﹕師生戀﹕《最接近的陌生距離》: 第九章之四

「咦？！似係喎！」頂！阿偉又用一個看透世事嘅樣望住我，仲奸笑緊！

一時間我被佢地兩個殺一個措手不及！要快啲搵個說法先，如果唔係會穿煲！

「傻架你！我點會鍾意Miss Wong呀！我係學生，佢係老師喎！點會有呢啲非份之想呀！」

「咪住先！」阿偉又打斷我：「杰哥都冇話係『嗰隻』鍾意！『愛』有好多種嘛！包括『敬愛』！學生敬愛老師好正常咋喎！」

「係囉！」杰少：「你諗咗去⋯⋯哦！！」杰少指住我！





「哦——！」阿偉又指住我！

「呢鑊你仲唔冚家產？」佢地兩個嘲笑我：「掩口費！掩口費！」

剎那間，我同杰少之間嘅劍拔弩張嘅氣氛消失咗。因為⋯⋯更大粒花生出現咗！仆街，呢次鬼拍後尾枕添！

「你兩個痴線架咩！我都未講完！」我開始失措！

「咁比你講埋落去啦！」阿偉成個劉華嗰個「繼續吹」咁嘅樣。





「Miss⋯⋯⋯Miss Wong 佢⋯⋯」我不斷回憶Miss嘅好，呢個時候我先認真了解自己個心原來對佢除咗係愛慕之餘，仲有感激：「Miss佢真係錫我呀！嗱！上次打波整親，佢幫我包扎嘅！」我舉出仲有少少疤痕嘅傷口。

佢地露出一個狐狸笑。

我強作鎮定咁講：「我冇返學跟唔到進度。佢會幫我追返喎！」老虎蟹都唔講係Miss寫筆記比我啦！

杰少個樣開始覺得理解，但阿偉仍然做出狐狸式奸笑。

「唉！唔講都講埋！」我惟有出大絕啦！我話：「我又逃學又喺學校吸煙，我差少少就比人踢出校架啦！係Miss同我向副校求情我先冇事咋！」然後我瞪住杰少咁講：「我幫我救命恩人，天經地義啦！」





我再同阿偉講：「我地做兄弟咁耐。你地知我有義氣架！人地對我好！我一定對返佢好！」我再望住杰少講：「杰少你第一套AV係邊個借比你睇架？係我呀！你個仆街仔，你對住我家姐啲bra嚟打飛機我都仲當你係兄弟冇報串架！你咁樣唱Miss我睇唔過眼囉！唔好再傳啦！好唔好呀！」

講完之後我地三個唔出聲咁互望。幾秒後，阿偉就話：「咁都好公道呀。杰少點睇呀。」

「咁匡哥你對Miss有好感都好正常嘅！」杰少。

「係尊敬Miss！」

阿偉忽然喺我旁邊「噗哧！」一聲忍唔住笑出嚟！

「咁Miss又真係錫我地嘅！」杰少：「特別我地四個，佢真係對我地好好嘅。」

「咪係囉！你仲四圍揚佢啲嘢Miss會好慘架！冇雷氣！」我：「啲同事又對佢差、又多嘢忙、我地又唔聽話⋯⋯」

講講下我好似冇法自控咁講晒Miss嘅煩惱出嚟。





「得啦得啦！」阿偉拍一拍我膊頭，然後佢就同杰少講：「咁杰少以後唔好再派花生啦。得唔得？」

「偉哥同匡哥叫到，實得架！」

「屌你就咁話啦！嗱！兩兄弟揸個手先啦！」阿偉捉住我同杰少隻手，握住咗。阿偉：「兩位大佬條氣順啲未呀？咪係囉！兩兄弟嘛！嗌交都戇鳩鳩！」

「得啦得啦！我去打波先。你兩個跟唔跟呀！」杰少轉住個籃球講。

「你落去打先啦。轉頭嚟！」阿偉。

杰少點下頭當係講咗個拜拜就走咗，得返我同阿偉留低。

「得啦。實撐你。」阿偉本來嘻皮笑臉緊，然後好認真咁講：「要幫手開句聲啦。兩兄弟嘛！」





阿偉依然露出狐狸式嘅奸笑，佢冇講啲咩，只係拍拍我膊頭⋯⋯仆街啦，佢唔係知道咗我鍾意Miss下話？

= = = = 

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學