真人真事改篇﹕師生戀﹕《最接近的陌生距離》: 第九章之三

中文堂，剛剛三秒前就打咗小息鐘。

「⋯⋯最後一件事，校長喺呢個星期五會查簿。我知道同學都好努力清返之前未做嘅功課。Miss好欣賞你地，亦都多謝大家！。」Miss下意識咁望咗我一眼。我浮誇咁做咗個敬禮動作。然後同阿偉、杰少做咗個「兄弟在心中」嘅打心口動作。

「謝子匡！玩夠未？」Miss唔耐煩咁叫停我。

「Sorry Miss。」

Miss繼續講：「但係仲有一位同學係未交功課嘅。聽到名你企起身。利添豪！」





班入面冇人應佢。

「利添豪！」Miss叫得再大聲啲後，課室後有一把打喊露嘅聲傳上嚟。

「啊⋯⋯⋯⋯⋯」把聲仲好造作，擺明車馬要同Miss對著幹！

我望過去課室最尾嗰邊，「人渣添」而家先慢慢咁企起身。

繼我之後，「人渣添」係第二位壞學生。喺老師眼中佢同我乞人憎程度係不相伯仲。但喺同學眼中，我同「人渣添」根本唔可以擺埋一齊比。我份人只係反叛、憎老師，但對朋友算有義氣，你估「匡哥」呢個朵流架咩。但「人渣添」份人串，鍾意同同學嘈又成日吹噓自己喺外面跟大佬搵食、啅咗幾多條女⋯⋯總之佢好撚黑人憎啦！





「功課呢。」Miss面無表情但語氣重咗。

「冇喎。」「人渣添」一面乞人憎嘅嘲笑：「好似唔見咗。」

「唔見咗就抄返晒比我。聽日收唔齊你啲功課，我叫你家長上嚟陪你一齊做！」Miss都費事同佢糾纏，斬釘截鐵咁講。

「好呀。得閒先。」「人渣添」好似感覺到Miss奈佢唔何，佢嘅笑容更囂張。

「Goodbye Class。」Miss氣勢好似比佢壓低咗！佢望望錶應該要忙下一堂嘅嘢，只好無奈講再見。





「Goodbye and Thank you Miss Wong。」

我邊講再見，一邊望住「人渣添」，「人渣添」串到冇講再見亦冇鞠躬！當Miss走咗之後，同「人渣添」幾位比較熟嘅同學就走埋去話：「添爺，周Sir條女都夠膽串。你想死呀？」

「女乜鳩！散咗啦！」「人渣添」大爺咁將對腳晾喺枱上面。

「邊度聽返嚟架？」

「杰少囉！」然後佢對住杰少大叫：「杰少，啲料堅唔堅架？Miss同周Sir散咗啲嘢呀。」

「杰少出品，梗係堅啦！」杰少。

「嗱！」「人渣添」自豪咁講：「個女人冇咗靠山唔洗驚佢啦！冇料到先靠關係之嘛！」

聽到呢度我差啲要爆粗屌佢。但⋯⋯日最撚衰都係杰少！





「喂杰少！」我等杰少趕去打波時，喺走廊截住佢。

「點呀匡哥！」杰少唔知我有啲躁，仲對住我笑。

「Miss同隻狗公啲嘢我地四個知就算啦！你仲周圍唱！」我大大力篤住佢心口講。

杰少冇意料到我突然發惡，嚇呆咗一秒，然後話：「咩呀！花生不嬲都係咁派架啦！」

「點講都係Miss私事啦！咁樣唱法佢仲點喺度教書呀！」我惡起上嚟，鬧埋我最擔心嘅嘢出嚟！

「屌你呀！你洗唔洗咁撚惡呀謝子匡！」杰少開始對我發脾氣：「你自己都有份食花生架！扮撚晒野！」

仆街仔！佢未試過對我咁撚惡，我瞪起眼準備濕佢一鑊。阿偉見況就攝咗入嚟，話：「喂！兩位大佬咩事！」





雖然佢地成日匡哥前匡哥後咁叫我，但真正大佬始終都係阿偉。顧念呢份兄弟情之下，我同杰少收收火。

「有唔妥等細佬幫你地拆店佢啦。」阿偉：「相嗌唔好口嘛！」

「冇，我唔想杰少再傳Miss啲嘢比其他同學知唧。我地四個知道就算啦。咁樣Miss會好慘架。」

「公道呀！」阿偉點頭：「杰哥你又點睇呀？」

「花生唔派咁食嚟做咩呀！都唔知阿匡搞乜！」杰少氣沖沖咁望返我：「留意咗你好耐啦！關於Miss Wong啲嘢就上晒身！幫人追功課！搏咩呀！你鍾意咗人呀！？」

啊——！你⋯⋯你個仆街仔呀！！我冇諗過咁樣比佢突擊添！

死！難道無意中穿咗煲？呢鋪我點拆好呀？！

= = = = 

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學