真人真事改篇﹕師生戀﹕《最接近的陌生距離》: 第九章之二

出完一招「順手牽羊」之後，跟手使出一招「借花獻佛」，將黎Sir同「中毒陳」送比Miss嘅禮物分別用嚟賄賂阿偉同埋杰少！

我曾經係4A班大佬，以前我一吹雞，各方兄弟必定冇托手踭。當我收咗皮之後，課室嘅控制權就落入頭先一齊揸緊水嘅發仔同我兩位兄弟。其實只要比啲甜頭佢地三個，我再用加埋自己嘅影響力，幫Miss追功課真係話都冇咁易！

= = = =

兩日後早上，正式上堂前嘅4A班課室，我同Miss。

「冇可能架！」Miss改改下簿，佢終於按奈唔住講。





佢平時咁嚴肅咁認真，真係好少見到佢而家咁嘅樣。不過講起上嚟，我留意到Miss當同我獨處時真係愈嚟愈似朋友。

「咩呀？」我溫緊書，強行壓住飄飄然嘅感覺。因為我知Miss想講——

「你真係勸得到佢地交齊啲欠交功課架喎！」

「嗯！」我神氣咁擦擦鼻頭：「都話咗，信匡哥！一定得！See?」

Miss見我咁招積，一面好嬲又好笑，然後話：「你咪咁得戚呀！你開學欠落嗰啲都未清架！好彩校長今次只係睇呢兩星期嘅簿咋，算你好彩！如果唔係我一定追死你！」





「得啦！唔走你數呀。你比時間我慢慢清啦！」

Miss輕輕哼咗聲，又話：「不過你係用咗咩方法架？點解會勸到佢地嘅？」唔知點解，我聽語氣感覺到Miss有少少欣賞我。

啲黑暗兵法唔講啦，我只係講：「關係好嘛，佢地都睇我頭嘅。」的確冇咁好嘅兄弟情，幾多黑暗兵法都勸唔郁啦！

「哦——？睇嚟我初初對呢班嘅group dynamics 分析係冇錯嘅！」Miss有一種自豪。

「你講咩話？」





Miss笑一笑當係回應我。佢呢下笑好似笑緊我太細個唔明佢噏乜咁。此時，佢轉緊枝紅筆，然後若有所思咁。幾秒後佢面露不安咁話：「班長，其實近排我都發生咗好多怪事。」

「咩怪事呀？」

佢鬼祟咁望出去課堂，確定冇人先細細聲講：「黎Sir同陳Sir同我講啲嘢好怪囉！」

一提呢兩個柒頭，我差啲忍唔住要笑出嚟。我咳左下聲，頂一頂個笑意，扮好自然咁講：「佢地不嬲怪架啦。」

「唔係呀。」Miss索性走去我旁邊坐低細聲講：「黎Sir最近成日問我啲咖啡好唔好飲呀！但係我都冇飲咖啡？！」

我一笑就穿煲，嗱嗱聲講第二樣嘢，話：「係咪問你醫療室嗰次呀？」

「嗰次我婉拒咗啦！」Miss諗一諗就話：「仲有陳Sir呢兩日問我考慮成點。我都唔知要考慮啲咩！」

「嘩哈哈哈⋯⋯⋯！！」知道內情嘅我，一見到Miss而家呢個樣，我真係忍唔到笑！





「謝子匡！係咪想記缺點呀！」Miss被我戲弄同嘲笑即刻板起口面嚟，話：「你仲笑架喎？！」

「嗰兩隻狗公明顯想追你啦！」我笑到個膶都痛埋。

「嘖！」Miss煩厭咁叫咗聲，就兩手托頭就唉咗聲：「每日咁多嘢煩！幾時先煩完呀！」

我打趣咁講：「有人追⋯⋯唔好咩？」實際想試下chok Miss會唔講多啲關於佢嘅嘢比我知。

「唔好！」Miss好惡咁睥返我：「呢啲嘢衰過一次仲唔夠咩！」

Miss講完都嚇一嚇，佢先意會到自己呢句衝口而出咗，呆晒咁望住我。我其實知佢講緊咩事，九成因為周Sir，或者係Matthew。

佢嘅大眼，喺慌張之下有一種有一種不可抗拒嘅魅力。漆黑嘅瞳孔好似黑洞咁將我吸住，一時之間我反應唔切，只係「嗯」咗一聲，加個傻仔式點頭。點咗一下，又一下。





Miss一面不解咁側一側個頭，微笑。我理解唔到呢下笑代表緊啲咩。佢想緩和尷尬嘅氣氛？只知道我目光離唔開Miss雙眼，我被佢可人美貌吸引，內心仲有一份衝動即將要衝口而出！

「Miss! 我⋯⋯」當我想講出「鍾意你」——

我唔知係Miss感覺到有唔妥，定係其他原因，佢好快截住咗我。佢話：「你可唔可以再幫多我一次呀？」

聽完之後，我思緒仲喺感性當中，仲喺猶豫緊好唔好同佢表白。一時間轉唔返去理性層面，遲疑咗幾秒。

「班長？」

「係⋯⋯係⋯⋯想我點幫你？」

Miss話自從佢身兼課外活動老師後，一切嘅班級活動、班級比賽都陸逐殺緊埋身。而下個月又會開始中文週活動，佢都快變人乾，搞到平時好有女王氣勢嘅佢都明顯疲累咗好多。

「咁多活動，我搞唔掂喎盈姐！」係，近排我都大膽咗，直接叫Miss嘅名，加個「姐」字以示尊重。當然，我特登咁叫佢係想令自己喺表白嘅衝動下慢慢冷靜返嚟⋯⋯唉，一個Matthew師兄仲唔夠佢煩咩？仲要加多個？





Miss好唔鍾意我叫佢「盈姐」，佢覺得好冇大冇細。Miss瞪我一眼，然後又話：「唔係所有活動。幫我勸佢地幫手整好班壁報就得啦！」

「得啦得啦！總之有盈姐你搞嘅活動，班長仔隨時候命啦！」我又叫佢做「盈姐」，搞到Miss真係好惡咁「喂！」咗我一聲。我傻笑咗一下，又講：「不過又咁講，咁多活動唔會係得你一個搞掛？其他老師呢？」

Miss面色一沈，一面難言之隱，就話：「你專心幫我搞好壁報呢件事就得架啦！」

Miss講到咁，我都冇追問。但我都估到十成係佢人緣太差，搞到冇老師肯幫佢。剎那間喺呢個時空，我感覺到自己可能係Miss喺工作上惟一嘅朋友。唉，到底佢要幾無助先令到佢要同學生講自己工作嘅煩惱呢？

「咁得啦！包喺我身上！」

Miss嗯咗一聲，就繼續返埋位改簿。佢嘴角上揚，展露出我最鍾意嘅微笑。

「Miss！」





「嗯？」

「知唔知『信匡哥』下一句係咩？」

「嘻⋯⋯⋯」

.
.

「『一定得！』呀嘛！」Miss好難得對住我笑出聲。

呢個笑⋯⋯令我突然覺得——

我真係唔再想剩係做Miss隻兵啊！

= = = = = =

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學