真人真事改篇﹕師生戀﹕《最接近的陌生距離》: 第七章之七

「唔得！唔可以掉！」我：「咁有價值嘅嘢點可以話掉就掉架？」

媾Miss第一式：關心佢，重視佢所重視嘅嘢！

「咁⋯⋯」Miss一下猶豫，似乎呢招有用喎！佢繼續講：「咁可以點處理呀？」

叮——！我靈光又閃喇！

「借比我呀！我唔怕污糟喎！」我：「我家姐話白先勇啲作品好睇喎！我又想睇下。」





媾Miss第二式：投其所好⋯⋯扮都要扮出嚟啦！

但係Miss忽然狐疑起嚟，佢唔多信我，佢話：「平時唔多覺你咁鍾意讀書架喎！」

「啊⋯⋯」我一時間被問到口啞，但又一下靈光，我緊接講：「咁⋯⋯可以順手借埋比我家姐睇架嘛！係啦！我家姐喺港大讀中文架，佢第時都想做老師喎！」

Miss喺驚慌嘅餘悸中閃出一下訝異嘅神情，好似搵到知音人咁，有啲雀躍咁講：「你家姐都係讀港大中文系嘅？！」

「嗯！係呀！今年剛剛Year 1！ 」我：「咦？Miss你好似都係⋯⋯」





「哈⋯⋯係呀！估唔到喎！你家姐原來係我師妹呀！」

「嘩！咁真係估唔到呀！」

媾女第三式：R關係！

「我地可能見過面添喎！你家姐今年會唔會上莊呀？」Miss好似冇咁驚，仲同我閒談起嚟。講起上嚟，Miss第一次同我傾學習以外嘅嘢。

「上莊？咩嚟架？」





Miss偷偷一笑，就話：「你上到大學就知啦！啊⋯⋯」佢露出一個靈光一閃嘅表情，繼續講：「如果你家姐今年會上莊呢⋯⋯我識下佢都好喎！反正好難見到你家長！見你家姐都得唧！」

頂呀，Miss真係唔會放過接觸我屋企人嘅機會啊！

講下講下，Miss忘記咗驚嘅感覺，佢嘆一口氣就話：「咁呢兩本書⋯⋯你幫我好好保管住喎！」

「得啦！擺我度過個冷河唧！過幾日你就唔會覺得污糟啦！」

「吓？你話會睇我先借比你喎！」

「兩樣都有啦！總之⋯⋯我目的係唔想Miss你掉咗咁有紀念價值嘅書！」

講完之後⋯⋯我呆撚咗！我做咩會講呢啲架？！我望住Miss佢都遲疑咗一秒，然後微笑咁講：「嗯，Thank You!」

我同佢之間⋯⋯好似又有奇怪嘅氛圍！就好似今朝咁！呢⋯⋯呢個係咩感覺嚟架？！





「唉⋯⋯我仲要抹嘢同消毒添！」Miss望一望手錶，喃喃自語咁講：「我而家仲要去留堂班。完咗留堂又要開會⋯⋯」

「等我嚟呀！」

「吓？」

「我幫你抹，你快啲去留堂班啦！」

「老師唔可咁樣叫學生做嘢架！」Miss細細聲同我講：「我費事又比同事話啦！」

「哎吔！你咪咁婆媽啦！你遲晒到啦！」我催促住Miss：「得啦！趁而家教員室冇咩人！我快手搞店啦！」

Miss猶豫咗陣，最後見佢好感激咁對我點頭：「唔該晒你呀！班長！」說罷了，Miss即刻趕去留堂班。走之前同我講：「抹完你就返屋企啦。今日唔留你堂啦！」





「唔得！我要找清逃學條數呀！」

Miss反咗我白眼，但佢好快有一下欣慰嘅笑容，佢話：「你鍾意啦下！bye!」

「嗯！bye bye Miss Wong!」

我目送Miss走咗，加上教員室又冇老師，所以我即刻yeah一聲叫咗出嚟！

我一邊幫Miss抹嘢，一邊回憶今日嘅經歷。我唔止同Miss破到冰，佢冇再嬲我！仲同我嘅關係熟咗好多添呀！

雖然Miss一定睇唔上「中毒陳」，但可以整蠱佢，又令Miss當佢有菌咁避開，算係一大勝利！諗到呢度，我抹嘢嘅動作都一絲不苟起嚟！我心情仲好愉快添，內心有一種感動叫———

——我做呢隻兵真係做得好幸福啊！

= = = = = 

ig: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #青春 #成長 #初戀 #戀愛 #中學