真人真事改篇﹕師生戀﹕《最接近的陌生距離》: 第七章之六

唔係雷響！係Miss嘅尖叫！佢本能反應咁縮咗我背後，兩手搭住我膊頭⋯⋯呢鋪我發達呀！

「中毒陳」如夢初醒咁回神過來，問：「咩事呀？！」

「曱⋯⋯⋯曱⋯⋯曱⋯⋯」Miss喺我背後伸咗隻震晒嘅手指出嚟，佢把聲係前所未有咁驚。

「吓？！」

「仲吓咩呀！即刻放低本書舉高雙手！」呢個時候我梗係撥下火啦！



「曱甴呀！」Miss喺我肩後申個頭出嚟叫：「本書⋯⋯本書啊！」

「吓？嘩！」「中毒陳」大吃一驚，好似揸住個殺人凶器咁掉咗本書喺枱。成隻小強乾屍顯露我地三個人眼前！

「咩話？」「中毒陳」都嚇咗一跳：「冇可能架喎！」

「紫嘴, 你呢啡就全校都知架啦！」我撥火都唔夠，要火水救火先得。同時間我放低疊簿喺櫈度，拎咗張預備好嘅紙巾出嚟，我指住本書同Miss講：「哇！成塊pizza咁喎！Miss，條紫嘴九成用你本書去拍曱甴呀！」

「你唔好講呀！低B仔！」Miss崩潰咁叫。



「我⋯⋯我冇呀！Miss Wong你聽我解釋先⋯⋯」「中毒陳」連忙自救，同時想拎起本書。

我即刻截住佢，然後毁屍滅跡，連埋寶貼執走隻小強，再話：「Miss! 我中一時親眼睇住有隻小強喺紫嘴隻耳仔度爬出嚟呀！」

「同學你唔好亂講喎！」

「我唔想知呀！」Miss繼續驚叫。

「紫嘴佢嗰把正一筲箕嘴呢架！成日食嘢食到周圍都係，又唔抹嘴！佢個位專養曱甴架！」我一邊扮嘢，一邊忍笑。屌，好撚辛苦呀！



「唔好再講！你收聲！」Miss喺我耳邊喝罵，只聽見佢抖咗一口大氣，就夾硬令自己冷靜，把聲仲係好驚咁講：「陳Sir! 你即刻還返晒啲書比我！」

「Miss Wong⋯⋯我⋯⋯」「中毒陳」好無辜又唔知發生咩事，四十歲人烚下烚下咁。

「快啲呀！」Miss忍唔住鬧出聲。

「中毒陳」叫咗聲哎呀就想走，但被我叫住：「都係唔好煩啦。Miss我幫你拎啦。」我再對「中毒陳」講：「紫嘴你咪埋再嚟添呀！一陣又跌多幾隻小強埋嚟呀！」「中毒陳」嬲到瞪住我。

「是旦啦！快啦！」Miss。

然後我跟住垂頭喪氣嘅「中毒陳」去拎返Miss另一本白先勇小說。之後我返埋去Miss度，見到佢成個人氣急敗壞，問咗其他老師拎疊消毒紙巾，但成個人呆晒企喺度。明顯佢唔知由邊度開始清潔。

「Miss!」我拎起本書叫佢。

Miss指住我話：「企喺度！咪埋嚟！」



我好似被差人逗咁舉高手。

「Fing下本書先！」

我照Miss指示做，當發現冇小強跌出嚟後Miss指住自己位講：「放呢度！」

Miss好似嚇到失去咗語言能力咁，成個人好神經質。當我放低本書後，Miss猶有餘悸咁講：「搞錯呀！咩人嚟架！污糟成咁架！我本書呀⋯⋯唉！」

Miss望住本書好不捨又傷心，然後同我講：「班長，幫我掉咗本書佢！」

當佢下咗呢個決定後，我留意到佢好唔捨得，於是我問佢：「Miss你好似唔想掉嘅？好重要架？」

「唉⋯⋯」Miss嘆氣：「我中學嗰時，一位好錫我嘅文學老師送比我架！唉⋯⋯抹又唔係，掉又唔係。」



嘩！好珍貴嘅情報！忽然我靈光一閃——

= = = =

ig: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #青春 #成長 #初戀 #戀愛 #中學