真人真事改篇﹕師生戀﹕《最接近的陌生距離》: 第八章之一

「白先勇《台北人》⋯⋯」我望住Miss兩本珍藏百感交集。我呢份人最怕讀書，就好似吸血鬼揸住聖經即時人體自燃咁。點知為咗Miss, 我竟然會睇咁厚嘅書！仲要係兩本添！

放學之後我即刻去買咗卷包書膠。幫兩本書清潔消毒之後，再包返靚佢。唉⋯⋯手工差，真係唔識包書！最後都係靠家姐幫手先得。

「吓？邊度嚟嘅書呀？你會睇書架咩？」剛好家姐唔洗住hall先幫到我手。佢驚訝嘅表情同Miss一模一樣，對我會讀書好難以置信：「你做咩幫人包埋書呀？」

「唉⋯⋯我班主任囉！我呀⋯⋯唉！比佢收晒皮呀！」我：「你知我呢啡又污糟嚟架嘛！費事整爛老師本書啦！」

「冇可能！邊有老師教得到你呀。」家姐封埋膠紙，包埋第二本書。





「唔該家姐！」我見到家姐一面懷疑咁望住我。我又心諗的確係得Miss可以教得到我。

「冇可能喎！你咁有心架咩！幫人包書⋯⋯哦！」家姐恍然大悟咁指住我：「佢係女仔呢嘅！」

頂⋯⋯咁樣突擊我？！家姐⋯⋯家姐⋯⋯知我鍾意Miss？!

「睇白先勇嘅⋯⋯佢大過你架？」

咁Miss梗係大過我啦！所以我答：「係⋯⋯係呀！」





「哎吔⋯⋯！你鬼馬呀！」家姐好似發現新大陸咁好興奮：「係⋯⋯隔離女校嘅？」

吓？

⋯⋯

⋯⋯⋯吓！家姐誤會咗喎！咁不如順水推舟啦！順手問下家姐點媾女都好嘛！

「啊⋯⋯係⋯⋯係呀！」我難為情咁點頭。





家姐興奮咁拍手⋯⋯痴線佢咁興奮做乜！佢又問：「佢今年中七架？Alevel啦喎！揀咗大學未呀？佢會讀咩架？」

家姐連珠炮發咁問，我惟將部分Miss嘅嘢用嚟答佢：「港大中文囉，佢夢想係做老師呀！」

「嘩！」家姐拍晒手：「即係會做我師妹呀！」

其實⋯⋯佢係你師姐囉。

「你個死仔包呀！我成日督你讀書都唔得！你為咗個女仔肯讀書！我真係唔知好嬲定好笑呀！」

「唉⋯⋯都未追到手。我兵仔嚟唧！」其實係冇可能追到啦！

「年紀差唧！問題不大！」家姐忽然溫柔咁笑：「而家你至少要即刻睇晒呢兩本書先！」

「咁厚！點睇呀！」





「咁你想唔想追到人呀？」

「咁梗係想架！」

「拎紙筆出嚟！留心聽！寫重點！」家姐未畢業就老師上身啦！

頂⋯⋯我無啦啦比家姐當咗係實習⋯⋯係實驗對象！佢當晒自己係中文老師咁教我。但都好嘅，有意外收鑊——白先勇小說懶人包入手！！

= = = =

搞搞下已經成點鐘！但我冇咩睡意，喺床上面輾轉反側好耐。因為一合起眼就有Miss嘅影像出嚟。仲要係佢比小強嚇親嘅樣，高冷嘅女王原來都有咁可愛嘅一面。

反正唔係好瞓到，我揭下Miss本書，發現內頁寫咗呢句：





「盈盈：

成長需苦，仍需樂觀面對。勿忘初心，將來要做一位好老師！

溫老師」

咦？睇嚟學生時代嘅Miss都幾多困難要面對喎！有好老師鼓勵佢，又難怪佢咁珍惜本書啦。唉⋯⋯諗諗下今次我又係過份咗嘅。犧牲佢本書嚟陷害「中毒陳」呢件事真係唔好比Miss知，否則一定會嬲我。
= = = = =

ig: ar_hong_91


#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #青春 #成長 #初戀 #戀愛 #中學