真人真事改篇﹕師生戀﹕《最接近的陌生距離》: 第七章之五

鈴————！放學啦！我最期待嘅畫面即將出現啦！

「Goodbye Class!」

Miss講完再見後，我就即刻出嚟截住佢，我話：「Miss, 我想問返今朝《六國論》最後一段嘅問題呀。」

「嗯！好呀。」佢執拾緊雜物咁講：「咁你順手幫我拎啲呢嘢落我位呀。」

「好啊！」我笑住講：「同埋⋯⋯我想今日留堂。」





Miss聽到「留堂」兩個字後明顯有偷偷笑咗下，然後又好嚴肅咁講：「都冇人要罰你。唔洗留堂喎。」

我難為情咁搔一搔後腦，話：「哈⋯⋯咁，之前逃學要留堂一星期嘛。呢條數未清，我又走咗四五日，我諗應該要留堂留一個月嘅！」

Miss嚴肅嘅表情有一個微笑，佢話：「拎嘢啦。」佢將疊簿推咗比我。然後我同Miss一齊離開課室。

話說，我都係第一次同Miss喺學校入面行咁長嘅路。唔知係咩原因，我同佢除咗保持住一個身位嘅距離外，我地都冇講啲咩。我個人覺得氣氛有啲老尷。但係我實在有好多嘢想同佢講，包括關心佢嘅嘢同埋今朝佢講又講唔出口嘅說話。 不過我覺得最重要嘅係呢一句——

「Miss !」





「嗯？」

「多謝你！」我好想多謝佢幫我同副校求情。

Miss詫異咁笑，就話：「做咩講多謝呀？」

「你⋯⋯你⋯⋯」但最後我竟然好想講「你真係好錫我呀！」⋯⋯點講出口呀戇鳩！

我突然心跳加速，講嘢都吞吐起嚟。最後，我九唔搭八咁講：「多謝你比我留堂呀！」





下！咩邏輯呢架？

「吓？」Miss忍唔住笑說：「你低B架？」

「啊⋯⋯⋯！哈哈⋯⋯哈哈⋯⋯」頂！Miss個甜笑真係攞我命！搞到我剩係識傻笑。塊面！唔准紅！唔准紅呀！

Miss皺一皺眉，佢都好難理解我發生緊咩事。佢又話：「低B仔。」

低⋯⋯低B仔？咦喂！佢唔係叫我做「班長」喎！ 咁即係代表Miss已經完全唔嬲我啦！好嘢！

= = = =

終於嚟到教員室嗰層。離遠已經見到「中毒陳」喺教員室外面等緊Miss。

「Miss Wong!」「中毒陳」真係烚熱狗頭咁嘅樣。





Miss 表現有啲老尷，睇嚟佢對埋身媾佢嘅人都好敏感。但礙於禮貌，Miss都點頭打個招呼。

「陳Sir, 搵我有事？」

「哈哈，係呀係呀⋯⋯唔知你答應成點呢？」

Miss一面疑惑，問：「唔好意思，唔係好明你講緊咩。」

「中毒陳」話：「咦？啊⋯⋯其實我留咗張Memo喺你本書度。我問你⋯⋯」

「噢，Sorry. Lunch之後我直落到放學。我一直未返埋位。」Miss禮貌咁微笑：「張便條係講啲咩架？」

「中毒陳」好難為情咁笑，說話：「我⋯⋯拎比你睇。」





當我想跟埋入去教員室食花生時，「中毒陳」好唔客氣咁同我講：「同學！你唔入得教員室喎！」

我唔出聲，報以一個神秘嘅微笑，我就睇下「中毒陳」你仲可以惡得幾耐！

「班長幫緊我拎嘢。」Miss同「中毒陳」講。

Miss開到口，「中毒陳」都唔敢阻住晒。我笑嬉嬉咁對住佢，屌⋯⋯我真係好撚興奮呀！

喺行去Miss位途中，「中毒陳」不斷撩Miss講嘢，扮晒識文學咁睇咗邊啲詩詞歌賦呀，又話白先勇啲書好撚滾動佢呀，亦無啦啦念起詩嚟⋯⋯吖！佢好撚嘢喎！短短路程就吹咗咁撚多嘢！佢講嘢速度真係好撚快！

快又點呀，Miss保持禮貌嘅笑容，但我感覺到佢已經非常煩厭。

當行到Miss位時，我感覺到Miss身邊嘅氣場立即劇變！

「⋯⋯⋯」Miss望去書架，見到「中四級中國語文課本」旁邊攝住咗白先勇嘅《紐約客》同《孽子》！同我預期嘅一樣呀！Miss真係好憎比人搞亂佢啲書！





「中毒陳」仲唔識死咁喺旁邊繼續講。然後佢見到本《台北人》放咗喺枱度先識得收聲，好詫異咁講：「咦？我明明攝咗落書架度喎！」

「中毒陳」滿面疑惑，可能佢自己開心得滯都忘記咗有冇攝返本書入去。教數嘅人係咪除咗記數字就記唔到其他嘢呢？只見佢拎起本書，想搵返約Miss嘅便條出嚟時，個「加料」書背就——

——呢一刻成個世界靜晒！

唔係！係暴風雨前嘅寂靜！

剎那間我好似見到一下閃電，跟住一聲雷響！

.

「啊———！」
= = = = = 





IG: ar_hong_91



#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #青春 #成長 #初戀 #戀愛 #中學