真人真事改篇﹕師生戀﹕《最接近的陌生距離》: 第七章之四

重建形象工程繼續進行。食完Lunch之後推咗班兄弟唔去打波。我去咗教只室外面啲位清功課。我發現呢個位置真係絕佳情報位。眼之所見，耳之所聽，真係咩風都收晒。我聽到其他女老師圍埋講Miss壞話，話佢勾人老公、搏表現、靠周Sir先做到咁多重要嘅位等等⋯⋯唉，聽到我都唔舒服。

當我見到班三姑六婆由講到興高采烈突然煞有介事咁散晒，我就知道Miss嚟咗。Miss好慣常咁拎起我啲功課睇下做成點，然後咩都冇講就返去教員室拎啲筆記比我。

「溫咗書先做啦。我唔想又彈你功課呀！」Miss講完就走，但比起之前幾日，我感覺到佢態度真係軟晒。至於今朝嘅事，我實在好想知道Miss想同我講啲咩。

呢個時候，我見到數學科主任陳Sir喺走廊頭嚟緊。佢係一位四五十歲嘅男人，矮Miss少少，最正係佢好似中咗毒咁，兩片嘴唇係呈紫醬之色。所以我地叫佢做「中毒陳」。

係，唔止中毒，佢個樣仲好撚毒添。「中毒陳」一見Miss就狗公格上身，撲都撲唔切咁行咗上嚟，仲「Miss Wong! Miss Wong!」咁叫。即使Miss背住我都好，我都想像到佢表情係幾咁尷尬。





「中毒陳」拎起本《台北人》滔滔不絕咁同Miss講自己幾有得著。睇Miss嘅身體語言就可以知佢真想快啲離開呢度。

「陳Sir, 我要去當值。不如你將本書放喺我位。」

「啊！好呀！我⋯⋯想再睇多幾本白先勇嘅作品！我希望好似你咁有文學氣息。」

「嗯⋯⋯！你隨便拎呀。不過唔好整亂書嘅排序喎。」

「啊！明白明白！我都有呢啲強迫症。就上次⋯⋯」





「陳Sir, 我去做嘢先。bye。」

「嗯！好bye bye。」

「中毒陳」咁樣比Miss請食檸檬法都仲好開心咁喎！咁樣衰都想媾Miss⋯⋯咦？我嘴角揚起笑意，按奈唔住心中嘅衝動。於是我求其拎住份功課，以交功課為藉口走入教員室。

因為午息嘅關係，大部分老師一係去咗當值，一係就出咗外面食Lunch，所以就冇咩人。 我一邊觀察住「中毒陳」一邊慢慢行。我就好似潛入敵陣嘅間諜，要扮到好自然咁避開老師嘅目光，又要唔可以跟甩目標。 然後我見到「中毒陳」去到Miss位攝本《台北人》入書架，再拎走另一本書，然後佢好愉快咁離開。

此時我跟上去，見到書架上面有一行白先勇系列，本《台北人》就就整整齊齊咗攝咗喺中間。果然我分析係冇錯，由Miss執我寫字到佢放得咁整齊嘅書，Miss對整齊係有一種病態性嘅強迫！如果我整亂咗佢，咁「中毒陳」就⋯⋯嘿嘿嘿嘿！！





於是我喺整齊嘅書列之中拎返本《台北人》出嚟。循例都要幫Miss check下「中毒陳」有冇拎本書嚟打飛機⋯⋯傻架咩！對往白先勇打飛機？然後我一揭開就見到張紙仔咁樣寫⋯⋯

「Miss Wong:

本書好好睇，多謝你推介比我。平時做野好忙，好少同你傾到關於文學嘅嘢。學校附近有一間cafe，不如搵日我地去嗰度食Lunch。到時我地再慢慢傾呀。

放學你再覆我啦。

陳Sir」

啲字⋯⋯唉⋯⋯你都係寫返數字算啦！

「嘿⋯⋯你今次唔好彩啦紫嘴。」我暗暗笑說，張紙仔即刻變廢紙。

我又心諗搞亂啲書本次序好似都唔夠。我睇「中毒陳」平時呢呢啡啡，張枱就哪哪渣渣⋯⋯啊哈！！對唔住呀「中毒陳」⋯⋯啊！唔係！係對唔住呀Miss，我鍾意你，所以唔想你被呢隻毒撚騷擾。





我靜雞雞走去「中毒陳」個位度（好易認，有曱甴屍嗰個就係），冒住生命危險喺佢位度搵到一隻名為「德國蟑螂」乾屍。然後用好細嘅寶貼將條乾屍痴落書背度！呢下我計過架啦，當Miss一見到隻曱甴屍唔止嚇一跳，仲即刻聯想到「中毒陳」拎佢本珍藏嚟拍曱甴！

哈哈哈⋯⋯我真係忍唔住笑！「中毒陳」怪就怪你之前睇死我升唔到班啦！

然後我搞埋啲手尾，求其將本書掉喺Miss張枱度，再整亂佢「白先勇系列」嘅次序，仲將其中一兩本攝落啲參考書度。當我轉身離開嗰下，就覺得自己好似電影啲特務咁，係差個背景整啲爆炸effect。有就真係完美啦！

= = = 

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #青春 #成長 #初戀 #戀愛 #中學