真人真事改篇﹕師生戀﹕《最接近的陌生距離》: 第六章之六

Miss冰凍嘅手捉實咗我！親手糾正我寫字！！

.

「啊———！！」

突然間我吃驚大叫！我感覺到有一種反抗嘅力量由心而發，想衝破冰封嘅感覺！

只感到我有啲失神，我身體做咗一下反射動作。喺我回神之時，我發現自己已經掙開咗Miss隻手，成本作業亦被我掃落地上，離我張枱兩三米位置。





Miss都比我嚇親，我望見佢一面驚訝，一對清澈眼睛瞪大咗。

清澈嘅眼睛⋯⋯⋯我心跳加速！當我地四目交投之時，令我原本好紅好熱嘅面頰變得更熱！我連忙離開位執返本作業！

「Mi⋯⋯Miss⋯⋯對⋯⋯對唔住！」我唔知自己發生緊咩事！只感到呢刻好老尷！總之求其講啲嘢去緩和下個氣氛啦！

然後我聽到高踭鞋聲，見到Miss亦都離開咗位，行咗喺我對面約兩三米嘅位置。只見佢表現唔再冷漠，仲好似多咗份理解⋯⋯理解？佢理解咗我啲咩呀？難道因為我頭先嘅激動反應令佢知道咗我——鍾意佢？

「Sorry。」





下？做咩同我講sorry?

「我唔應該將我個人對寫字嘅執著加喺你身上嘅。」Miss溫柔咁笑，係我好耐都未見過嘅笑容。

聽佢咁講，氣氛好似冇咁老尷。同時間——「鈴——！」鐘聲響起。

Miss望咗出去走廊，就話：「嗯，要準備上堂啦。我拎返啲簿落去先。」但佢好似想借啲意離開課室，難道佢都覺得尷尬？

Miss正想離開時，佢視線望咗去地下，眼睛瞪一瞪，似乎發現到啲嘢。我隨佢視線一同望去，就發現有張對摺咗嘅紙仔喺地上面。





張紙咁熟口面嘅⋯⋯啊！！係前日我寫比Miss嘅紙呀！ 張紙一直攝喺作業書皮內頁度！即係佢一直都冇睇過張紙啦！！

「你跌咗嘢喎！」Miss行前想執起張紙。

頂！我入面寫咗⋯⋯痴撚線咩！咁難為情！咁噁心！咁惡頂嘅嘢點可以比Miss知架！

於是我又上前想執返起佢！電光火石之間，我同Miss一同蹲下，我地嘅指尖剛好撞上。

有一下電流麻痺咗我，喺我遲疑嘅一瞬，Miss已經執起張紙。

我同佢慢慢起返身，我見佢一面思索咁，應該慢慢回憶起呢張紙係佢誤會我畫公仔嗰張！

「Mi⋯⋯Miss⋯⋯唔該比返張紙我呀⋯⋯。」我阻止唔到心跳、阻止唔到我表情可以變得有幾驚同怕醜！

Miss望返我，佢唔多講啲咩，但睇表情佢似乎想講「咁鬼鼠？我就睇下你畫咗啲咩？」





於是Miss打開咗張紙。

⋯

⋯⋯⋯

⋯⋯⋯⋯時間凝結起嚟。

我表情都僵住咗。

Miss原本帶住微笑嘅表情都慢慢凝重起嚟⋯⋯

.





「Miss， 我擔心你。」

.

字雖然醜，但Miss呢刻一定感覺到我當時真係好比心機寫呢一句說話。當時我之所以咁認真寫，係因應我怕字太醜Miss會唔鍾意，咁更莫講話將呢份心意話比佢知。

Miss慢慢咁放低手，佢低住頭，好似諗緊啲嘢。當佢抬頭望返我時，佢眼神好似變化咗。我講唔出、形容唔到係啲咩。只知道我同佢之間有一種神秘氛圍慢慢形成緊。

「班長⋯⋯」Miss嘅聲音變得好細聲，彷彿佢呢一刻已經放低咗老師嘅身份。但佢欲言又止咁，我好想知佢想同我講啲咩嘢。

而我感覺到自己再忍受唔住內心嘅衝動。

我好想！

一定要！





喺呢一刻！

同Miss講———

.

「Miss Wong 我鍾意你！」

= = = =

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #青春 #成長 #初戀 #戀愛