真人真事改篇﹕師生戀﹕《最接近的陌生距離》: 第六章之五
未打鐘喎，Miss咁快到嘅？只見Miss冷淡嘅表情閃咗一下驚訝，睇嚟佢都驚訝我竟然咁早返嚟。
我同佢驚訝咁對望一秒⋯⋯屌做咩好似有啲老尷嘅？搞到我連忙咁講：「Mi⋯⋯Miss Wong, 早晨！」
「嗯。 早晨。」
我見佢拎住一大疊簿埋去老師位開工。呢刻我回想起頭先書記阿姨提到Miss呢排代我去開課室門。我睇住佢呢刻模樣，心下就奇怪佢唔係應該留喺教員室改簿架咩？但當我見到佢眉宇間嘅愁緒時，我就連繫到呢排關於佢嘅負面消息——Miss想遠離充滿是非嘅教員室。
「你仲企喺度做咩？」Miss邊改簿邊同我講：「仲有成個鐘先打鐘，你唔洗咁快返課室喎。」
「其他同學仲未返，都冇人同我玩啦。」
「咁你坐低，我有嘢比你做。」
我照Miss說話做，坐咗喺佢對面嘅位。然後佢將前日我交比佢嘅作業交返比我，話：「冇一題啱，啲字好核突，重做。」
Miss對住我成個機械人咁，講嘢嘅tone冇起伏，今日嘅佢真係cool到一個點。我仲期待Miss會問我做咩會早返添。
Miss繼續埋首工作當中，佢連呼吸都好靜，靜到只係聽到改簿嘅聲。我感覺到當刻嘅氛圍變得愈來愈古怪同尷尬。
「咳⋯⋯咳⋯⋯」我扮下咳，想緩和下尷尬嘅氣氛。然後我話：「Miss，今日我其實特登早啲返。」
我心底仍然好想Miss讚下我。
點知——
「你係班長，早返嚟開門係你責任。」Miss眼尾都唔望我，繼續忙佢嘅工作。
我望住嚴肅嘅Miss, 唔知道究竟係佢仲嬲緊我？定係佢呢排太唔開心所以搞到咁。難得獨處，我真係有好多嘢想同Miss講。
好想同佢道歉。
好想同佢講聲多謝。
好想關心佢⋯⋯⋯
但呢一切都被佢嘅冷漠block住晒。我連同佢閒談幾句都唔夠膽。既然係咁，我惟有專心做好功課。好彩我有比心機溫Miss比我嘅筆記，所以全部都識做。於是好快就交返份功課比Miss。
此時我企喺佢旁邊，終於見到Miss冷漠嘅表情上有一絲驚訝，佢一定訝異我點解會做得咁快。由佢來回納咗幾眼可知，佢應該驚訝我做啱晒。我難忍自豪咁笑，心諗呢次讚我啦掛———
「重做。」
吓？
「字醜，重做！」
佢推返本作業比我，繼續佢嘅工作。
唉⋯⋯預咗嘅，氹佢唔同氹一般女仔嘛！我返埋位再做一次，過咗一陣又交返比Miss。
但係⋯⋯
「再做。」
喂！
「你唔寫好啲字，我唔會收！」今次Miss有望住我講嘢。只係眼神好凌厲，仲用佢枝紅筆指住我講。
「知道。」我無奈咁答佢。心諗⋯⋯你係咪特登玩我架？
我要將啱嘅答案擦走，就好似要親手殺死自己個仔咁殘忍！然後我喺「交嘢、彈功課、擦、重做」呢個無間地獄入面不斷輪迴。過咗一陣，我唔知道已經重做咗幾多次。只見張紙都比我擦到霉晒，再重做就會爛。
我好小心刻下一筆一劃，好似雕刻家咁雕緊個雕塑出嚟。但因為寫字太耐，搞到手心好痛，筆都揸唔穩，啲字真係震過貓王。
「錯筆劃。」
Miss把聲喺我旁邊傳嚟，我應聲一睇，佢唔知幾時企咗我隔離！頂，難怪有一種壓力壓咗埋嚟啦。 搞到我一時間唔敢落筆寫字添！
Miss 緩緩靠近，坐咗我隔離，翹埋對黑絲腳⋯⋯頂你，我個心呢刻個感覺好古怪呀！就好似一杯雞尾酒咁，入面溝埋咗好多嘢———有暗戀人嘅甜蜜感；喺呢份基礎之上，係若即若離嘅失落；然後最衝擊我嘅，係一種刺激！視覺？嗅覺？定味蕾上嘅刺激？呢杯酒加咗辣椒定黑椒呀？我知道呢份「刺激」正正就係Miss嗰份由骨子裡散發出嚟嘅誘惑！
「仲唔寫？」Miss見我呆晒，佢面露不解，語氣都好嚴厲。冇辦法，惟有聽佢話啦！點知我又跌入另一個無間地獄⋯⋯
「呢度係『勾』呀。」
「係。」
「個『撇』撇好少少啦！」
「知道。」
「係『點』，唔係『剔』呀！」
嘩！Miss對字體美觀嘅要求唔係一般嘅高啊！簡直到達病態地步！佢好似有強迫症咁，用一個好厭惡嘅態度對住我。當我每寫錯一筆一劃佢都會摺摺聲咁叫！
「喂！你連寫個『一』字都咁醜嘅！」Miss已經忍無可忍，語氣都惡咗唔少：「擦過！再寫！」
Miss 以女王嘅口吻命令我，我只好照佢說話去做。冇諗過Miss連「一」呢個咁簡單嘅字都咁執著。但係我已經寫到手又累又痛，呢個「一」字點寫都係柒。
「你仲係咁樣架喎！係咪要我捉住你隻手教你點寫字呀！」Miss指住我寫到震晒嘅「一」字鬧：「再寫！」
即使我心底係鍾意Miss都好，但我忍受唔到佢呢種對字體美觀嘅病態執著，好自然咁白咗佢一眼。但我隻手不受控制咁照佢說話做，小心咁擦走啲字。張紙擦得大力少少實穿，我更加唔敢喺上面用力寫字。
唉⋯⋯就住就住咁寫邊會寫得靚呀？加上手心痛，手臂累，Miss坐喺龐邊嘅壓力⋯⋯啲字已經唔係震過貓王，直頭係打風！
「嘖——！」Miss嗰把厭惡嘅聲音喺我耳朵邊響起。
就係呢一瞬間，一陣香氣撲鼻，佢嘅體溫亦慢慢迫近埋嚟。
然後我右邊身突然僵硬晒！完全郁唔到。我好似被冰封咗咁⋯⋯
⋯⋯係！我真係被冰封起嚟！因為我感覺到揸筆嘅手好凍！呢個凍冰冰嘅感覺一直由手背傳去手臂、蠶食我半邊身，直至幾成個人冰封為止！
然後，我揸筆嘅手不受控咁喺紙上面寫字。我用僅餘嘅知覺郁動眼球，望去隻手度，同時Miss喺我耳邊話——
.
「你真係要我捉住你隻手教你點寫！！」
.
Miss捉⋯⋯捉住咗我隻手⋯⋯？
= = = = =
IG: ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #青春 #成長 #初戀 #戀愛