真人真事改篇﹕師生戀﹕《最接近的陌生距離》: 第七章之一

「Miss Wong 我鍾意你！」呢句說話喺我心裡面不斷吶喊！但我理性嘅一面奮力咁壓制住呢份衝動、呢隻猛獸！

唔好講！千祈唔好講！講咗就冇彎轉架啦！

如果講咗佢一定覺得我痴線！一定覺得我唔正常！Matthew 件事咁困擾佢，我點可以再比麻煩佢呀？講出口佢一定憎我！一定會避我！一定會⋯⋯但⋯⋯

但係！

我真係好鍾意Miss Wong啊！





Miss呢刻一面不解，似乎呢刻佢都感受到我有嘢想同佢講！

「Miss ！」我鼓起勇氣，唔理咁多：「我⋯⋯！」

正當我想向Miss表白之時，有一把聲喺門外傳入嚟。

「好嘢！係我第一！咦？」

我同Miss一齊望出門口，發現係阿波身水身汗衝咗入嚟。但當佢一見到Miss 喺度時，就嚇到仆咗街，真係成粒波咁喺地上面碌多咗幾下！





阿波狼狽咁起返身，因為佢衝住咁入課室，搞到佢好驚咁望住Miss。 Miss即刻變返做女王，行去阿波度沈住怒氣咁講：「講咗唔准喺走廊跑架喎！」阿波嚇到支吾其詞。

Miss鬧咗阿波幾句後就擰轉頭同我講：「班長，幫我搬返啲簿落我個位度。」佢又用返女王嘅冷漠口吻講。

我即刻聽Miss話幫佢手，免得比頭先嘅畫面同氣氛所影響住。當我離開課室後先可以鬆咗口氣！呢隻真心波成日坑害我，估唔到今次係佢救咗我！我冷靜返落嚟後心諗好彩冇講出口咋！學生鍾意老師！傻架咩？表白咗又點呀？我死𡃁仔嚟咋！Miss點會同我一齊呀？

⋯⋯係囉。

我鍾意Miss咁又點？打從一開始，我嘅暗戀係唔會有任何結果。

= = = =

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #青春 #成長 #初戀 #戀愛 #中學