真人真事改篇﹕師生戀﹕《最接近的陌生距離》: 第六章之四

打後兩日，雖然我都仲係有遲到，但冇之前咁嚴重。Miss都係繼續冇同我講嘢。而今日，我終於要為之前違規行為找數。

「訓導處最後決定要記你一個大過。」高年級訓導老師羅Sir講得有啲唔服氣，冇嘅，我同佢啲牙齒印深到乜咁，佢好想我快啲走。

更令我感意外嘅係，我以為就算唔係被人踢走，都係兩個大過呀。最後點解只係記一個大過嘅？

「訓導呢邊一直都見唔到你家長。輔導組覺得要由輔導角度去幫你！所以決定將你轉比吳姑娘跟架啦。你以後要聽話啲呀！」羅Sir停一停又講：「你知唔知你今次其實好易比學校趕走架？」

「知。」





「咁你好好珍惜個機會啦！」羅Sir雖然唔鍾意我，但我聽得出佢呢句係出自真心。佢繼續講：「好心你乖啲啦！你可以憎晒全校老師！但惟獨有一個人你一定要對佢好啲呀！」

「邊個呀？」

「Miss Wong呀！」

「吓？！」我吃咗一驚：「關⋯⋯關佢咩事呀？」

「關佢咩事？梗係關事啦！Miss Wong幫你同副校求情架！如果唔係點會只係記你一個大過咁便宜你呀！」





羅Sir噴咗我幾句後就走咗，我成個腦白晒，因為我冇意會過Miss會幫我求情。難道幾日前佢走入副校長傾嘢就係為咗我？

唉⋯⋯無論點，我真係好內疚同好慚愧。Miss真係從來都冇放棄過我！

= = = =

真係好想同Miss講句多謝同道歉。

但係上堂根本冇可能同Miss傾到私人嘢。小息佢一係忙當值，一係就準備下一堂嘅嘢。午息更加唔洗講，佢連食飯時間都係得十分鐘左右。唉⋯⋯我之前仲咁跩，想像唔到佢仲點可以分精神同時間去煩我嘅嘢。





放學留堂嗰陣，Miss連片中一仔嘅力氣都冇。我留意到Miss嘅疲累應該唔係呢一日嘅事。佢滿面愁容，連笑都變得勉強。除咗我嘅事之外，佢應該仲要煩緊周sir同Matthew師兄嘅事⋯⋯而且可能仲有好多問題都要面對。

= = = =

今日終於準時返學⋯⋯唔係！係早咗返去。

時間係早上七點鐘，校內冇咩人，環境寂靜。今日係我第一次盡返班長嘅責任，去校務處拎鎖匙、粉筆盒、點名簿。校務處啲書記阿姨一見到我就好驚訝，笑咗我一兩句：「咦？我冇睇錯呀嘛！匡少呀？你琴晚喺學校過夜咩？」明顯佢笑緊我以往唔係遲到就逃學啦。

「早晨。」

書記阿姨一邊恥笑一邊執埋啲立雜野比我，佢又話：「你咁樣未乖仔囉。唔洗日日麻煩Miss Wong幫手開課室門！」

我不解咁離開校務處，言下之意，Miss每日都做埋我嗰份？

然後我返到課室，執下啲林沈野，整返靚個班房。我見到個壁報甩晒啲嘢就幫下手釘返靚佢。呢個時候——





.
「班長？」
.

我回頭望去課室門前——

「Mi⋯⋯Miss Wong? 」

= = = = 

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #青春 #成長 #初戀 #戀愛