真人真事改篇﹕師生戀﹕《最接近的陌生距離》: 第六章之三

食完午飯，我搵個藉口推咗阿偉唔去打波。我坐喺教員室外面啲位上補做返啲功課。數下手指，原來我由開學去到今日，已經累積咗50份欠交功課！其實基本上冇可能清得晒，所以我目標為本只做中文功課就算。

雖然唔太識做，惟有盡力做，識幾多做幾多。同時我個心仍然係囉囉攣，唔知Miss見完副校未。良久，有一陣陣高踭鞋嘅聲音由我後面而嚟。我轉頭一睇正係Miss喺走廊後方行緊上嚟。我嚇咗一跳，連忙咁低頭做功課。

當我聞到一陣獨特嘅香水味時，Miss急步咁喺我旁邊行過。

「Miss Wong! 」有位中二嘅師弟叫道。

Miss Wong起初面無表情,店行店過，直至師弟叫咗幾靜之後，Miss Wong先回過神嚟，勉強嘅擠出一個笑容：「係？問⋯⋯問功課？」





Miss佢呢下笑明顯係心事重重，神不守舍咁。到底佢同副校傾咗啲咩？難道真係冇得撈？我連忙咁搵張紙寫道：「你冇事嘛？」然後打算攝埋入啲功課交比Miss。

但我望多兩眼後又覺得⋯⋯ 唔掂喎！再寫過啦，不如就⋯⋯「Miss你唔開心？」⋯⋯唔得唔！寫「Miss你係咪有心事？」

「你同周Sir係咪分咗手？」

「點解頭先冇睇我地班食飯嘅？」

「Matthew同你係咪一齊咗？」





「你同Matthew嘅事係咪比副校長知道咗？」

「你係咪會比人炒呀？」

「你係咪唔會再做我地班主任啦？」

寫完又擦，或者寫完撕爛、拿埋一住⋯⋯不知不覺成枱都係廢紙。唉⋯⋯好似寫極都寫唔出我內心嘅感受出嚟。呢個時候我抬起頭，想清晰下思緒。

我望住長長嘅走廊，眼內係散步中嘅同學、罰企嘅壞學生、片緊人嘅老師、談天說地嘅師生⋯⋯然後我見到嘅畫面好似調低咗嘅彩色度，有少少啞色。而成個世界惟一嘅彩色，就係拎住疊簿嘅Miss——佢好狠狽咁喺簿架上面抬咗啲簿落嚟，再搬入去教員室。





冇耐之後，Miss好匆忙咁喺教員室出返嚟，走咗去小賣部買午餐。佢正想返入去教員室時，又被同學捉住問功課。Miss好和藹咁笑，好用心咁教。但難俺佢眉宇間嘅憂鬱同疲倦。

我見住Miss喺教員室同走廊之間來來回回、匆匆忙忙，唔係被同學問完功課，就係同同事講公事。唔知佢食咗飯未，唔知佢有幾攰，唔知佢有幾唔開心⋯⋯我只知道自己，呢一刻好想好想同佢講——

.

「Miss，我擔心你。」

.

我啲字一向醜，偏偏今次寫得得別用心。然後我好小心咁摺好佢，但呢個時候⋯⋯

.

「你畫緊公仔呀？」





.

我嚇咗一跳！我抬頭一睇，Miss已經成個女王君臨天下咁企喺我面前！

頂呀！我太專注冇留意到佢嚟咗！Miss同返我講嘢本來係一件好事！但呢刻我好似做咗虧心事咁慌失失！

Miss見到我成枱都係頭先寫紙仔嘅廢紙後，再加埋我狼狽樣，佢一口咬定我係掛住畫嘢冇做功課。搞到佢本來唔好嘅心情顯得更加差！此時Miss向我伸手，冷冷咁講：「拎嚟！」

我望望手上張紙，明顯Miss想收咗佢啦！唉，頭先寫嘅時候我幾咁期待Miss見到聽到我呢番說話。但真係埋牙嗰時，原來———

.

原來係咁難為情架！！





.

「⋯⋯其實我⋯⋯我⋯⋯」我嚇到支吾其詞。

Miss冇講啲咩，用眼神示意我交張紙仔比佢。睇Miss咁強勢，我一定冇得避。

為咗令件事冇咁老尷，我惟有連埋份功課交比Miss。果然Miss注意力去咗份功課度，張紙仔就比佢攝喺內頁裡面。

Miss納下睇我做成點，佢表情話我知佢非常唔滿意。之Miss返咗入教員室放低我份功課，唔洗好耐佢就行返出嚟。

「今日留堂。」Miss冷冷咁講，擺低份筆記就返入去教員室。

望住Miss親手寫比我嘅筆記，我開心咗一下。即使只係關心我個學業，但都好過冇呀。

放學後，我乖乖地去中一班房留堂。一邊睇住Miss片人，一邊溫Miss嘅溫暖筆記。Miss全程冇同過我講嘢，眼尾都唔望下我，不過感覺冇琴日咁冷漠。





嗯，總算係有啲起色嘅。

= = = =

IG: ar_hong_19

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #青春 #成長 #初戀 #戀愛