真人真事改篇﹕師生戀﹕《最接近的陌生距離》: 第三章之三

只見佢仍然兩手翹起，神色好冷靜又有威嚴。睇嚟佢唔單只冇比我嚇親，仲想大返我轉頭添。

咯……咯……咯……﹗Miss慢慢行過嚟，高踭鞋嘅聲音喺課室顯得異常響亮，而且更帶有高傲冷漠嘅氣息。佢每向我行前一步，我就好自然咁向後退。Miss嗰種女王嘅氣勢完完全全咁向我輾壓過嚟！最後我被佢迫到去課室門前，我一粒聲都唔敢出。

「⋯⋯」Miss唔出聲咁望住我，佢表情冷若冰霜，眼神好堅定。

咦？換係平時，呢個時候我已經同老師開晒大片。呢刻課室得返我同佢，環境係靜到得返我地嘅呼吸聲。我係一個堂堂一個男子漢，身型比佢大隻，莫話打柒佢，鳩痕少少趁冇人擒咗佢都仲得添！但偏偏⋯⋯

Miss竟然一啲都唔驚我！而且仲要唔出聲咁望住我，咁樣反而令我慌寸大亂。搞到我被迫同佢四目交投。片刻，我個注意力由佢一雙清澈嘅眼睛慢慢轉移到佢整個樣貌。





剎那間，我內心突然有一種壓唔住嘅感覺——

——Miss好靚。

原來Miss嬲嘅時候，皺晒眉頭嘅樣係咁靚，令佢女王嘅屬性一下子爆升！

咦⋯⋯咦？！咪……咪住先，我⋯⋯我做緊咩呀？我個心跳得好快！好快！我⋯⋯我唔係要鬧爆佢咩？！平時呢啲時候我一定有主導權架喎！啲老師會買我怕架喎！

唔得！我唔可以再比佢迷惑嘅！我⋯⋯我望去第二度先！





「望住我！」Miss突然厲聲一喝，嚇咗我一跳，令我好自覺咁望返佢。

我見到Miss上面嘅怒意慢慢消失，冷漠地說：「你發完脾氣未呀？」唔知點解，聽落佢似想關心我嘅？

吓？佢唔應該係打蛇隨棍咁鬧我架咩？做咩又會對我溫柔起嚟架？以前啲老師一係同我片到落尾，一係就索性認輸架喎？！Miss……你到底想點呀？

呢個時候，我留意到Miss原來一早準備好咗一個file。 當我見佢將file拎上手睇時，我先發現原來佢睇緊我個學生行為紀錄。呢份紀錄好似案底咁，會由中一開始一直跟到我畢業。唔洗問都知，Miss想數晒我由中一起犯過嘅校規。

只見佢念念有詞細閱片刻，就放低個file，一面威嚴冷漠咁望住我。我已經知道有唔好嘅事情將要發生，於是做定同佢開片準備。





點知⋯⋯

「係咪好耐都冇人關心過你？」Miss面色一變，柔聲咁講。

吓？!佢唔係應該要如數家珍咁數我啲過錯咩？

以前既日子，除咗「廢超」唔鳩理我之外，呢間學校所有老師都當我仇人咁。當我一比佢地罰，佢地就會由咸豐年講返我衰過啲咩，最後就會得出「睇死謝子匡遲早入黑社會架啦！」、「今年你一定留硬班！」、「快啲踢佢出校啦！」呢啲結論。

老實講，我習慣晒，心都傷晒，最後心都硬埋起嚟。

我讀書讀得好唔開心，但即使係咁都好，老豆老母都唔幫我搞退學。既然係咁，我就同老師玩野，犯下錯之餘又識得守返規，係都唔比佢地有藉口趕到出校。成績上就掹下車邊搏升班。總之我死都要留低喺度篤眼篤鼻。因為佢地真係好令我討厭。佢地用我嘅行為決定一切，佢地……

佢地冇一個人會關心我呀﹗

咦‥‥?！諗到呢度，我個心有一種好奇怪既感覺。我以為一早對老師心死，但呢一刻又好似有返少少感覺，難道係因為……Miss剛才既一句說話?





佢知我冇人關心。

佢知我其實好想有人關心。

佢知我最想既係——

「你最想係父母關心你。」.

Miss慢慢變得溫柔起嚟。

#小說 #文字 #文學 #愛情 #故事 #師生戀 #講故佬#小甜 #miss故