真人真事改篇﹕師生戀﹕《最接近的陌生距離》: 第三章之二
一返到學校，第一個招呼我嘅唔係Miss，係佢條仔，周Sir。
「停低！」
我被周Sir捉埋咗一邊，因為琴晚同老豆老母嘈完，我塊面黑過包公，可能因為咁搞到周Sir以為我串親佢。
周Sir走埋嚟，由上而下咁打量我。佢眼神好唔友善，搞到我好唔自在。唔洗問，佢一定想捉我校服儀容啦！
「你件校服咁污糟邋遢嘅？你係咪返學架？」佢眼神變得好厭惡，好似望到個乞衣咁，好睇唔起我。
「Sorry Sir。」我刻意唔望佢。
「你老母點教你，道歉要望住人架嘛。」
洗唔洗一嚟就提老母咁串呀仆街周！
「Sorry Sir!」
我不忿咁望住周Sir再「道歉」一次。我以為咁樣可甩難，但呢個世界總係有啲人鍾意得寸進尺！
「睇嚟你就算有老豆老母都成個孤兒咁喎！爛身爛勢點返學呀？屋企窮到得返一件校服？」
周sir用一個嘲笑同輕視嘅態度講呢番說話，本來我已經心情差到一個點，佢咁樣簡直就係火上加油，我即刻爆佢：「你講咩呀！而家屋企窮犯校規呀?！」
「你件校服污糟晒就係儀容唔合格。」周Sir嘲笑我。
「咁你未罰囉﹗」
「罰就罰硬架啦！」然後佢行前一步，向我展示訓導嘅氣勢，面露慍色咁講：「我講咗唔好比麻煩Miss Wong架嘛。你呢幾日做咩唔返學？」
哈，原來搞著Miss，有人要幫條女出氣。
「唔返學關唔關你事？我麻煩到Miss Wong關唔關你事呀？」
「好啊！好夠膽喎同學！」周Sir露出令我不安嘅微笑：「我今日要隔離你。同我躝上去訓導室，等陣我就招呼你﹗」
喺我同周Sir劍拔弩張之時，有一把聲介入咗落我同周Sir之間——「周Sir？」我應聲一睇，一身深色sult嘅Miss行咗埋嚟，就話：「阿匡交比我處理就得架喇。」
Miss 語氣溫柔，與凶神惡煞嘅周Sir形成強烈對比。望見周Sir一面得戚嘅樣，似乎唔多想領情。佢繼續望實我，語帶挑釁咁講：「呢個學生冇家教架喎！佢實會蝦你。不如交比我處理啦。」
Miss再行前少少，企喺我身邊，柔聲咁同周Sir講：「呢個學生仲未同我熟唧。今次件事係個機會比我好好關心佢嘛，係咪？始終都係我班學生，等我處理返就得架啦！」
Miss 一笑再一笑，佢想用親切可人嘅笑容緩和氣氛外，亦想消一消佢條仔嘅氣。果然周Sir深呼吸咗一下之後，就對Miss話：「咁佢交返比你處理。」
Miss點一點頭，就嚴厲咁同我講：「跟我嚟。」然後佢首先行前，示意我跟埋上嚟。當我行經周Sir身邊時，我地咁互瞪一下。
我跟住Miss行，我唔知佢想帶我去邊。只知道我特登行慢啲，佢愈叫我行快啲，我就行得愈慢。今日我就擺明同佢唔合作！
Miss喺校務處前停低咗，轉身向我望嚟，睇佢個樣應該忍夠我啲態度，佢嚴厲咁講：「入去校務處，盡返班長嘅責任！」
「乜嘢呀？」
「你唔記得左你係班長呀？係咪想我親自教你點做呀？」Miss:「入去校務處拎點名簿同班房鎖匙！」
可惡，換係阿Sir我一早同會死撐到底。但見係佢，我竟然乖乖咁聽佢話。到底係咩原因？係因為我怕咗佢背後撐腰嘅周Sir，定係其他原因呢？
我萬不願意咁照Miss說話做，拎齊晒佢要嘅嘢就跟佢上課室。佢一邊行一邊親自同我講班長每嘅工作係咩。我當然冇聽入耳，全部當係耳邊風啦！
「你清楚晒班長嘅職責啦嘛？」Miss嘅聲音令我回神過嚟， 原來我已經跟佢返到班房。
呢個時候Miss已經坐喺老師位，翹住對黑絲腳，兩手翹埋。而我就比Miss罰企，正正企喺佢身前，距離大約有四個身位。呢種距離感令好普通坐喺老師位嘅Miss有一種高高在上坐喺皇座嘅感覺。只見佢全身散發出女王嘅氣息，當中嘅威嚴慢慢咁輾壓過嚟。
「你知唔知逃學係嚴重違規架？」Miss：「你仲要逃咗學三日咁多添。」
呢啲明知故問嘅問題我係唔會答。我身體語言已經話比佢知我好唔滿意佢琴日阻我搵食！
「根據校規，最少要記你一個大過。」Miss:「你有咩解釋？」
唔係吓話，咁大陣仗捉我返嚟課室，就係想我兜口面認錯？我愈諗愈嬲，琴晚佢搞到我差啲同老豆打交我都仲未同佢計！仲想要我屈服？
「你真係冇解釋？」Miss:「冇解釋我就真係記你大過架啦！」
「咁你未記囉！」我最後忍唔住，向Miss破口大罵：「係呀！我逃學呀！我去咗返兼職呀！滿意未呀？」
「你學生嚟架，你做咩唔好好讀書呀？」
「搵食犯法呀？！」我：「我想過努力讀書架！其他老師有比過機會我咩！」
「返兼職唔係一個合理缺席嘅理由。請你好好諗清楚再同我解釋。」
「仲解釋啲咩呀？你有眼見架嘛！我已經斷正左比你啦，你仲想我點呀？！」我怒氣已經再忍唔到落去：「我琴晚都比你搞到家嘈屋閉啦！記你就記啦！！」
「如果我一心想罰你嘅，我就唔會浪費時間同你傾。」Miss: 「 我知你有苦衷，所以我先唔想周Sir插手。」
「妖！你搞到我差啲同老豆打交呀！你仲扮咩好人呀？！」我瞪大對眼怒吼一聲：「我講你會聽咩？有老師會信我咩？你做例行公事就唔好晒扮關心我啦！」
我忍無可忍！我對Miss發出猛烈嘅怒吼！我要比佢知道佢再嘈我就會郁手打佢！點知——
Miss唔只冇嚇親，佢仲即刻企起身擺出強硬姿態！
#小說 #文字 #文學 #愛情 #故事 #師生戀 #講故佬#小甜