真人真事改篇﹕師生戀﹕《最接近的陌生距離》: 第一章之三

阿叔我由13歲就讀呢間中學，有咩風浪未見過？有咩人係未得罪過？ 但其實，呢間學校就有一位老師係絕對唔可以得罪。

「你就係4A班揸fit人啦？陳浩南呀嘛？係咪洪興呀？」

周Sir，就係嗰位唔可以得罪嘅老師。

「阿Sir, 我都係吹水唧。」

周Sir係我地嘅訓導主任，佢唔止係老師，仲要係輔警。加埋佢同辦學團體嘅關係。周Sir唔止惡咁簡單，佢直頭係呢間學校權力三巨頭之一！





我比佢捉咗喺黑板前罰企，仲當住我喺啲手足面前插我。以恐怖level嚟講，都算係最輕微嘅第一級，對我嘅殺傷力其實好低。但係周Sir嘅氣場都嚇到我班手足唔敢出聲。我瞄咗新Miss一眼，佢企喺老師枱隔離，兩隻手交疊放喺身前，個樣好拘謹，仲時不時望住周Sir。

「吹水？放學留低慢慢比你吹好唔好？」周Sir:「你知我咩身份架啦？洗唔洗搵反黑招呼你？」周Sir好唔友善咁用手指篤我心口。

「Sorry Sir! 我唔敢搞事啦！Sorry Sir! ! Sorry Sir! ! 」佢講到咁，再同佢頂嘴就我蝕招。我留意到周Sir間唔中會瞄去Miss度，Miss又瞄一瞄過嚟。雖然佢地冇講嘢，但我感覺到佢地眼神中係有不能言喻嘅交流。呢一刻我知道，周Sir呢條友想喺Miss面前威一下！

「周Sir, 我知錯啦。對唔住！」適當時候認嘅低威係生存法則之一。

果然自我好膨脹嘅周Sir達成目的後，佢就冇再屌我，但係佢就借勢訓斥全班：「4A班！唔洗問都知你地咩料！操行同成績都唔達標！全校最差就係你地！缺席、欠交功課、上堂瞓覺⋯⋯基本上你地都做足晒。我仲知道你地有人會喺學校度食煙添！甚至群埋黑社會！以前梁Sir點縱容你地，我唔理！」





梁Sir就係指「廢超」。

周Sir行到去課室尾，再行返上嚟繼續訓話：「你地過去三年點樣恰梁Sir，我都唔會追究。我只要求一件事，我要保住學校嘅入U率。我要求所有高中同學都要有鐵一樣嘅紀律。操行達唔到標嘅，即踢！所以——」

周Sir去到黑板前，兩手交疊放喺腰後面，當正自己係警校教官：「唔好比我知道，你地用對付梁Sir嘅方法對待Miss Wong。」

啊——！明晒，周Sir係嚟護花嘅。我瞄下Miss，佢嘴角含笑，仲抖咗一啖氣，似乎被周Sir打咗枝好勁嘅強心針，而家佢個樣慢慢冇咁緊張。

周Sir望返去Miss， 原本好似黑面神嘅佢突然變臉，露出笑容仲好溫柔咁話：「呢度交返比你。呢班好難搞，有咩事隨時叫我上嚟幫手。」





「嗯！唔該晒，周Sir。」Miss微笑，帶住幾分仰慕。

咦？兩個曖昧嘅眼神，難道佢地拍緊拖？

唔係吓話？

周Sir有老婆架喎！

#小說 #文字 #文學 #愛情 #故事 #師生戀 #講故佬#小甜 #Miss故