真人真事改篇﹕師生戀﹕《最接近的陌生距離》: 第一章之四

睇住周Sir離開後，我感覺到班手足之間開始傾返偈。

呢個時候Miss望住我，一面友善，就話：「同學你⋯⋯」我見佢好慌忙咁睇下人名表，似乎想知我叫咩名。

「我叫許波！」fake老師，基本嘢啦。

「許同學，你去可以返埋位坐！」

我一擰轉面，就見到成班人知道我fake到Miss而偷笑。我行去我個位，阿偉同杰少就同我做咗個碰拳嘅動作。至於「許波」係邊個？未就係坐喺杰少旁邊扒喺度瞓緊嘅死肥仔囉。我地叫佢做阿波，四兄弟入面佢最抵得諗。





我一返埋位，就好似老細咁將隻腳晾咗喺枱上面。我見到Miss有望過我一眼，我感覺到佢唔多滿意。不過Miss就冇理我，繼續保持微笑。

「4A班同學你地好。我再介紹自己一次，我係黃梓盈老師，係你地嘅新班主任⋯⋯」

「Miss!」我夾硬打斷佢說話，問：「你個名點寫架？寫出嚟比我地睇吓啦！」

而我就好似坐安樂椅咁，搖緊張櫈。我一定要比個下馬威Miss！準備整啲麻煩比Miss嘆！

Miss表情好似閃過一絲不滿，但好快笑面迎人：「好呀。」





Miss轉身想喺黑板寫字時，先發現啲粉筆比我地玩完而跌晒喺地下。

「邊個同學玩粉筆呀？」Miss好似忍唔到落去，開始嬲嬲地，佢仲特意咁望咗我一眼。好肯定佢將呢壇嘢入咗我數。

佢鬧完之後就彎低身執起粉筆。呢個時候，我感覺到全班突然安靜咗！

個⋯⋯個⋯⋯個畫面！！

嘭——！！





「哎吔——！」

頭先個畫面搞到我失咗平衡就成個人跌低！當我完全未意會到發生咩事時，我已經聽到全班恥笑緊我！

「咩事呀？！」Miss聽到我跌低時就即時回頭轉身，我見佢表情即刻擔心起嚟：「你冇事呀嘛？」

Miss急步向我走嚟，想嚟扶一扶我。佢嘅步速好急，但喺我眼內就好似放慢咗個鏡頭咁，令我可以好好咁欣賞呢位新Miss最靚嘅一面。

Miss急步嚟緊嘅時候，佢將貼喺面龐亂咗嘅頭髮圈起耳背後面。忽然間，我心跳加速起嚟！我⋯⋯我好似被佢呢下動作同樣貌吸引咗！

Miss呢一刻有學生師姐嘅感覺之餘，佢條頸同鎖骨亦散發出成熟女人嘅韻味。 就好似奶同茶咁，兩隻唔同質料嘅水混埋一齊之後出奇地match！⋯⋯唔係唔係！剩係奶茶都唔夠形容！我喺Miss身上搵到好多好多吸引人嘅特質！

老師嘅威嚴，令我覺得佢好神秘。

但佢呢一刻嘅溫柔親切、令人好想接近佢！





憂心嘅眼神，唔知點解，令我覺得佢雙眼係水汪汪咁！

更重要係，剛才令我跌低嘅畫面、佢彎身執起粉筆時嘅——臀部！

「你起翻身先。」

Miss緩緩地向我伸手，想將我扶起。成個畫面好慢好慢，仆街仲好似有埋濾鏡咁！

Miss啲手指係好白、好纖細。五塊手指甲上面塗咗一層透明嘅甲油，令佢啲手指有一種閃閃生亮嘅感覺。呢個女人每一寸肌膚、一舉手一投足，都好似充滿咗魅力！而我好似無法抗拒呢種魅力，我好自然地輕輕搭住Miss伸出嘅手。然後Miss將我扶返起身。

「點呀？你有冇整親呀？」Miss溫柔咁講。原來佢都幾高，我剛剛高佢半個頭。目測著咗高踭鞋嘅佢大概有170cm。

「有冇撞親個頭呀？」Miss好想輕輕撫我髮頂。





我避一避，搖晒頭就話：「冇⋯⋯冇事。」

Miss聽到我冇事之後，我留意到佢表情慢慢變得嚴肅，仲有少少惡咁講：「以後唔准搖櫈！你咁樣好易整親自己架！」

Miss帶住責備嘅意味去關心我。

呢種反差⋯⋯呢種反差⋯⋯

「聽唔聽到我講咩！許波！」

呢種反差令我反應慢咗幾秒！我都未認得切Miss, 本來瞓緊嘅阿波聽到有人嗌佢之後就彈咗起身！

「係！對唔住！我瞓著咗！」阿波以前比人罰開上堂瞓覺，一聽到自己個名就好條件反射彈咗起身！

阿波呢下動作令Miss大感奇怪。睇住Miss個表情慢慢疑惑起嚟，一時望下我又一時望阿波。由佢慚有慍色嘅神情得知，Miss應該知道我fake咗佢。





「唔⋯⋯唔係捉我瞓覺咩？」阿波無辜嘅眼神望住我同Miss。

Miss冷笑咗一聲，就雙手抱胸，面露慍色向我行前一步。

.
.

「你兩個即刻去罰企！」

.

#小說 #文字 #文學 #愛情 #故事 #師生戀 #講故佬#小甜 #Miss故