真人真事改篇﹕師生戀﹕《最接近的陌生距離》: 第一章之二

今日簡直係創校四十年以嚟嘅奇蹟！聰明如智者嘅阿偉都嚇咗一嚇，一個馬步扎唔穩都搞到差啲仆街。

喂！創校以嚟第一次有又靚又後生嘅Miss嚟教書喎！唔係唔奇蹟吓話！完咗開學禮，我地成班人上晒課室，大家仍然難忍心中嘅興奮，喺返去課室途中繼續高談闊論！

但喺佢地啲雄性荷爾蒙高漲嘅時候，惟獨我慢慢冷靜返頭腦，諗諗下新Miss嚟到或多或少係對我地班有影響，於是趁Miss未到我就搞下啲正經嘢先，開下「班會」傾下個對策。

我將課室中間四張枱泊埋做咗個講台，然後我企咗上去處理下啲「班務」。冇錯，我，謝子匡就係4A班嘅班會主席（自動冧莊，選都唔洗選），主要處理4A呢個大棚嘅囚友福利外，亦都要即時處理啲特別狀況，包括處理換新班主任對手足生活嘅影響。

「大家靜啲！我要開一個緊急班會！」





補充一下所謂嘅福利係有啲咩。其實不外乎都係大家嘅早餐、請槍代做功課代做罰抄、代收違禁品，同埋——

「匡哥！吉澤明步出咗新女教師系列，幾時可以益我地成班兄弟呀！」

——關注一下4A班手足對四仔嘅需求。

我出晒名跟nike神跟得好貼，4A手足想搵片J都會問我幫手。亦都因為咁，我喺呢一班甚至呢一級之中係非常有江湖地位！唉⋯⋯班友仔咸濕都算，豬撚到自己BT都唔肯。哈，好彩老豆老母為咗搵食所以睇得我唔算緊。擺低部電腦想我自學一下電腦咁喎，嘿，咁就成為咗我嘅生財工具——BT啲四仔落嚟，燒埋入碟再賣埋比佢地，一條龍服務！

除咗四仔服務要收錢之外，其他「班務」都會收錢。同一時間我自己都撈緊7-11，可以話4A班嘅Freelance王！唉，冇計啦。鬼叫屋企窮咩，我都係係想養活自己唧，唔洗老豆老母咁辛苦嘛！





老實講，我聽到呢個要求都忍唔住冷笑咗陣，揶揄佢地話：「成班垃圾爛泥扶唔上壁！而家仲洗靠睇四仔去幻想架咩！喂阿哥！成個新Miss棟咗喺度做我地班主任呀！你睇佢一身打扮就知淫底啦！」

聽完之後成班手足即刻起哄。

「喂！主席！你係咪打算擒咗新Miss呀？」

「你都痴撚線！」我指住條傻仔笑佢：「犯法嘢我就唔會做嘅！唔該你地目光咪咁短視啦！我開緊急班會個目的就係要話比你地聽，以前『廢超』執政時代因為『廢超』買我地怕，我地先有三年嘅自由時光咋！」

『廢超』係我地上一位班主任，由中一睇到我地中三。換句話講，我已經同呢班手足做咗三年同班同學！睇嚟佢已經廢到比校長炒咗，所以先要換新老師嚟做我學班主任。不過睇新Miss只係一個弱質女流，又真係唔洗怕佢！





我繼續講：「正所謂新官上任三把火。以我閱人無數嘅經驗，呢位新Miss一定會搞亂呢班建立咗三年嘅秩序！你班友仔跟咗我三年，應該知我想講咩啦？！」

「知！！」全班叫囂！

「缺席嘅缺席﹗」我振起雙手大叫！

「繼續缺席！」全班大叫。

「欠交功課嘅繼續欠交！」我煽動全班手足。

「唔撚柒交！」

「上堂瞓覺嘅瞓覺﹗食嘢嘅食嘢⋯⋯總之 我要『廢超』時代嘅生活維持五十年不變！」屌，講講下搞到我自己成個19政棍喺度拉票咁。

「五十年不變！！」全班拍晒手掌。





「所以！我地！要諗計比個下馬威新Miss睇！比佢知道，邊個先係4A班嘅揸fit人！」

我大聲振呼，但係冇我預期中嘅反應，成班同學突然鴉雀無聲。我大感奇怪，平時佢地一定會跟埋起哄。我放眼全班，有啲人面色發青，有啲人即刻拎書出嚟扮嘢。呢個時候我聽到有人係咁「殊⋯⋯殊⋯⋯」引我注意。我應聲一睇，係阿偉殊緊我，佢同我打個眼色，示意我望返出班房前面。

我回頭一望——

.

「邊個係4A班嘅揸fit人呀？」

.

仆街⋯⋯係周Sir。





Miss企喺周Sir後面，腼腆咁對住全班同學微笑。

#小說 #文字 #文學 #愛情 #故事 #師生戀 #講故佬#小甜