有一晚，我打飛機打到條jer斷左: （56）

身為一個無拍過拖嘅毒撚，由細到大我成日都好容易對人產生好感。

讀中學嗰陣同女同學同位，大家傾多兩句計我就已經心郁郁。

又試過有次一個人去買衫，個女sales主動行埋嚟，同人傾多幾句，見對方露下腳我就又起痰。

Cathy就更加唔洗講啦，當時第一眼見到佢對波，就已經流曬口水。

但係遇見嘅咁多女仔之中，似乎無一個好似嘉奈咁，令我個心跳得好似依家咁快。



「怦怦怦怦怦怦！」

呢一刻嘅心跳直頭快過我坐跳樓機嗰陣。

「乜你好熱壓？塊面咁紅嘅？」

「下？有咩？」本來我塊面已經熱熱地，俾佢咁樣再講一講就更加之熱。

我兩個仲要正面對正面，而且又無得擰歪塊面，直接俾對方睇到曬自己個面紅樣。



「話時話，你係點樣由地球嚟到我地星球架？」

「Er...首先經過一個好窄嘅地方，再穿過一道傳送門，最後就嚟到呢度。」

「哦~原來係咁，咁地球係點架？」嘉奈好奇咁問。

「其實同斯比列特星差唔多，都係有人有屋，有天有地，有山有水咁囉。」

跟住我問返佢轉頭：「我反而想知，點解你地斯比列特人會知道地球，同埋識得講我地嘅語言嘅？」



「因為我地讀書嗰陣，都要必修一門外星學科，要求我地揀一個外星球嘅語言同文化嚟研讀，而喺我地已知嘅星球入面，地球就同斯比列特星最相似，所以我地好多人都揀地球文明嚟學習，唔單止會了解地球嘅地理、歷史，仲涉獵地球上唔同嘅語言。」


估唔到地球文明竟然成為外星人嘅學科。

「不如你再分享一啲地球嘅嘢嚟聽下？例如地球有咩嘢玩架？」嘉奈十分好奇。

我則好耐性咁盡量逐一解答佢嘅問題，除此之外，我又會問返佢一啲關於斯比列特星嘅嘢。

總之我地兩個傾得相當投契，我甚至投入到幾乎忘記左身處嘅困境。

家下我正身處一個俾外星人侵略嘅星球，而且仲同啲手手腳腳失散左。

如果再唔諗辦法反擊，唔單止舊靈結石會被吸走曬啲能量，就連斯比列特星都隨時可能滅亡。



有幸同身邊一個咁可愛嘅女仔，一齊見證一個星球嘅毀滅，或者都可能係一件幾浪漫嘅事，只不過做人又點可以咁消極？

最理想最好嘅情況一定係由我挺身而出，化作救世主，打敗啲外星人，最後抱得美人歸。

「你喺度感應緊其他身體嘅部分？」嘉奈見到我瞇埋左雙眼。

「嗯，係呀。」

「感應到都無用啦，我地咁嘅情況都做唔到啲乜。」

其實嘉奈講嘅嘢我都明，就算感應到啲手腳大概係咩位置，我就咁得一個頭，根本好難去揾返佢地。

然而當我瞇埋眼，腦海就出現六格畫面，分別顯示兩隻手、兩隻腳、仲有個身同碌鳩嘅位置。

嗰六隻上左身嘅鬼包括楊家成，好明顯喺度周圍揾緊其他手腳同其他鬼。



其中碌鳩好似正向住一個男人嘅後尾枕飛近。

大約三秒後，突然聽到楊家成把聲：「終於揾到你啦！」

擘大眼一睇，一碌九吋「巨龍」出現於眼前上空。

嘩真係好彩，居然咁都俾楊家成揾到我！