有一晚，我打飛機打到條jer斷左: （55）

「um…dhxdnmcn…」個女仔含糊咁講左啲嘢。

由於我同佢個嘴唇貼得太近，所以佢個口mak唔到好大，說話講得唔清楚

我就想問佢想講咩，結果一開口，變左大家同時開口講嘢，於是就由雙唇互碰變成濕吻。

「怦怦怦！怦怦怦！」

雖然同肉身分離左，但我依然感受到自己忽然加速嘅心跳。



若果我地一直係咁唔郁，一直咁錫落去，會唔會錫天荒地老？

同一個人錫到天荒地老又會係一種咩嘅人生體驗？

過左一陣，個女仔靈機一觸，向我打眼色。

佢戚眉望向上，跟住眼珠順時針碌左個圈。

唔知點解，我居然睇得明佢想表達啲咩。



佢應該係想我地一齊用頭撼頭嘅方式，互相撞開大家。

雖然我地個頭郁唔到，但條頸仲郁到，可以拗前拗後。

我眨左兩下眼，再將眼珠碌向上面，表示我明白佢嘅想法。

而對方又好似知道我聽得明，即刻又對我眨返兩下眼，以此作回應。

既然雙方都有共識，咁就一於試一試。



我眼定定咁同佢對望，跟住慢慢眨左一下眼。

個女仔就無眨眼，全神貫注咁望住我。

過左兩秒，我再眨一下眼，對方依然眼都唔眨望實我。

最後眨到第三下，我地就一齊岳高頭，將條頸拗後，有咁後就拗咁後。

接住就係最重要嘅一步，如果timing夾得唔準，一個撼快左一個撼慢左，咁碰撞力就會削左。

所以timing好重要。

結果我地卻心有靈犀，兩個頭同時之間互撞。

本來以為一撞埋之後，兩個頭就一齊向後彈開，殊不知啲力卻竟然互相抵消左，即係完全無郁過。



我地個頭撞到好痛，痛到揦埋曬口面。

大家見到對方個皺眉樣，都忍唔住笑左一下。

儘管塊面貼得好埋，睇唔到對方整個笑容，但依然見到彎彎嘅笑眼。

等痛楚消失後，個女仔又打個眼色，示意我地今次唔好互撞，而係由我單方面用頭將佢撞開。

我擔心會撼親佢，佢就用眼色叫我唔洗就力，直接撼落嚟就得。

對方都話明唔怕痛，咁我都無謂婆婆媽媽。

於是我抖啖大氣，先拗後條頸，再用力向前撞去對方個額頭。



「咚」一聲，對方個頭三百六十度，後滾翻碌左個圈。

我同佢嘅嘴唇終於都分開左，而亦因為彼此拉開左大約一吋半嘅距離，令我卒之睇得清佢個樣。

呢個女仔眼大大、臉細細、鼻高高，生得十分精緻，好有一種可愛日本妹嘅感覺。

為顯自己身份，我先開口打招呼：「你好，你...你叫咩名？」

對方一開始應該以為我斯比列特人，點知聽到我講中文，即刻就嚇親，並露出左一副驚訝嘅表情。

佢抿一抿嘴，用中文答我：「我叫嘉奈，你係地球人？」

嘩！嘉奈把聲好甜好溫柔，聽見佢講嘢，感覺好似有一道溫暖嘅陽光照入心扉。

「我…我叫阿華...我係嚟自地球，不過我有一半斯比列特人嘅血統。」



唔知點解突然間自己有啲怕醜，講嘢嘅時候我唔太敢直視嘉奈。

「點解你會嚟我地星球嘅？」

「因為嗰舊靈結石受破壞，我唔想身體以後支離破碎，咁咪嚟呢度對付班外星人。」

「哦~原來係咁。不過我睇你實係俾佢地幾把大風扇，一嘢吹到嚟呢度。」

「係呀，估唔到班外星人會出埋啲咁嘅賤招。」

講完呢句，我就為啱先嘴佢嘅事道歉：「係啦...頭…頭先對唔住…我…我錫…錫左你…」

「唔緊要，你都唔係有心嘅。」嘉奈溫柔咁笑一笑。



佢呢一笑直頭融化左我嘅心。

我feel到自己嘅心跳比頭先跳得再快左。

莫非呢啲就係心動嘅感覺？