【校園】想成為您的治癒: 142. 想休息了

殷書賢一番到屋企嘅第一件事係換件衫，休息半個鐘，然後就開始溫下一科

「趁屋企冇人要集中溫書⋯」殷書賢坐喺書枱前打開下一科考嘅科，「中文筆記⋯」

一坐咗喺書枱前，殷書賢幾乎都冇離開過呢個位，背一背課文、做下題目、睇番統測卷錯過嘅題，咁樣又過咗好幾個鐘

一直坐喺溫書直到日落嘅時份，殷書賢將眼鏡除落嚟，先伸個懶腰，然後拎起手機休息一陣

殷書賢灘喺床上，背脊有嘢靠住真係會比較舒服，佢拎起手機，手懸喺半空，㩒開IG睇一陣





一㩒開IG，就見到邱茗然嘅icon喺自己嘅story icon隔離，殷書賢百無聊賴咁㩒入去睇

邱茗然嘅story影住枱上一大堆中文嘢：「好攰，你攰唔攰？」

再㩒一下跳到下一個story：「我好攰，要休息」

殷書賢忍唔住一笑，因為佢宜家就灘喺床拎住手機休息緊，邱茗然好似咁啱咁po咗呢個story，殷書賢睇到嘅時候又咁啱休息緊

「閱讀同寫作都係聽日⋯」殷書賢坐起身望住貼咗喺書枱嘅考試時間表，「最後先考聆綜⋯即係溫完Bio就冇嘢要溫⋯」





殷書賢望一望時間，十分鐘嘅休息時間好快就過咗，佢又夠鐘要去溫書，畢竟佢嘅考試要十拿九穩咁考

另一邊廂，溫中文溫到就嚟瞓着嘅邱茗然好努力咁坐番好個人，撐起眼皮繼續溫書

「唔想考試呀⋯」邱茗然輕嘆一口氣，然後溫之前統測同past paper入面嘅指定篇章嘅題目，「中文好麻煩，不過我要加油呀⋯！」

邱茗然拍拍自己嘅臉頰為自己打氣，然後又集中精神繼續溫書，喺考試嚟到，就算平時再唔願溫書，佢都唔敢鬆懈

「加油加油！考完試就可以休息去玩㗎啦！」邱茗然嘅目光落喺放咗喺佢枱上嘅幾個遊戲代幣，佢拎起筆，個人充滿電可以繼續溫書





邱茗然打開文言練習，望住一頁明明係中文字但就好似火星文一樣嘅文章，睇咗兩行已經有啲頭痛

「加油加油⋯！」邱茗然對自己鼓勵道

⋯

喺中六嘅考試週，係佢地放study leave前最後一個考試，呢個幾星期，中六嘅樓層特別安靜，因為大家放小息嘅時候佢地仲考緊試，而且因為要令要考DSE嘅佢地習慣DSE嘅模式，所以除咗選修科，佢地嘅主科一直都喺禮堂考試

考試嘅日子一日一日咁過，邱茗然每一日都喺溫書嘅同時數住考試嘅剩餘日數

邱茗然每一日考完一科，番到屋企都會先瞓一陣然後就溫下一科，比平時更加努力

殷書賢番到屋企之後都唔會離開書枱，除咗食飯沖涼去廁所瞓覺呢啲作為人類一定需要嘅事，其他時間嘅佢一定喺書枱前，連睇手機嘅時間都唔會多過個半鐘

「食飯啦！出嚟食咗飯先啦！」媽媽喺行到房門前大聲咁講道





「嚟啦！」「嗯。」

邱茗然拎起手機行出廳坐喺餐枱前等食，趁住食飯呢個時間稍微咁休息一下，個腦實晒就好難再記嘢入腦；殷書賢則拎起放喺書枱上嘅書一齊行出廳，將書放喺旁邊，就算係食飯都唔可以太放鬆 ，如果唔係陣間溫書佢搵唔番狀態

⋯

「你溫晒西史未？」張萱淇問邱茗然，兩人坐喺小食部把握最後嘅時間溫書

「溫晒啦⋯」邱茗然攬住書做最後嘅溫習，「你未溫晒咩？」

「未啦梗係⋯！」張萱淇有啲緊張，「希望佢唔好考中我冇點溫嗰度⋯！」

「呃⋯好難講㗎喎⋯」邱茗然無奈咁講道，「你一早溫晒咪冇呢啲問題⋯」





「因為我估佢唔會特別考呀嘛⋯！」張萱淇打算用十五分鐘嘅時間將佢未溫晒嘅部份一次過塞晒入腦，「不過都快啲記晒先！」

「你平時上堂有聽書都唔怕嘅我諗⋯」邱茗然望住張萱淇一副趕時間嘅表情覺得有啲搞笑，但佢又唔好意思笑出嚟

邱茗然耷低頭望住西史書中嘅內容，主要再加深一下對重點內容嘅記憶

殷書賢同張思群企喺小食部嘅門口拎住Bio書，用最後嘅時間令自己嘅高分更穩定

張思群一直喃喃自語背書，殷書賢一直用腦嚟背書，但對佢兩個人嚟講，呢科要拎高分其實好容易

「仲有五分鐘打鐘。」趙遠寧望住小食部嘅時鐘提示道，佢講完就耷低頭溫書

其實到咗最後一刻，再做垂死嘅掙扎都冇咩意思，真係努力嘅人，唔會喺最後一刻先努力，應該一早就做好準備

「叮噹叮噹⋯叮噹叮噹～」





中一至中五嘅早會鐘聲響起，中六嘅考試鐘聲響起，又係一日新嘅考試日

喺監考老師一㩒計時開始，殷書賢即刻好快咁潦咗自己嘅英文全名，然後就掀開卷睇

認真咁睇兩眼題目，大腦即刻搵到相關嘅內容同答案，即刻拎起筆就寫

對佢嚟講，好似冇唔識嘅題目一樣，每一題都係一望就識一望就知答案，佢就係熟到呢個地步

邱茗然睇完題目，喺腦入面即刻諗到可以用啲咩論點，好快就落筆答題

文科就係同時間嘅競賽，要寫得快，要論點啱，所有嘢都要有根有據

邱茗然以平常心去面對西史考試，對佢嚟講，西史都係佢比較擅長嘅科





呢場考試，係DSE前最後一場考試，壓力比平時考試更大

喺安靜嘅考場裏，就算係掀紙聲、㩒筆聲都會令人嘅神經繃緊起嚟

「希望考試，快啲完⋯」

⋯

日子一日一日咁過，慢慢咁主科都一科一科咁考完，要考嘅卷愈嚟愈少；喺維持咗個幾星期嘅考試嘅最後一科，係中文嘅卷三聆聽及綜合能力

「嘟嘟嘟嘟！嘟嘟嘟嘟！嘟嘟嘟—」「停筆，考試時間結束，放低筆。」

「哈⋯」喺代表住最後一份卷結束嘅計時器聲響起，喺禮堂中傳嚟所有中六生鬆一口氣嘅嘆氣聲

「考完啦⋯」殷書賢即刻覺得輕鬆咗唔少，佢幾頂喺鼻樑上嘅眼鏡除咗落嚟放喺枱上，雙手掩住眼同時揉一揉眼

「終於可以瞓個好覺啦⋯！」邱茗然喺老師收咗佢嘅卷嘅時候伸咗個懶腰，「陣間番屋企一定要瞓一陣⋯！」

「考完試鬆一口氣啦？」監考老師拎起咪講道，「放一日假之後，後日就開始對卷啦。」

「唉⋯」監考老師一講完，禮堂裏即刻傳嚟嘆氣聲

「都唔比人休息下⋯」邱茗然捏一捏自己嘅頸，一直耷低頭搞到條頸都好酸痛，「後日又番嚟對卷⋯」

大家執好嘢離開禮堂，今日係最後一日，大家都想好好休息一下，洗滌一下呢個幾星期嘅疲倦心靈




IG Link: https://www.instagram.com/nd_cotttoncandy/?hl=zh-tw