【校園】想成為您的治癒: 143. 有信心嗎？

「淇淇呀，我今日就唔同你食lunch啦⋯想番去瞓⋯」邱茗然喺行出禮堂嘅時候對張萱淇講道

「好呀～」張萱淇點點頭爽快答應，「我都想番去瞓⋯」

邱茗然行到去巴士站等巴士嚟，張萱淇就行去另一邊，邱茗然望住張萱淇行遠嘅背影，然後又回頭望一眼通往學校嘅路

「佢地企喺嗰度講緊咩⋯？」邱茗然見到謝澤謙佢地幾個就企喺路口講嘢

「我今日番屋企先食lunch，我媽話煮咗嘢比我食。」趙遠寧望住手機，佢啱啱先覆完佢媽媽





「我番去瞓。」謝澤謙指向地鐵站嘅方向

「殷書賢你食唔食嘢？」張思群望向殷書賢

「唔啦，佢地都唔食，我都番去。」殷書賢搖搖頭

巴士駛到站，邱茗然望一眼駛到面前嘅巴士，又回頭望一眼企喺路口嘅殷書賢

邱茗然雖然有戰猶疑，但佢未到會唔搭呢班車番屋企嘅地步





「有車，我行先啦！」殷書賢當然見到佢要搭嗰一架巴士埋站，佢即刻小跑過去上車

殷書賢行到上層，見到邱茗然坐喺後面一個窗邊隔離嘅位置，殷書賢冇坐過去，只係坐企喺邱茗然前面嘅座位

「喂！」邱茗然拍一拍殷書賢嘅膊頭，好似擔心殷書賢會見唔到佢咁大個人一樣，「嗨～」

「嗨。」殷書賢回頭望向邱茗然

「我坐你隔離得唔得呀？」邱茗然望向樓下，見到其他人上車





「你坐。」殷書賢點頭，平時放學搭車佢都係同邱茗然坐

今日唔係一齊坐嘅時候，殷書賢反而覺得有啲奇怪，可能係真係習慣咗

邱茗然攬住書包坐去殷書賢隔離，佢都冇考慮如果比同級嘅人見到會變成點，只係單純地⋯想坐佢隔離先

「考完試輕鬆晒～」邱茗然笑一笑講道，然後從袋中拎咗兩個漢堡包糖出嚟，比咗一個殷書賢，另一個自己開嚟食，「考完試好開心～」

「但後日開始就派卷唔係咩？」殷書賢望住邱茗然已經開緊包糖，佢無奈咁笑一笑後撕開糖嘅包裝

「哎⋯唔好講呢啲咁可怕嘅事⋯」邱茗然搖搖頭拒絕呢個話題，拎起最底嘅一塊食先

「覺得自己考得唔好？」殷書賢從最上嘅一塊開始食

「唔肯定⋯」邱茗然扁起嘴，「唔敢講，如果我講咗考得唔錯，咁成績可能唔Okay，但如果我話唔Okay，就真係會唔Okay⋯！」





「完全冇關係⋯係付出幾多努力同熟唔熟嘅關係⋯」殷書賢聽住邱茗然呢個毫無根據嘅理論直接反駁道

「你一定好有信心啦！」邱茗然輕撞一下殷書賢嘅手

「正常發揮。」殷書賢平靜咁講，唔緊張亦唔擔心

「你覺得你會唔會係第一名？」邱茗然問出一個好重要嘅問題，係殷書賢嘅目標

「唔知，冇諗。」殷書賢睇起嚟好快咁就回答，但其實佢喺考完最後一科之後有大概估計一下自己嘅成績到邊

後日開始就係對卷日，雖然都會諗下成績，但宜家考完最後一科，咁就暫時先放低成績休息下先

⋯





第二日明明放假，但殷書賢一大清早就起咗身

「瞓唔番⋯」殷書賢灘喺床上面望住天花板，佢拎起放喺枕頭邊嘅手機，「先9點幾⋯」

殷書賢坐起身，佢嘅大腦都已經醒晒瞓唔番，成個人都好精神，而且咁唔好彩今日係大晴天

睡房內嘅窗簾好透光，所以陽光嘅光線直接穿過窗簾照入嚟，啱啱好照正殷書賢瞓嘅位置

「冇書要溫⋯」殷書賢望向書架，佢嘅年終大考就喺琴日結束，宜家就等出成績

殷書賢拎起手機睇一陣IG，但睇兩睇就已經冇咩好睇；行入房開電腦諗下打唔打機，但係偏偏其他人又未起身，自己一個打機又冇咩癮

殷書賢百無聊賴行出廳灘坐喺梳化，拎住遙控打開電視都唔知有咩好睇，因為佢平時都唔睇電視

「好悶⋯考完試又冇功課⋯」殷書賢頹廢咁望住開住嘅新聞台





殷書賢輕力咁將遙控拋起又接番，考完試後嘅假期係一個又悶又無聊嘅一日

⋯

星期三係派卷日

「今日我地派咗Long Question先，聽日先派MC題。」Miss Wong手上拎住疊數學core卷，然後轉身拎起白色粉筆喺黑板上寫：「全級最高：97/100；E班最高：97；E班最低：78」

「最高97⋯」殷書賢望住黑板上嘅字，佢表面上好平靜，但係其實佢都好緊張

「最高分既然喺我地班，咁應該都係殷書賢㗎啦⋯」謝澤謙喺心裏都大概估到，「不過陣間Miss Wong實會講。」

「97⋯我計過我應該冇97咁過，即係最高分嘅人⋯」陳懿澄望住黑板上嘅字喺心裏講道





「跟學號出嚟攞卷，1號。」Miss Wong行番去老師枱前

學號喺前面嘅男仔先出去攞試卷，喺殷書賢前面嘅同學喺攞卷嘅時候咩都冇講，只係默默咁將卷嘅輕輕捲一下遞到同學手上

殷書賢前面嘅同學拎咗卷就行開，殷書賢行上前，Miss Wong將卷隨便捲一下，但咩都冇講就將卷遞比殷書賢

眼見Miss Wong咩都冇講，殷書賢即刻有啲緊張

「有其他人考97⋯？」殷書賢嘅心即刻緊張咁問

「最高分唔係殷書賢？」謝澤謙見Miss Wong冇出聲嘅時候都即刻輕皺起眉頭

「唔係佢⋯？」考92排喺班第二嘅陳懿澄都覺得有啲疑惑，「仲有邊個⋯？」

殷書賢唔敢打開份卷睇成績，佢擔心打開份卷之後見到嘅成績會令佢失望

「只要唔低過95就得⋯！」殷書賢坐低喺位，坐佢隔離位嘅人都下意識好奇殷書賢到底考到咩分而偷瞄佢等佢開卷

殷書賢深呼吸，先令自己緊張不安嘅心稍微冷靜落嚟

「冷靜冷靜⋯！」殷書賢喺心裏以微微顫抖嘅聲線對自己講道

殷書賢一下子將微微捲住嘅卷打開，見到喺封面頁嘅右上角，改卷老師以紅筆寫住嘅「97」

「呼⋯」殷書賢見到呢個分數，即刻重重咁鬆一口氣




IG Link: https://www.instagram.com/nd_cotttoncandy/?hl=zh-tw