【校園】想成為您的治癒: 141. 期末大考

喺禮堂考試嘅壓迫感比喺課室嘅仲大，望住螢幕上嘅timer，老師㩒開始嘅一刻，禮堂裏頓時傳嚟一陣急速嘅掀紙聲

邱茗然睇清楚題目之後就落筆寫，幸運嘅係part a嘅題目都係佢可以應付再嘅水平

「隔離掀卷掀得咁快嘅⋯！？」因為禮堂好靜，所以只要有少少聲音都會變得好明顯

邱茗然抬頭向隔離班嘅方向望咗一眼，佢都仲做緊第二頁，隔離班啲人好似做到第三、四頁一樣

「佢地真係唔洗諗點做⋯」邱茗然又低頭繼續做卷





E班嘅人做卷嘅速度好快，寫都寫得好快，人地諗一諗點做嘅時間，佢地都已經做完準備做下一題

殷書賢拎住cal機好輕鬆咁又計完一題，望一望下一題，諗咗一秒又落筆寫步驟同答案

數學果然係佢嘅拿手科，對佢嚟講好似每一題都係part a嘅題目一樣

「佢呢個係真係會計到小數咩⋯？點可能？」邱茗然望住cal機上面顯示嘅答案，唔洗問都可以知道自己計錯數，「愈近part b嘅第一個分題已經計到小數⋯」

望住呢個一定錯嘅小數答案，個感覺就好似叫你計車上面有幾多人，你計到有7.3個人一樣離譜





「計多次⋯！」邱茗然喺草稿紙上面又寫一次步驟，「第一題已經要跳嘅話，咁之後幾題點算？」

邱茗然自己都知前面嘅a1同a2冇可能拎滿分，所以part b嘅題目佢一定要試，就算有好大機會計錯，佢都要試一試

宜家都會放棄嘅話，考DSE點算？雖然試咗嘅結果未必係100分好，但至少肯試去搵正確嘅答案，唔係一遇到困難就放棄投降

「唔⋯好似比啱啱嗰個答案合理啲⋯」邱茗然無奈咁喺心裏嘆氣，「一到考試啲題目就咁難嘅⋯」

做到part b嘅殷書賢拎起筆喺草稿紙上按住題目所講嘅嘢畫咗個大概嘅圖





「唔⋯呢個角同呢個角⋯」殷書賢諗緊點拆題目，佢抬頭望一望喺禮堂台上嘅螢幕所顯示嘅時間，然後完全唔急咁樣繼續諗題目，「唔⋯」

殷書賢仔細咁望一望個圖，然後再諗一諗，下一秒佢就拎起cal機開始計答案，驗證佢嘅想法啱唔啱

喺時間又過咗一大截之後，仲剩番四十五分鐘，殷書賢都已經計到最後一題，對佢嚟講，九個字夠佢準確咁計好最後呢題

「唔⋯到底佢講緊咩⋯？」邱茗然做到part b嘅尾二一題，頭頂上面已經出現咗大量嘅問號

邱茗然好努力咁回想以前自己有冇做過類似嘅題目，特別係喺圖書館做嘅練習題

「好似見過差唔多樣嘅嘢⋯」邱茗然回想起，佢望向殷書賢，從殷書賢嘅背影都睇得出，佢好輕鬆，「上次佢教我點做呢類⋯？」

邱茗然喺草稿紙上畫個輔助圖，嘗試性咁落筆寫答案：「試下啦⋯！呢個點就掂住呢個邊⋯然後就⋯」

邱茗然有啲猶疑，但都係先試一下，畢竟嚟到考試，就更加唔可以放棄，因為會影響到最後嘅分數





「咦～又好似啱喎～」邱茗然嘅內心高興咁講道，「佢教嘅方法又真係幾有用～」

「嘟嘟嘟嘟！嘟嘟嘟嘟！嘟嘟嘟—」「停筆，考試時間結束，放低筆。」

隨住計時器響起，監考老師就叫大家停筆，其他負責監考嘅老師就行到逐個考生嘅枱邊收卷，完全係跟住DSE嘅模式進行

喺落到小食部放個小息嘅時候，張萱淇同邱茗然一齊行去廁所嘅方向

「份LQ咁難嘅⋯！」張萱淇喺行緊去廁所嘅途中講道，睇起嚟佢嘅腦力都已經消耗咗好多

「LQ難嘅話，MC應該會簡單啲。」邱茗然都嘆一口氣，「最後嗰題我睇咗勁耐都計唔到b part⋯」

「最後嗰題我完全唔識做！望到佢個圖勁複雜，睇到頭都暈⋯」張萱淇搖搖，「你識做呀！？」





「又唔可以話完全識嘅⋯只係計到少少，b2題就真係計唔到⋯」邱茗然無奈咁笑道，「完全唔得⋯！」

「我覺得做到b part最後嗰兩題都仲可以計到bi已經好勁⋯」張萱淇行到洗手盆前洗一洗手，紮番好頭髮，「唔聲唔聲變到咁勁呀～」

「其實係之前殷書賢教過我⋯」邱茗然拉住張萱淇，湊近佢嘅耳邊講道

「哦～」張萱淇即刻笑住咁點一下頭，「清楚晒啦～有學霸大人親自教你～」

「咩呀～咁啱記得咋！」邱茗然即刻行開去洗手，「咁我本來有嘢唔識都係問佢㗎啦～」

「係啦係啦！」張萱淇反咗個白眼，「我淨係想陣間份MC卷簡單啲⋯！」

⋯

「哎～可以早放真係好呀～」張萱淇伸個懶腰，「考完數學之後成個人都開心晒～」





「你番到去要溫其他科呀！過埋呢個幾星期先開心啦～」邱茗然笑道

「好耐都冇同你一齊番屋企啦～」張萱淇從旁攬住邱茗然慨嘆道，「你成日都喺圖書館⋯」

「考試咪同你一齊走囉～」邱茗然笑一笑，但又回頭望一眼

雖然話同張萱淇一齊走都唔係壞事，但都唔知係因為習慣咗定因為其他原因，邱茗然嘅心唔太習慣⋯不過應該係兩種原因都有⋯

「今日先忘記一下佢好唔好？我地去邊度食lunch好？」張萱淇無奈咁戳咗邱茗然嘅臉頰一下

「忘記邊個？你講你自己？」邱茗然扮咩都唔知咁反問張萱淇，將成個問題拋番比張萱淇，「佢冇嚟接你咩今日。」

「佢都考試呀⋯」張萱淇講道，順便拎出手機望一望時間，「佢都未放～不過唔理佢啦～佢唔重要。」





「呢啲大話你都講得出口呀？」邱茗然即刻輕輕咁戳一戳張萱淇嘅手臂，「講大話啦你～」

「冇講大話呀！」張萱淇提高咗聲量講道，「我好坦白！我同你食完lunch就番去溫書㗎啦！」

「我同你食完lunch都番去溫書。」邱茗然用認真嘅表情表達「我信你」比張萱淇知道，「唉⋯好攰，番去瞓一陣補充下腦力就要溫書啦⋯」

「平時放學又唔見你攰？」張萱淇嘅說話似乎有弦外之音

「咁⋯平時唔係考試，要真係個幾鐘喺度做卷嘛～」邱茗然解釋，雖然張萱淇唔太信呢個理由

邱茗然下意識就擰轉頭望一眼，張萱淇都轉頭望咗一望，不過見唔到邱茗然想見嘅人嘅身影


＜倒數！最後10集啦！！！＞


IG Link: https://www.instagram.com/nd_cotttoncandy/?hl=zh-tw