【校園】想成為您的治癒: 131. 禮物

邱茗然拉住殷書賢喺成個樂園玩勻一轉，殷書賢的確有覺得輕鬆咗啲，可能快樂的確會令人暫時忘記煩惱，可以放鬆一陣

玩咗差唔多成個鐘後，手上仲剩番十個硬幣左右，邱茗然諗緊要點樣先可以用埋手上嘅代幣

「識唔識玩呢個？」邱茗然指住喺入口附近嘅兩要大枱

「點玩？」殷書賢見就見過，但佢就冇實際玩過，「係唔係拋過去就得？」

「將個coin掉去彩虹嘅顏色，掉中就有獎啦！」邱茗然講道，隨即拋出手中嘅一個硬幣，但可惜硬幣掉咗喺空白位，「呀⋯」





殷書賢一直望住邱茗然玩，但只見佢好努力咁拋咗好幾個都唔中，又或者只係贏咗啲細獎

「你淨係贏細獎就滿足啦？」殷書賢望住邱茗然滿足嘅笑容不解咁問，「既然要攞獎，唔係應該想要大獎之類？」

「你估講咁易呀？好難㗎！」邱茗然對眼前呢個從來唔嚟呢啲地方玩嘅人沒好氣咁講道，「又要中位唔擲界好難㗎！要啱啱好落喺中間！」

「你亂掉梗係唔中。」殷書賢無奈咁講道

「你講到咁易，你掉呀！」邱茗然唔忿氣咁塞咗五個遊戲幣到殷書賢嘅手中





殷書賢拎起一個幣，望住眼前滿滿嘅彩虹，思考一陣要點掉、掉邊個位之後，就將拎喺手上嘅遊戲幣拋出去

「噹噹噹噹噹！」職員拎起一旁嘅鈴搖起上嚟，將咪拎到嘴邊，「中獎啦！」

「嘩⋯！」邱茗然目瞪口呆咁望向殷書賢，然後視線落喺綠色範圍嘅遊戲幣，「你點樣隨手一拋都中㗎⋯！好勁呀⋯！」

「你可以揀架上面嘅公仔呀～」職員講嘢嘅時候都有啲激動興奮

「你揀。」殷書賢望向邱茗然，又對架上嘅公仔抬一抬下巴，「你要邊個？」





「我、我揀呀？」邱茗然訝異咁瞪大眼望住殷書賢，「但個獎係你中⋯！」

「我點睇都唔似要攬公仔嘅人。」殷書賢講道，「你揀啦。」

「真係⋯？」邱茗然挑起眉，打算比殷書賢反口嘅機會一樣，「咁⋯我真係揀㗎啦⋯？」

「揀啦。」殷書賢肯定咁點頭

「要嗰個兔仔啦～」邱茗然指住中間嗰層嘅其中一隻粉紅色兔仔，「唔該！」

職員拎咗一隻全新、用膠袋包住嘅公仔比邱茗然，邱茗然雙手將公仔遞比殷書賢：「嗱！」

「送比你。」殷書賢將公仔推番比邱茗然，「我唔攬公仔。」

「咁好人？我⋯真係唔會同你客氣！」邱茗然臉上掛上燦爛嘅笑容，今日應該係佢成個聖誕假入面最開心嘅一日





「得啦，唔洗客氣，我要放鬆嘅感覺就夠，禮物就你要啦。」殷書賢見到邱茗然笑起嚟，佢都跟住佢露出笑容

「不過你真係好勁！第一次玩就中獎！」邱茗然瞪大眼講道，羨慕同仰慕般嘅感覺從講嘢嘅語氣中滲出嚟，「好厲害！你真係全能㗎⋯！？」

殷書賢從邱茗然嘅眼中，感覺到邱茗然嘅開朗活潑、對自己啱啱嘅小幸運而產生嘅仰慕感，可能係男仔想要嘅一種自豪感之一

「你係唔係要番去溫書啦？」邱茗然突然間問出一個會令氣氛冷卻嘅問題

「轉話題轉得好快。」殷書賢無奈地講道，然後拎出手機睇時間，「不過都差唔多，要番去食飯。」

邱茗然點點頭，行去車站嘅時候，邱茗然緊緊地將公仔抱實喺懷中，心裏嘅激動仍然未能平伏落嚟

「今日，有冇稍微輕鬆啲？」邱茗然攬住公仔，微微側着頭望向殷書賢問道





殷書賢轉頭望向邱茗然，但只係定睛望住邱茗然，冇開口回答啲咩

「唔⋯即係點？係唔係佢唔開心？佢會唔會覺得好幼稚？處女座唔係最討厭幼稚嘅事咩⋯？」邱茗然見殷書賢沉默唔出聲，心入面有啲慌張，怯怯地對殷書賢開口：「唔、唔開心？」

「開心⋯」殷書賢垂低頭，微微點一點頭，垂低頭嘅佢又偷望邱茗然一眼

「你會唔會覺得，好幼稚好討厭⋯？」邱茗然又遲疑咁問道，問出口等待回答嘅時候，心臟緊張地一縮一縮，「處女座⋯好似都討厭呢啲事⋯」

「都唔係話一定係討厭，都係⋯睇人啫⋯」殷書賢講到後半句嘅時候忽然窒咗一下，然後望住邱茗然：「我覺得，呢種幼稚同你本來嘅性格都好夾⋯嗯⋯」

「睇人嘅話即係同我係Okay⋯？」邱茗然因為愕然而稍微瞪大眼望住殷書賢，「有啲開心⋯！」

殷書賢有啲難為情咁撇開臉，邱茗然望住佢嘅側面留意住佢嘅微表情

「耳仔好似⋯有啲紅⋯」邱茗然耷低頭，心入面覺得有啲可愛又有啲怕醜亦有啲緊張，「反差好可愛⋯！」





「咳⋯差唔多要番去。」殷書賢望一望時間，唔等邱茗然開口佢就轉身行

「哦⋯！」邱茗然攬住兔仔公仔小跑追上殷書賢，行到殷書賢身後嘅時候佢就放慢咗腳步，冇直接行到殷書賢嘅身旁

殷書賢覺得好似有人拉咗佢嘅書包一下，佢發現邱茗然唔係行喺佢隔離

「你行喺我後面做咩？」殷書賢回頭望一眼，望住邱茗然鬼鬼祟祟咁行喺佢後面

「冇呀～」邱茗然即刻好似咩都冇發生一樣，自然咁行喺殷書賢嘅身旁，佢偷偷地仰後望一眼殷書賢嘅書包前隔：「嘻嘻⋯佢幾時會發現我偷偷地掛咗個珍寶珠吊飾喺度呢～」




IG Link: https://www.instagram.com/nd_cotttoncandy/?hl=zh-tw