【校園】想成為您的治癒: 130. 放縱

兩人安靜地各自做自己嘅功課，互不打擾；邱茗然偶爾抬一抬頭、鬆一鬆筋骨，目光會自動地落喺殷書賢身上

「好少會見到佢著便服，對上一次好似係未係好熟嘅時候⋯」邱茗然托住臉拎住筆

每次見到殷書賢戴眼鏡，邱茗然永遠都會覺得佢知性又斯文，完全係一睇都feel到佢讀書勁

「最近佢好似成日都戴住眼鏡⋯放學嗰陣都係⋯」邱茗然喺心裏講道，「好似係自從我話佢戴眼鏡好斯文之後⋯唔係唔係！點會呢？」

邱茗然調整好狀態之後，又坐好個人開始做功課，一諗到做晒功課就可以去玩，再攰都會即刻有動力去做





時間慢慢流逝，冬天嘅日落都比平時早，5點半之後，太陽就慢慢落下，拉起夜晚嘅序幕

「呢兩份都做完。」殷書賢打開schedule book，功課都已經做得七七八八

呢個可以話係殷書賢嘅好習慣，放假頭兩、三日就會做晒所有假期功課，然後其他時間佢就可以用嚟溫書，又或者可以做自己嘢

「搞掂啦！」邱茗然輕鬆咁講道，笑容都略帶點倦意，「今日要做嘅功課都搞掂啦～」

邱茗然拎起手機望一望時間，然後望向殷書賢，但殷書賢卻疲倦咁推起眼鏡捏住鼻樑





「你唔舒服呀？」邱茗然邊收拾枱上嘅嘢邊關心道

「唔係⋯只係計太多數⋯有啲攰⋯」殷書賢嘅聲線裏都夾雜住倦意，「仲要諗今晚食咩⋯番到去又再溫書⋯」

「學霸嘅生活真係辛苦⋯刻苦耐勞⋯」邱茗然慨嘆，佢真係佩服殷書賢可以日日咁樣生活

「要人地追唔上嘅好成績，就要付出。」殷書賢都已經習以為常，至少佢嘅高中生活一直都係咁樣與書為伴

「咕～」邱茗然嘅肚忽然間叫咗一聲示意比佢知肚餓，邱茗然尷尬咁笑一笑，「嘻嘻⋯有啲餓⋯」





殷書賢眼見邱茗然一臉尷尬咁笑，佢都笑咗一笑，邱茗然輕輕抿唇，嘗試性質咁開口問：「唔⋯你餓唔餓呀⋯？要唔要一齊食嘢⋯？」

「少少。」殷書賢微微點頭，其實對於邱茗然一齊食嘢嘅提議佢打從心底覺得佢冇拒絕嘅理由

⋯

「飽晒～」邱茗然滿足咁大步行出麥當勞，食到啱啱炸起嘅薯條令佢超滿足

「嗯⋯」殷書賢微微點頭，就算食完飯都好，佢都係有啲攰

殷書賢將身上嘅外套除咗落嚟，入面只係著住短袖衫，邱茗然嘅目光偶然咁留意到殷書賢嘅右手上都有傷痕

「右手，受傷啦。」邱茗然指住殷書賢嘅右手前臂講道

「試下啫，不過唔順手。」殷書賢毫不在意咁聳肩





「冇Miss Hui check住你，你就又放肆啦？」邱茗然瞇起眼，從佢嘅眼神同表情中，完全睇得出佢對殷書賢啱啱講嘅嘢嘅不信任

「喺屋企太大壓力啦⋯溫書都好辛苦，個腦根本記唔到嘢，只可以咁樣⋯」殷書賢苦笑道，然後佢又對邱茗然解釋，「放完假就考試，一直咁樣記唔到嘢唔得⋯我再考唔到第一，我媽真係殺咗我⋯」

邱茗然望住殷書賢，佢成個人就好似為讀書而生一樣，生活中除咗功課，就只要溫書、第一名，仲有醫學院作為目標

殷書賢嘅倦容已經擺到喺面上，但絕對唔係只係辛苦咗一日而有嘅疲憊⋯望住殷書賢嘅無奈，邱茗然都好無奈

「我都話咗，第一名一定會係屬於你⋯！你唔好擔心！」邱茗然用最直白嘅方式表達作對殷書賢嘅能力嘅相信，亦係想比殷書賢嘅鼓勵，「唔好覺得自己做唔到，一定要覺得自己做得到！」

「陣間番到去，我淨係希望書上面嘅字唔好離開書，唔好記唔到入腦⋯」殷書賢無奈地笑道，但其實佢已經有預感佢今晚實要用鎅刀幫佢一把，令佢可以溫到書，「呢啲時候真係唔可以再跌成績⋯」

「唔會㗎！你唔好比自己咁大壓力嘛⋯」邱茗然拍一拍殷書賢嘅膊頭，然後輕皺起眉頭又講道：「去放鬆下再溫書都唔係錯事，點可能由朝早開始一直溫書到夜晚？」





「邊可能？就算溫咗十個鐘，只要一拎起手機，我媽就叫我溫書，點可能打機⋯」殷書賢搖搖頭，「今日計太多數，個腦實晒⋯今晚溫唔到同數有關嘅嘢⋯」

「咁⋯平時冇得放鬆嘅話，咁今日唔係一個好機會咩？」邱茗然靈機一動，拉住殷書賢停喺原地，「既然壓力大、個腦實晒，就一定要好好放鬆開心下呀！」

「吓？即係點呀？」殷書賢下意識就提出佢嘅不解

「即係我地宜家去玩一陣先再番去溫書呀～」邱茗然興奮咁笑着講出佢嘅提議

「吓？宜家！？」殷書賢聽到後一臉震驚

「係呀！」邱茗然用力點頭，理直氣壯地講道：「反正你宜家番到去繼續溫書都記唔到入腦㗎啦！去減下壓啦！聖誕節點可以淨係用嚟溫書咁嘥？」

「但係⋯」「唔好但係啦！行啦！」

殷書賢仲猶疑緊嘅時候，邱茗然二話不說拉住殷書賢跑起嚟，去到播住嘹亮嘅愉快童真音樂、五光十色都眼花繚亂、放眼望去全部都係小朋友嘅歡樂天地





殷書賢下意識就皺起眉頭，佢好少嚟呢啲又嘈又多小朋友嘅地方，細個嘅時候都冇咩機會嚟呢啲地方

「你認真㗎？」殷書賢喺邱茗然邁步要行入去嘅前一秒伸手將佢拉住

「吓？梗係認真啦。」邱茗然認真咁點頭，然後又想邁步行，「如果唔係做咩要行到嚟呢度？」

「但我地兩個高中生咁大個人，行入去好似唔係幾好⋯！」殷書賢又拉住邱茗然阻止佢

「你冇嚟過呢啲地方咩？好正㗎！」邱茗然興奮咁講道，「唔怕㗎！唔尷尬㗎！」

「真係冇。」殷書賢眼見邱茗然咁興奮，佢又唔係幾想掃佢興

「放心啦～呢間唔貴，代幣1蚊1個～」邱茗然豎起手指公比咗個like，「Okay㗎！」





「好，咁信你。」殷書賢思考咗一下之後點頭




IG Link: https://www.instagram.com/nd_cotttoncandy/?hl=zh-tw