【校園】想成為您的治癒: 132. 臨界點

殷書賢望住眼前好厚一疊嘅past paper就覺得頭痛，不過眼前嘅唔係等佢做，係已經做好晒、計好晒分嘅past paper

「好似⋯都係有少少跌⋯」殷書賢皺起眉頭，望住自己past paper嘅成績，「好似上唔番以前嗰個成績⋯」

成個聖誕假期，殷書賢真係每日都係溫書，因為佢一早就做好晒所有功課，剩低嘅日子亦冇特別出去邊度

「算啦⋯沖涼先⋯」殷書賢望一望時鐘，都已經就嚟一點

當佢將外套除去，就會見到手上新造成嘅傷痕，冇人檢查令佢可以毫不猶疑咁拎起鎅刀，又喺手上留下唔應該有嘅痕跡





媽媽拎住杯水行入殷書賢嘅睡房，見到枱上一大疊嘅past paper，就忍唔住手一樣行上前掀兩掀

「穩唔穩入U呢⋯？呢個分數入醫科都應該實可以。」媽媽順手就拎起比殷書賢拎咗出嚟嘅DSE mock成績結果，即刻就滿意咁笑，「全部都有星。」

殷書賢沖完涼行出嚟，一推開房門就面露不悅

「書賢，mock考得唔錯喎～全部都有星～」媽媽頓時眉開眼笑，但殷書賢默默伸手將份成績結果拎走，「你DSE都要keep住呢個水準。」

「嗯。」殷書賢敷衍咁點頭，然後將枱上媽媽掀過嘅嘢都疊番好，心裏嘆氣道：「唉⋯又係咁啦⋯」





殷書賢成個聖誕假，只要喺屋企溫書，媽媽就會入嚟問長問短，什至只係入嚟望兩眼又行番出去

唔係「食唔食生果？」就係「溫緊書呀？」再唔係就係「就嚟考試啦，你比心機溫書。」邊有辦法日日喺咁樣嘅環境下溫書都嗰崩潰？

「我睇過人地每科嘅收生平均啦，你mock考到呢個分數嘅話，一定入到醫學院！」媽媽激動咁講道，但殷書賢卻係一臉平靜、唔感興趣嘅樣，「你同我比心機考，DSE我都要見到咁多粒星！」

「你日日講住唔悶㗎咩？」殷書賢開始覺得煩躁，「日日都聽住好攰。」

「你有幾攰？夠我日日擔心你呢樣嗰樣咁攰？」媽媽理直氣壯咁反問殷書賢，「又要擔心你成績，又要擔心你考唔考到大學，又要擔心你嘅前途，你番個學上個堂考個試可以有幾攰？」





「又係呢啲廢話⋯」殷書賢都唔想答佢，佢心知媽媽嘅理直氣壯，雖然有時覺得係錯，但佢都知反駁冇咩意思，「你唔去番下學、日日都測驗、日日聽住DSE前DSE後？仲要一直受壓⋯」

「總之，你就同我考好DSE，考上醫學院，媽媽就最開心啦！」媽媽又笑住講道

殷書賢望住又無自顧自講完嘅媽媽行出房，佢有啲無奈同時又苦惱緊另一件事：「要點同佢講我打算到時大學讀Chem⋯？」

「佢實會極力阻止我⋯但其實我又唔係真係咁想讀醫⋯」殷書賢苦惱嘅係呢件事，佢好清楚知道講咗之後會有咩結果，「讀理學士都唔係真係咁差啫⋯」

⋯

喺聖誕後結束之後嘅第一個番學日，亦代表住距離考試嘅日子唔遠，大概仲有一星期多少少⋯

「早晨～」邱茗然上車，一如既往行到同一個位置，同樣對住比佢早上車又一定企呢度嘅殷書賢打招呼

「早晨。」殷書賢將擋喺臉前嘅筆記向下拉低





「你又係好努力咁溫書呀～」邱茗然笑道，抬頭望向殷書賢嘅時候，望住佢將右耳嘅耳機除落嚟，「咦～過咗成個聖誕，個珍寶珠都你冇發現到呀？」

「嗰晚番到去就見到，不過冇特登拆番落嚟。」殷書賢嘅書包就孭喺前面，吊飾仍然綁喺前隔嘅拉鍊扣上

「呢幾日都係溫書？」邱茗然望住殷書賢好似冇瞓過覺一樣嘅倦容，直覺就覺得係咁樣

「嗯，日日都喺屋企溫書，紅日嗰幾日出咗去溫書。」殷書賢講道

「好悶嘅聖誕⋯」邱茗然喺心裏無奈地道，淨係幻想一下都覺得好悶

每一日喺屋企溫書都係由起身開始，溫到夜晚瞓覺前一刻，咁多年嘅past paper都做勻晒，做到瞓覺嘅時候都係諗緊past paper嘅內容⋯

「咁樣過一個聖誕嘅話，我應該一星期都唔想再溫書⋯」邱茗然喺心入面痛苦咁講道





邱茗然抬頭望向殷書賢，發現殷書賢合埋眼好似瞓著咗一樣，邱茗然定睛望咗佢一陣就將視線移開望向窗外

「明明啱啱先放完假，但就好似冇放過假一樣咁攰都有嘅⋯」邱茗然喺心裏替殷書賢覺得辛苦，「第一名真係難做⋯」

⋯

「拎番聖誕假派嗰份past paper出嚟，今日對咗一份先。」

聖誕假後番到嚟，就要對番啲功課，雖然都係自己對，但都要認真計分，因為始終係喺考試前

「得番個幾星期，你地努力啦！最後一個考試啦！考好佢呀！」Miss喺開始對卷講題前第一件要講嘅事就係提醒大家就到考試

「又係呢句⋯聽咗一個朝早⋯」殷書賢都聽到有啲厭倦，由早會開始就好似洗腦一樣，每一堂都會提一提

殷書賢拎起紅筆等對卷，喺考試前嘅日子佢特別緊張，每堂話要對past paper、做past paper嘅時候，心臟都會噗噗跳





Miss逐題講解，殷書賢都好專心聽，唔會因為自己成績好好而驕傲唔聽書，佢肯定唯一可以保持成績好嘅方法就係努力同認真

另一邊廂，C班講緊啱啱做嘅堂上小測，其實都只係一個唔計分嘅練習

「咦～我終於拎到滿分啦呢題！」邱茗然正面帶笑容咁喺題嘅旁邊打個剔，「之前次次都差一兩分⋯今次終於中晒point！」

邱茗然因為呢個小小嘅進步而覺得開心，總好過一次都寫唔中point，一直冇進步

「圈低呢個先～免得番到去溫書又唔知點寫先拎得晒分⋯」邱茗然用綠色筆將題號圈起，「既然係咁，咁今晚番去就溫中文啦～」

邱茗然一直聽住Miss講答案，聽到一個計分嘅point又剔一下，聽到一個又剔一下，剔得愈多，邱茗然嘅心情就愈好

「睇嚟今次份卷嘅成績應該唔錯呢～」邱茗然暫時有少少滿意，「希望考試都考到咁唔錯就真係好唔錯啦～」








IG Link: https://www.instagram.com/nd_cotttoncandy/?hl=zh-tw