【校園】想成為您的治癒: 105. 物歸原主

「快啲落堂番去還番比佢⋯」殷書賢將邱茗然嘅冷衫摺好，佢托住額同時鬆一口氣：「好彩我冇著晒⋯」

「叮噹叮噹⋯叮噹叮噹～」

「終於落堂啦⋯！」邱茗然聽到落堂嘅鐘聲即刻打起精神，因為凍咗一堂之後終於可以拎番自己件冷衫

「茗然，你要等佢件冷衫呀？」許洛霏起身嘅時候問邱茗然

「咁梗係要拎番啦⋯！我都就嚟凍死啦⋯！」邱茗然哭喪著臉講道，「霏霏要唔要陪我拎？」





「可以呀～」許洛霏當然冇問題唔會拒絕，佢同邱茗然一齊喺黑板前經過嘅時候，許洛霏拉一拉邱茗然，「不過我諗唔洗等啦，佢都番到嚟啦～」

邱茗然望向窗外，殷書賢的確係上完堂番嚟，同張思群一齊行到番嚟課室

邱茗然行出E班嘅課室門口，拉住許洛霏嘅手向殷書賢嘅方向行咗兩小步，然後伸手示意要物歸原主

殷書賢一聲不吭，默默提手將冷衫還番去邱茗然嘅手中，邱茗然喺拉住許洛霏轉身番C班嘅時候細聲咁哼咗一聲

「難怪你有冷衫都唔著啦～原來拎咗人地嗰件～」張思群即刻笑住咁用手肘撞咗殷書賢兩下，「哎呀～」





「真係唔知係因為邊個撞到我，所以整跌咗件冷衫。」殷書賢淡淡地講嘅同時面帶微笑望向張思群

「呃⋯對唔住大佬。」張思群即刻無言以對，佢腦袋一轉，順便轉個話題，「你估下佢有冇都唔小心著咗你件冷衫上身先發現拎錯呀嗱～」

「冇興趣知。」殷書賢淡然地回答道

「你話呀，佢冇著過點知拎錯？」張思群好似唔識死咁仲問

殷書賢無視張思群，直接行到番埋位，見到冷衫整齊咁摺好放喺佢嘅枱面上；佢坐低喺位，眼尾瞄到有張memo紙喺佢櫃桶





殷書賢拎起memo紙，將對摺咗嘅memo打開，入面係邱茗然嘅抱怨：「差啲凍到結冰，最衰就係你」

「我都凍咗一堂」殷書賢喺memo紙上寫道，打算喺晏晝嘅Chem堂擺去邱茗然嘅櫃桶

「茗然你面好紅⋯！」許洛霏拉住邱茗然嘅手，同時探頭望佢

「尷尬啦尷尬啦！」邱茗然二話不說就直接比解釋，「尷尬死，著咗人地件冷衫⋯！」

「你話佢會唔會嬲呀嗱？」許洛霏突然嘅一問，邱落然即刻有啲擔心，「佢會唔會有潔癖？聽講處女座都有潔癖⋯」

「講到我好似好污糟咁⋯」邱茗然微嘟起嘴望住許洛霏，「佢應該唔會嬲嘅⋯」

早一步番到嚟課室嘅張萱淇望到邱茗然同許洛霏又細聲講秘密一樣

「佢地又講緊啲咩⋯？」張萱淇喺心裏諗道，「佢地好似講好多秘密咁⋯」





張萱淇心入面有啲鬱悶，自從邱茗然同許洛霏熟咗之後，許洛霏就將自己都比下去一樣

「但佢地又同一科，熟咗多啲嘢講都正常嘅⋯」張萱淇安慰自己講道，但下一秒又忍唔住嘆氣，「唉～」

張萱淇有啲唔甘心，好似比一個後嚟嘅人取代佢一樣，既然係最好嘅朋友，自然想成為第一時間知道對方消息嘅人

「唉～」張萱淇又嘆一口氣

⋯

「你得未？」趙遠寧起身行到謝澤謙嘅座位，佢發現殷書賢嘅座位空無一人，書仲放喺枱上面，「殷書賢人呢？上一秒佢仲喺度㗎。」

「一落堂即刻衝咗去廁所。」謝澤謙聳肩，「最近佢一到小息lunchtime就一定衝去廁所，放學之後更加唔洗旨意搵到佢個人⋯」





「佢梗係要去廁所啦，考試啦就嚟～」趙遠寧擺出一副睇穿殷書賢嘅表情，「佢又發癲咁溫書啦肯定，唔去定廁所點專心坐喺度溫書？」

「你幾分？啱啱派嗰份test。」謝澤謙比趙遠寧講一講成績，突然好奇問道，然後又指一指殷書賢嘅櫃桶細聲咁講道，「睇下殷書賢幾分⋯」

殷書賢從男廁行出口，將袖口鈕扣番好，將冷衫嘅衫袖拉番落嚟；喺經過班房嘅窗口嘅時候，殷書賢眼尾就見到自己個位圍咗一堆人喺度

「佢地圍住我個位做咩⋯？」殷書賢有啲無奈，插喺左邊褲袋嘅手默默地將袋中嘅鎅刀鎖番

「真係冇癮⋯掀去第12題睇下，我想睇下佢寫咗咩⋯」謝澤謙直接將卷掀後兩頁

「咳咳！」殷書賢喺佢地幾個好專心嘅時候行到趙遠寧同張思群身後咳咗兩聲

「嚇邊個？」張思群雖然好似好平靜咁問，但其實佢喺聽到殷書賢咳聲嘅時候即刻縮咗一下

「睇咩？」殷書賢問道，下一個瞬間就見到枱上嘅卷，「唔係要去食飯？」





「等緊你番嚟嘛。」謝澤謙幫殷書賢將小測卷放番入櫃桶，「宜家就齊人行得。」

「勁啦你，又考第一啦。」趙遠寧伸手搭住殷書賢嘅膊頭，「嚟緊聖誕節，有冇約人呀？」

「有呀。」殷書賢微微點頭，既然佢地想聽咁就稍微滿足下佢地嘅好奇心

「邊個呀？」「約咗邊個？嗰個呀？」「真係㗎？到呢個地步啦？」

「認真㗎？」「真係㗎殷書賢？」




IG Link: https://www.instagram.com/nd_cotttoncandy/?hl=zh-tw