【校園】想成為您的治癒: 106. 隱晦的溫柔

「約咗1月嘅考試，聖誕節喺屋企溫書。」殷書賢淡然嘅表情掛到臉上

「唉⋯」謝澤謙佢地即刻同一個反應，大家都反咗個白眼

「仲以為你真係約咗邊個⋯講到尾又係溫書⋯」趙遠寧無奈咁甩一下手，覺得自己真係信殷書賢講嘅嘢真係有啲蠢

「你地幾時中意講呢啲嘢？」殷書賢感覺佢身邊嘅人都有好大轉變一樣，由從不提戀愛話題到宜家個個都要八卦兩句

「我地又唔係你，你係戀愛絕緣體但我地唔係。」張思群即刻否認自己八卦呢件事，「唔係八卦，只係好奇下你。」





殷書賢搖搖頭，佢就不作回應啦，畢竟佢講咩都會比人反駁，但對戀愛事唔感興趣，的確係事實

張萱淇拉住邱茗然行到侍應指嘅位置坐低，邱茗然下意識留意多張萱淇兩眼

「你今日做咩又好似心情唔好咁嘅？」邱茗然小心翼翼咁提問，「好攰？唔舒服？」

「唔係呀⋯」張萱淇嘅視線從手機螢幕上移開，佢本來想問邱茗然今日轉堂嘅時候同許洛霏講咗啲咩，但佢又忍唔住猶疑：「我咁樣問，茗然會唔會唔中意⋯？但係⋯」

張萱淇喺內心掙扎咗一陣，最終喺餐飲拎到嚟放喺枱嘅時候，張萱淇開口：「係呢～啱啱轉堂嘅時候，你同許洛霏喺班房門口講咩？見你地笑得好開心。」





「唔⋯」邱茗然嘅臉瞬間泛紅，佢都唔知要由邊度講起先啱，要由跌咗冷衫講起，定係由佢發現冷衫唔係自己嗰陣講起？

「係我唔聽得嘅秘密⋯？」張萱淇即刻一臉失望，大概係對呢段友誼嘅失落

「成件事好複雜⋯！」邱茗然喺張萱淇再多諗前一刻再次開口，「總之總括而言，就係，喺唔小心嘅情況下交換咗冷衫，然後落堂交換番⋯！」

張萱淇聽到邱茗然略帶點焦急咁講嘅時候，本來黯淡落嚟嘅眼神又再次有光，果然邱茗然都係會願意同佢分享

「然後呢然後呢！？」張萱淇即刻緊張咁問邱茗然，「然後點呀？你有冇著到？」





「我上堂嗰陣係著咗先知唔係我件冷衫⋯」邱茗然耷低頭，耳根同臉頰都紅紅的，「因為我唔噴止汗劑⋯」

「佢知唔知你著過佢件冷衫呀？」張萱淇問道

「應該就唔知啦⋯」邱茗然猶疑地講道，因為佢冇同殷書賢講，「但佢應該估到我著過上身，如果唔係點可能發現？」

邱茗然耷低頭雙手掩住臉，如果殷書賢問佢有冇著過嘅話佢真係會尷尬到想掉頭跑：「哎呀～好煩呀，佢應該唔會有潔癖掛⋯？」

「佢連比你會嚟遮太陽都唔介意，又點會在意呢啲事呀～」張萱淇笑道，「果然都係人地嘅花生好食啲～」

「但好似得我覺得好尷尬，佢係完全一啲反應都冇！」邱茗然講道，「好似我好唔正常咁⋯」

「佢平時對你係唔係都係咁嘅反應？如果係嘅話，咁可能佢只係冇咩呢類觸覺啫～」張萱淇微微聳肩，「你都識講啦，佢對讀書嘅嘢先會咁上心。」

「係啫⋯但係我係真尷尬⋯」邱茗然輕拍着自己嘅額頭





「上次你唔係話佢誤會咗你有男朋友之後即刻就唔理你，但後來知係誤會又即刻理番你咩？」張萱淇仲記得邱茗然同佢講嘅嘢，「佢會唔會其實都對你⋯有啲⋯」

「唔知，冇特別諗，佢好難觸摸⋯」邱茗然搖搖頭，「有時有啲忽冷忽熱咁⋯我再諗咁多，大腦都要爆⋯」

「我聽起嚟嘅話⋯唔覺佢有啲似隱晦嘅溫柔咩？」張萱淇輕皺起眉頭，托住下巴一臉認真咁講，「不過都要睇下你係唔係佢特別對待嗰個⋯」

邱茗然真係自然咁思考起嚟：「其實我冇覺得自己係特別嗰個就係啦⋯雖然佢比人嘅感覺唔似一開始咁冷淡，但應該係因為熟咗嘅緣固⋯」

「如果以前師兄同我地同級嘅話，我諗你可能都已經出咗pool啦～」張萱淇托住下巴慨嘆道

「唔⋯冇咩直接嘅關係⋯唔會一齊嘅人點都唔會一齊㗎啦～」邱茗然微微聳肩表示已經唔在意，「會一齊嘅話，就算講咗再見，最後都會再見然後一齊。」

「你嘅意思係你中意佢啦？」張萱淇跳過咗好多意思接收到呢個完全冇關係嘅意思





「吓⋯？」邱茗然呆咗一呆，大腦轉動思考完之後笑問：「你係點樣簡化略過咁多嘢得出呢個結論？」

「唔⋯大概係咁樣差唔多啦～」張萱淇諗咗一諗之後講道

「唉⋯你同霏霏一樣，成日都將我講嘅嘢扭曲到變晒意思⋯」邱茗然無奈咁反個白眼，「我同佢講我拎錯冷衫，佢即刻就好激動⋯！」

「你同咗佢講啦已經？」張萱淇嘅神經因為邱茗然冇心嘅一句而觸動到

「吓？佢上堂坐我後面咋嘛～」邱茗然愣一愣，「佢問我做咩凍都唔著冷衫嘛，咁我咪同佢講件衫唔係我㗎囉～」

「哦⋯」本來一臉興奮嘅張萱淇，宜家態度又冷淡咗落嚟

「唔⋯做咩呀⋯？」邱茗然即刻冇咗啱啱嘅興致同笑容，心裏有啲唔知點算：「最近淇淇都係咁樣一時開心一時又唔開心⋯」

「你宜家同許洛霏熟咗咁多，你好似有咩都同佢講咗先咁⋯」張萱淇將自己嘅心聲講咗出嚟，但邱茗然顯然唔太同意佢呢個講法，「以前明明都係我最快知，但宜家有時係佢知道咗，你地講得好開心之後我先知⋯」





「做咩咁突然⋯？」邱茗然有啲手足無措，面對張萱淇突如其來嘅抱怨，邱茗然唔知要點樣用咩反應去回應先係

「唔突然㗎啦⋯你冇留意到啫⋯」張萱淇微微低頭，佢講嘅嘢令邱茗然頭上打咗個大問號，「好似你地講咗好多我唔知嘅事咁⋯」

「唔係呀⋯我都有同你講呀⋯」邱茗然心裏覺得有啲無辜，「我都唔係唔同你分享呀⋯殷書賢嘅事，最近發生嘅嘢我都有話比你聽。」

「以前明明都係我第一個知，宜家你有咩都係同咗許洛霏講先⋯」張萱淇又講道，佢嘅心情變得有啲沈重，連帶佢地兩人之間嘅氣氛都好沉重，「明明我地係好朋友呀⋯」




IG Link: https://www.instagram.com/nd_cotttoncandy/?hl=zh-tw