【校園】想成為您的治癒: 104. 冷衫

「我點知呀！」邱茗然冷靜咗一下後講道，「我知佢對讀書一定有好感囉，不過我唔覺得佢有特別抗拒我。」

「佢唔抗拒嘅話即係你仲有機會啦～」張萱淇樂觀咁諗，「放心啦！你中唔中意佢都好，我都實支持你㗎！」

「我冇話我係中意佢！」邱茗然沒好氣咁伸手細力打張萱淇一下

邱茗然偷偷咁回頭望向小食部門口，見到殷書賢同謝澤謙仍然企喺小食部門口，邱茗然莫名其妙咁喺心裏對自己解釋：「我只係覺得佢有時幾體貼，冇特別意思⋯而且佢好明顯淨係想讀書。」

⋯





「茗然，你行未呀？」許洛霏從櫃桶拎出地理書，攬住書行到邱茗然嘅座位，「好快就打鐘啦。」

「哦哦，行得啦！」邱茗然急忙拎起枱上嘅嘢，拎起地理書，將筆袋放喺地理書上，冷衫都唔摺，一堆咁拎起就行

「都仲有⋯分半鐘先打鐘，你唔洗咁趕～」許洛霏望一望手錶

「你話好快打鐘嘛！」邱茗然趕到都有啲上氣唔接下氣咁

佢地行到去E班嘅課室，邱茗然自然咁望向佢陣間上堂坐嘅位置，殷書賢仲坐喺位拎住cal機計緊數





「咳咳⋯！」邱茗然行到殷書賢嘅座位，裝模作樣咁咳兩聲，許洛霏見到都忍唔住偷笑，「借個角比我擺住嘢先。」

「嗯，擺。」殷書賢專心咁溫緊書，聽到邱茗然嘅要求後點一點頭

邱茗然將手上拎住嘅嘢都放低喺殷書賢嘅枱邊，書脊貼住殷書賢嘅手肘

「行啦殷書賢，你唔好計住啦⋯」謝澤謙輕輕咁推一推殷書賢

「得啦行啦行啦。」殷書賢見謝澤謙催佢，時間又真係差唔多，即刻好快手咁執走枱上嘅嘢





佢右手拎住書同筆袋，轉身從右邊離開座位，伸出左手想拎埋放喺枱左邊嘅冷衫

「行。」張思群側側身經過殷書賢身後嘅時候唔小心同殷書賢有輕微嘅碰撞

殷書賢撞到張枱，枱向左邊升起離地咗一下，佢枱上嘅冷衫同邱茗然嘅嘢跌咗落地

「嘖⋯」殷書賢嘅臉上寫住不滿兩個字回頭望張思群

「我係唔係同你有仇⋯？」邱茗然望住自己無辜被牽連嘅物品，無奈咁嘆一口氣問殷書賢，「點解次次都整跌我啲嘢⋯」

「佢撞我。」「叮噹叮噹⋯叮噹叮噹～」

殷書賢見打鐘，即刻彎腰去執起自己件冷衫，拎埋冷衫一齊去上堂

「唉⋯我好可憐呀⋯」邱茗然望住自己喺地上嘅冷衫同書扁起嘴，但都係彎腰執起，拍一拍件冷衫就坐低等上堂





邱茗然頭頂嘅風扇好大風，佢瞇起眼望向外面嘅電制，見到風力較到最大

「邊個較到咁大呀⋯？」邱茗然忍唔住雙手抱住自己，頭頂個風扇吹到佢頭髮都亂晒，今日嘅天氣咁啱下降，「好凍呀⋯！」

「哈啾！」坐啾邱茗然後面嘅許洛霏先一步打咗個乞嗤，「哈啾！」

「你要唔要紙巾呀？」邱茗然回頭細聲咁問許洛霏，「你都覺得凍係唔係？」

「阿sir啱啱入嚟嗰陣將課室嘅風扇較晒做一號，好大風⋯」許洛霏拉一拉邱茗然嘅裇衫，「我早知拎埋冷衫過嚟啦⋯！」

邱茗然見許洛霏冇著冷衫又咁凍，佢即刻就舉手，阿sir眼尾瞄到之後就望向邱茗然

「可唔可以閂細啲個風扇？好大風好凍⋯」邱茗然指住頭頂嘅風扇





「真係呀阿sir，可唔可以閂細啲？」其他同學原來都有同樣嘅想法，喺邱茗然提出後都紛紛表示凍

「你地凍就出聲嘛⋯！」阿sir即刻行去電制前將風扇風力較細，「17、8歲啦，凍就出聲嘛～唔洗死忍，當自己仲係7、8歲呀？」

「得救啦⋯！」許洛霏揉一揉鼻尖，「茗然你真係好人呀⋯！」

「因為我都覺得好凍⋯」邱茗然笑一笑講道，「你又冇冷衫，陣間凍親都唔好嘅～」

「嘻嘻⋯」許洛霏覺得邱茗然呢個舉動令佢有啲暖心，佢用筆輕輕地戳一戳邱茗然，「你有冷衫，凍可以著嘛～」

邱茗然拎起佢一直放喺大髀上搭住嘅冷衫著上，但啱啱著到上身拉好，邱茗然就不禁皺起眉頭：「等陣先⋯！咁奇怪咁嘅⋯？」

殷書賢邊聽住Miss Li嘅講解，邊拎起摺好嘅冷衫，佢嘅雙眼望住書頁，耳仔聽緊Miss Li講嘢，手套緊入冷衫嘅手袖入面

「嗯⋯？」殷書賢嘅雙手套咗入冷衫嘅衫袖中，喺要拎起套上身嘅之際，就覺得有啲不尋常，「個袖咁緊嘅⋯？」





殷書賢將衫袖拉番出嚟，然後手又再套多次入去：「咁窄嘅個袖⋯？」

殷書賢嘅大腦思考咗0.1秒後，一下子將冷衫除番落嚟，捉起冷袖嘅後領

「S⋯？」殷書賢望住完全唔可能係佢著嘅碼數，大腦好快咁轉動思考，「件衫⋯」

「你做咩又除番件冷衫落嚟？你想陪我一齊凍呀？」許洛霏望住邱茗然搞笑嘅舉動，笑一笑問道

「唔係呀⋯！」臉頰通紅嘅邱茗然以小幅度回頭望向許洛霏，許洛霏不解嘅同時，邱茗然拎起釘喺冷衫後領嘅碼數牌：「呢件冷衫⋯」

「唔係我㗎⋯！」「唔係我㗎⋯」

「唔係呀嘛⋯！」許洛霏一臉難以置信咁瞪大眼，手掩住張大嘅嘴





「難怪一著上身就一陣止汗劑味⋯！」邱茗然又激動又尷尬咁對許洛霏講道

邱茗然諗起自己啱啱將件冷衫著咗上身，感覺件衫好寬鬆所以覺得好奇怪

但更令佢羞恥感上升嘅係，佢啱啱著咗上身後，因為聞到陣平時喺自己冷衫上唔會聞到嘅味，所以拎起衫領湊近鼻邊聞咗一次

「好似變態呀⋯！」邱茗然簡直想搵個窿匿埋冷靜下，啱啱撲鼻而嚟嘅止汗劑香味好似喺佢個大腦入面散唔走一樣，「唔好再諗啦救命呀⋯！」

「應該係啱啱快手得滯拎錯咗⋯」殷書賢望住手上嘅冷衫有啲唔知點算好嘅感覺，佢望向張思群，盯住佢嘅後腦勺，「最衰就係你。」

「嗯？」張思群一下子回頭望，然後摸一摸自己嘅後腦勺，「啱啱好似寒咗一下咁嘅⋯？算啦，多心多心⋯」




IG Link: https://www.instagram.com/nd_cotttoncandy/?hl=zh-tw