【校園】想成為您的治癒: 87. 食糖水嗎？

成張枱都震咗一下，本來寫到一半嘅字因為筆尖一滑，喺簿上畫咗一道長長嘅黑色線

「咩事？」殷書賢忍唔住皺起眉頭，往佢嘅右邊望去

「我仲以為我已經縮得夠出添！」邱茗然左手拎住塗改液，右手摸住自己嘅後腦勺，自己喺心入面自言自語講道，「好痛呀媽咪！」

殷書賢覺得啱啱呢個撞頭嘅場境好似似層相識，好似親眼見過一樣，稍微回想一下就忍唔住笑

「你偷笑啲咩⋯？」邱茗然一坐起身就見到殷書賢自己喺度笑，即刻好奇又不滿：「自私笑？」





「笑之前有個人喺我個班拎簿，然後個頭撞到簿櫃。」殷書賢以平靜嘅聲線講道，手掀書頁，睇起嚟完全唔似有咩感覺

邱茗然即刻就唔覺得好奇，因為殷書賢100%好明顯係笑緊佢，佢就唔好奇殷書賢笑緊啲咩

「我上次只係唔小心咋⋯！一時冇留意先會撞到⋯」邱茗然即刻反駁殷書賢，「你平時唔係好專心㗎咩⋯！做咩見到我㗎⋯！」

「咁啱望黑板就見到你行過。」殷書賢望一望cal機顯示嘅答案，將答案寫喺簿上，「然後就見到有人撞到頭。」

「我都要尷尬死啦⋯！」邱茗然淨係諗番起都覺得尷尬，耳仔同臉頰又紅又熱，「你仲好意思笑我⋯」





「我邊有？」殷書賢望一望邱茗然，見到邱茗然一臉不滿咁鼓起兩泡腮，佢默默咁拎起cal機計下一題數，「我都冇笑你。」

「你心入面冇笑我？」邱茗然雙手交搭放喺枱上認真咁望住殷書賢問道

「我做咩要笑你？」殷書賢無趣咁反問邱茗然

「點知你～」邱茗然打開塗改液嘅蓋，然後將寫錯嘅字塗咗，「不過就算你想笑都唔好笑出嚟，我會尷尬⋯」

邱茗然等塗改液乾咗之後又繼續寫未寫完嘅essay，其實佢唔太想諗起嗰次喺人地課室撞到頭嘅經歷





「唔會。」殷書賢有啲無奈，但佢都係答應咗邱茗然

「呀⋯唔想寫呀⋯」邱茗然邊寫邊低聲抱怨，佢望殷書賢一眼，佢仲好努力咁睇緊火星文解題，「不過，至少我睇緊中文⋯」

⋯

張萱淇拎住杯凍水行番入房，啱啱坐低喺櫈上打算飲一啖水，放喺電腦隔離嘅手機就大聲咁響

「等陣等陣！」張萱淇對住手機講嘅同時迅速咁拎起手機，好快咁吞一啖水，「咩事呀⋯！」

「喂？咩事呀？飲緊水比你嚇死⋯」「出唔出嚟食糖水呀？」

電話裏頭傳嚟李雨揚嘅聲音，聽起嚟有少少心情唔好

「幾點？太夜我就唔出啦⋯」「宜家，我喺你屋企附近。」





「吓！？」張萱淇一臉震驚，呢個人咩發生咩事，「呃⋯」

張萱淇望住枱上嘅書，佢仲準備溫中文，但面對李雨揚嘅邀約，佢不禁猶疑起嚟要唔要揀溫書唔出去

「點呀？你出唔出嚟？」李雨揚見張萱淇冇講嘢就追問道，「我就嚟行到㗎啦～」

「吓！？咁、咁⋯」張萱淇即刻有啲慌張，左顧右盼，要換衫先定執嘢先，「等我一陣⋯！」

「唔洗急，你慢慢啦～」電話裏傳嚟李雨揚輕輕一笑嘅聲音，佢悠悠閒咁對張萱淇講，「喺你樓下等你。」

張萱淇換好衫孭個袋就出門口，佢一落到樓下就見到李雨揚企喺度放空發呆

「喂！」張萱淇行到李雨揚嘅面前，一個天真爛漫咁揮手，「行啦～」





李雨揚轉身就行，張萱淇跟上李雨揚嘅步伐，側着頭探頭望李雨揚

「今日做咩咁好約我食糖水？仲要嚟到呢邊先約我。」張萱淇抱住一絲期望問李雨揚，佢有佢想聽到嘅答案

「突然想約你咪約你。」李雨揚帶着笑容聳肩講道

「呿⋯仲以為係發生咗啲咩好特別嘅事添～」張萱淇笑一笑道

「你同我最friend嘛～」李雨揚對張萱淇笑道

「做咩突然派卡比我⋯？」張萱淇一怔，心臟都比佢嚇到噗噗跳，「派咩好人卡呀⋯」

「吓？我冇派卡呀～就只係咁樣講。」李雨揚一笑，張萱淇就覺得李雨揚有啲咩唔開心，「邊有咁多卡派比人呀～你估真係咁多人中意我，我又中意咁多人咩～」

「你今日到底做咩呀？你係唔係有咩唔開心？」張萱淇忍唔住問出口，佢直覺覺得係有啲咩事發生，令李雨揚今日咁反常





「呃⋯其實今日我冇特別想去食糖水，只係想搵人講下嘢⋯」李雨揚忽然咁講，張萱淇都唔知比咩反應佢先啱，「哎～我呢啲人注定唔可以拍拖啦～」

兩人朝住糖水舖嘅方向行去，但去到糖水舖嘅門口冇行入去，反而行到附近公園坐

「你今日又見過你個ex呀？」張萱淇猜測道，佢唔知兩人以前發生過咩事，但佢知李雨揚對清菁嘅心，因為太明顯啦

兩人行上比較大型嘅滑梯組合架，踩上又矮又扁嘅樓梯坐喺滑梯口，上方有一個屋頂造型嘅簷蓬遮住

喺呢個時間，公園冇小朋友，冇其他人，只有佢地兩人喺度，呢種寧靜令人更容易講出藏喺心底嘅心事

「應該冇女仔會中意我呢種人，對個個都一樣咁，但其實我又唔係真係對個個都一樣⋯」李雨揚微微耷低頭，把玩着手中嘅手機，「至少對佢唔係，我都知佢同其他人唔同，唔⋯好似⋯我對你同對其他人一定有分別，唔會真係一樣⋯」

張萱淇安靜咁聆聽，李雨揚唔係一個會成日同佢講呢啲心事嘅人，只因李雨揚呢個人太雲淡風輕，有緣就留冇緣就算





「今日清菁比咗個答案我，話我知當初點解要分手⋯佢覺得同我呢種人一齊⋯好冇安全感⋯」李雨揚講每一句嘅時候，都要回想起見清菁嘅時候清菁嘅表情、語氣，一旦回想，李雨揚就覺得唔好受，「應該女仔都唔會中意我呢種人，我唔會為邊個改變，唔會真心中意邊個，對所有人都係咁⋯佢講咗太多太多⋯」

李雨揚靠住旁邊嘅欄杆，佢聽住清菁講出答案，解開李雨揚嘅心結時，李雨揚冇覺得鬆一口氣，反而係無法斷開嘅無力感一直湧出嚟




IG Link: https://www.instagram.com/nd_cotttoncandy/?hl=zh-tw