【校園】想成為您的治癒: 88. 借意
「你話呢⋯？女仔應該都唔中意我呢類型⋯」李雨揚望向張萱淇，佢嘅眼神中好似夾雜咗一絲倦意，「我呢種對所有女仔都好嘅⋯中央空調⋯」
「咁⋯可能都有人會中意你嘅⋯」 張萱淇自己咁講嘅時候莫名地有啲心虛，「宜家冇將來都有機會有呀，你啲自信呢李雨揚？」
「咁你中唔中意我？」李雨揚直接投球一樣問張萱淇
直勾勾嘅目光令張萱淇嘅心跳快到要衝出嚟一樣，張萱淇沉默起嚟，手心忽然出汗，佢都唔知要點答呢個問題
「講笑講笑～」李雨揚卻喺張萱淇認真思考嘅時候笑起嚟，「我地係朋友嘛，你值得中意更好嘅人～」
「嗯⋯我都覺得係⋯」張萱淇眼見李雨揚話係講笑，佢即刻擠出笑容附和，伸手輕推李雨揚一下，「我梗係值得更好啦⋯！」
「除咗清菁，應該真係冇人中意我咁嘅人⋯」李雨揚無奈苦笑，張萱淇都跟住苦笑，「戀愛真麻煩～」
張萱淇嘅雙腳微微曲起，手抱住雙膝，雙腳交叉着，佢望住李雨揚，李雨揚沉默不語
「只係你淨係望住清菁，所以冇見到其他人啫⋯」張萱淇冇打算講明自己嘅想法，所以佢只喺心入面講，就算李雨揚知道都冇咩意思
「我有檢討自己，不過改唔到就改唔到⋯」李雨揚聽到清菁講嘅嘢，佢放低咗啲又冇放低晒
「即係狗改不了吃屎⋯」張萱淇直接講重點，然後得到李雨揚一個嫌棄嘅表情
「好嘔心⋯講咩食屎唔食屎⋯」李雨揚連講嘢嘅語氣都係嫌棄緊
「幾啱你。」抱住雙膝嘅張萱淇雙腳微微離地前後搖晃着
「唉～不過我有時都覺得有你真好～」李雨揚對張萱淇一笑講道，「至少有人理下我又唔會嫌棄我⋯」
「我嫌棄冇同你講啫⋯」張萱淇無奈咁笑道
「中意人真係一件好煩嘅事，太早講可能人地未中意你，太遲講可能已經冇機會⋯好煩。」李雨揚自嘲地笑道，佢自己都覺得好麻煩
「未必所有嘅中意都要講出口先叫中意，只有自己知可以係中意，彼此都知道都可以係中意。」張萱淇微微耷低頭望住眼前嘅影子，橙黃色嘅路燈就好似照出佢嘅難過一樣
「你咁有想法呀？」李雨揚一笑，「幾時有中意嘅人㗎？咁熟都唔同我講聲呀～」
「好耐啦⋯」張萱淇露出淡淡嘅笑容，「不過嗰個人有中意嘅人啦～所以，我知我冇機會啦⋯」
「你唔比佢睇到你嘅好，佢點會將目光放喺你度？」李雨揚反問張萱淇，張萱淇默默咁望李雨揚一眼，然後笑一笑
「冇feel就係冇feel啦⋯」張萱淇嘅目光喺李雨揚臉上停留兩秒後緩緩地移開，「而且愈做得耐朋友，愈唔捨得失去⋯」
張萱淇嘅指尖一直喺地上隨意畫着，佢對李雨揚講緊佢嘅心底話，反正李雨揚唔會知佢講緊佢⋯
「佢唔會中意我㗎～」張萱淇笑着講出呢句嘅時候，心裏悶悶的，「所有人都叫我唔好中意佢，但你知啦～好難～」
張萱淇抬頭望向李雨揚時一愣，因為李雨揚好似一直都係定睛望住佢一樣，視線就由佢開口嘅一刻冇離開過佢
「你唔同佢講？你中意佢。」李雨揚忽然間開口問，張萱淇即刻有啲緊張，佢好怕李雨揚察覺到佢中意佢
「唔啦，同佢講都冇意思啦～」張萱淇從容地笑着搖頭，但內心卻揪成一團，「呀～好想拍拖呀～有人拖有人攬有人錫～」
「唔好咁傷心，借住我隻手比你拖住先啦～」李雨揚伸出佢嘅左手，「雖然唔係你中意嗰個人嘅手，但都係男仔啫～」
「有得當下都好！」張萱淇將手放到李雨揚嘅手心，兩人真係拖住手
張萱淇真係發夢都冇諗過，咁樣就拖到李雨揚，什至係李雨揚主動提出
「好暖⋯」張萱淇喺心裏默默地感受着從手心傳嚟嘅暖意，「同女仔嘅手真係好唔一樣⋯」
兩個人就咁樣拖住手坐喺小朋友玩嘅遊樂設施上傾計，好似都唔記得咗自己拖住手一樣自然
「如果係真嘅就好啦～」張萱淇忍唔住喺心裏慨嘆道
⋯
自修堂
邱茗然偷偷地喺櫃桶睇手機，新嘅message一條又一條咁彈出嚟，喺邱茗然睇唔切前佢就睇到張萱淇派嘅大花生
「真係㗎！？」邱茗然壓抑住內心嘅激動打字問張萱淇，「你點解唔同佢講呀直接⋯！？」
「唔啦，佢心入面都仲有佢個ex喺度⋯」張萱淇喺心入面嘆氣，然後回覆道，「我講到咁佢都聽唔明」
「點解我完全唔覺佢會聽唔明⋯」邱茗然諗起佢望到李雨揚嗰陣嘅第一感覺，完全係好叻呢種事嘅人
「唉～再算啦～」張萱淇回覆一句，睇起嚟好從容嘅佢其實只係無可奈何要接受現實，「可能以後某一日就唔中意佢呢～」
張萱淇成日都會咁樣同自己講，至少會令自己覺得佢唔會執著喺李雨揚身上，而且嗰日李雨揚都話佢值得更好
「叮噹叮噹⋯叮噹叮噹～」自修堂完結嘅鐘聲響起
「地理堂⋯」邱茗然拎起地理書同筆袋就行，喺去上堂前等埋許洛霏
邱茗然行到E班嘅課室門口，眼見佢地落咗堂，邱茗然就直接行入去
「佢地未走。」許洛霏行喺邱茗然身後講道
「你得未呀？」殷書賢回頭望向離佢座位唔遠嘅張思群，「你唔係一早拎定書出嚟？」
「拎錯書呀大哥⋯！」張思群仲悠悠閒咁蹲低搵書，「你今朝唔提我？」
「我點知你拎錯書？」殷書賢垂手拎住Bio書，見到邱茗然行到過嚟，佢就行出座位讓邱茗然坐，「你自己唔check清楚？」
「你唔好咁無情啦好唔好？」張思群開玩笑講道，佢抬頭見到邱茗然坐咗喺殷書賢嘅座位，又笑着開口：「你真係會冇女仔中意，同Chem Bio過人世啦你。」
「噗⋯」邱茗然一聽到張思群講咗句好似事實一樣嘅說話就忍唔住笑咗出嚟
IG Link: https://www.instagram.com/nd_cotttoncandy/?hl=zh-tw