【校園】想成為您的治癒: 86. 陽光
喺番到學校門口之前，邱茗然摸一摸領結，將領結推番去最高，卡番喺頸喉鈕前面，然後一臉自信咁行入學校
「你條呔做咩拉到咁低咁Hea？推番上去！」
之所以要整番好條呔，就係因為訓導主任就企喺學校門口捉儀容，今日係換季嘅第一日，儀容一定會捉得比較嚴
「嘻⋯」邱茗然一經過咗訓導主任嘅身旁，就即刻將校呔拉低番少少
殷書賢望到邱茗然嘅舉動後回頭望一眼，見到訓導主任仲企喺校門前就默默咁收回視線
「茗然！」許洛霏快步跑上樓梯追上邱茗然
邱茗然同殷書賢都企喺原地，同時回頭向後望；邱茗然抬起朝殷書賢望咗一眼，殷書賢同時望向佢，兩人好似都知對方想講咩一樣，殷書賢先一步邁步行
「哦～好有默契～」許洛霏行到邱茗然嘅身旁細聲道，手撞一撞邱茗然
「咩呀⋯咁唔係點呀？」邱茗然無奈一笑反問，「一齊行咁尷尬呀？」
「真係少少feel都冇呀？」許洛霏一講呢啲話題就特別精神，佢拉住邱茗然嘅手細聲問，仲要加埋手勢，「少少都冇？」
「諗咗去邊呀⋯」邱茗然更無奈，眼前呢個人同張萱淇一樣，咩都可以拉到去戀愛話題，「朋友囉⋯！朋友呀！」
許洛霏開心咁笑，邱茗然同佢分享得呢啲事，即係邱茗然都信得過佢，佢地私下都會講下其他嘢，被信任嘅感覺好好
只要彼此都係拎個心出嚟做朋友，呢段友誼唔會容易走散
「我都話咗啦，我冇拍拖嘅打算⋯」邱茗然講道，「雖然都會羨慕下，但講我嘅話又真係冇特別想拍拖啦～隨緣啦～」
邱茗然抬頭向上望，殷書賢早就唔見咗蹤影，再望一望許洛霏，就忍唔住無奈咁笑：「一同你一齊，講嚟講去都係呢啲冇營養嘅話題⋯」
「我覺得冇咩唔好呀～真正close起嚟嘅時候，就係講嚟講去都係冇營養嘅話題呀～」許洛霏掛上燦爛嘅笑容，然後提手擋喺嘴前細聲道：「我同佢地都冇咁多呢啲話題⋯」
許洛霏講緊嘅「佢地」就係佢本來嘅圈子入面嘅朋友，所以佢先更加覺得同邱茗然嘅close嘅感覺更實在
⋯
殷書賢每一日嘅時間基本上都分晒比讀書，專心上堂係必然，但就算到咗小息，殷書賢基本上都係坐喺位，唔係做緊功課就係溫緊書
「你買唔買嘢食？」張思群問道
「唔啦，你地去。」殷書賢抬頭望佢一眼後又將目光放番喺功課上
雖然話張思群佢地都係精英嘅人，而且都喺全級頭十，但顯然地佢地同殷書賢都係有一定嘅差距
殷書賢枱上放住啱啱先派嘅M2功課，人地都未開始做，佢已經就嚟做完，因為只有早啲做晒功課，分比溫書同鞏固知識嘅時間先會變多
「呃⋯計唔啱嘅⋯？」殷書賢有啲苦惱，佢最討厭計錯數做唔啱題目，佢拎起計數機又計一次，「唔⋯前面有嘢計錯咗⋯？」
殷書賢塗晒佢之前寫嘅步驟，再睇一次題目、整理好先再落筆寫，佢中意計數唔係因為佢有幾中意數學，只係覺得解完複雜嘅題目又計得啱嘅話好滿足
「微積分加代數真係癲嘅人先諗到⋯」殷書賢望住題目，諗緊點計嘅同時伸手摸一摸後頸捏兩下
放學後嘅課室只有殷書賢一人，上完體育堂番嚟拎書包嘅邱茗然正準備上去圖書館
「嗯⋯？佢仲喺度未上去嘅⋯？」邱茗然喺行到E班打開咗嘅課室門口前停低，望到殷書賢仲坐喺課室，「叩叩—」
邱茗然輕輕咁喺門上輕敲咗兩下，殷書賢稍微抬頭望咗門口一眼，邱茗然有啲遲疑咁行入佢嘅課室
「你仲喺度嘅？留堂？」邱茗然疑惑地問，手攬住袋PE衫嘅佢行到殷書賢嘅座位前
「唔係⋯」殷書賢講嘢都變慢咗，佢嘅指尖輕敲喺計數機嘅黑色制上，「未計到最後呢條數唔想離開個位住⋯」
「哦⋯」邱茗然望住殷書賢嘅簿，望住嗰啲比core數學更似火星文嘅字同符號，佢同殷書賢嘅channel對唔上
「唉⋯算啦⋯」殷書賢輕嘆一口氣，將功課簿夾喺M2書入面，「上到去先計啦⋯」
殷書賢企起身孭起書包，將枱上嘅嘢都用手拎住，行出課室就上去圖書館
「唔⋯好靜⋯」邱茗然喺行上樓梯嘅時候喺心裏默默咁講咗一句，佢望一望殷書賢，但又唔知可以講啲咩，「其實又冇話尷尬嘅⋯」
太陽照入圖書館，陽光啱啱好照喺邱茗然同殷書賢中間嘅位置
太陽嘅光線隨住時間嘅走動一直移，最終照到殷書賢坐緊嘅位置，將佢半本書都照反光，佢都睇唔到書上嘅字
「嘖⋯」殷書賢忍唔住抱怨一聲，佢嘅題做到一半，光就照過嚟，佢都已經將書推到貼住牆
殷書賢毫不猶疑咁將自己嘅嘢推去隔離冇比太陽照到嘅位置，坐到去邱茗然隔離
「突然間搬位嘅⋯」邱茗然抬頭望一眼，望一望殷書賢本來坐緊嘅位，比耀眼嘅陽光照到枱面反光
殷書賢將所有嘢擺好之後，又繼續做佢嘅題，就好似咩都冇發生一樣將枱上所有嘢整齊疊好
邱茗然開住西史書寫essay，可能習慣咗寫essay要寫得快，就算係做功課，寫字嘅速度都會慣性提升
「呀⋯錯字⋯」流暢嘅動作一頓，邱茗然嘅手喺自己嘅枱上摸索着塗改液嘅位置
「啪—」邱茗然一個冇留意，唔小心將放喺手邊嘅塗改液撞咗落地
「呀⋯好遠⋯點解偏偏要跌喺枱底⋯」邱茗然耷低頭望住跌喺枱底嘅塗改液，但佢望住塗改液放空咗一秒之後都係默默咁彎腰落去執
殷書賢就好似冇睇到一樣，一直動筆寫題，佢已經唔知做緊第幾題數，都冇留意計咗幾多題數
「呯！」「呀嘶⋯」
IG Link: https://www.instagram.com/nd_cotttoncandy/?hl=zh-tw