【校園】想成為您的治癒: 58. 怪人

「學霸，我點可能唔知你叫咩名⋯？」邱茗然覺得殷書賢有時好有趣，忍唔住掩住嘴笑問道，「殷書賢嘛，我知，學霸嘅代名詞嘛！」

「嗯。」殷書賢低聲回答

「你又真係唔客氣咁承認自己係學霸～」邱茗然笑道

「我唔認你都會話我係。」殷書賢好似已經習以為常，佢望住邱茗然喺度笑嘅時候，佢都露出淡淡嘅笑容

邱茗然嘅笑容好開朗，同佢活潑可愛嘅性格好配合，有時殷書賢覺得呢個人嘅笑容好耀眼





「笑容好有感染力，但我唔適合笑容⋯」殷書賢望向窗外，啱啱仲掛喺臉上嘅笑容已經消失得無影無蹤，又變番平日嘅冇表情嘅佢

「喂喂！」邱茗然伸手拍一拍殷書賢，殷書賢望向佢，「我落車啦～聽日見啦～」

「嗯，拜拜。」殷書賢微微點頭

「拜拜～」邱茗然對殷書賢揮揮手，然後又笑道：「記住我叫咩名呀！」

「記住啦。」 殷書賢無奈咁輕輕一笑，然後目送邱茗然行到樓梯落樓下





邱茗然落車之後獨自一人行喺番屋企嘅路上，咁短嘅路程佢就唔聽歌啦，聽住街上混合埋一齊嘅嘈雜聲慢慢行番屋企就算

「番去嗰邊先食啦！陣間佢地話join。」

「都好喎～咁宜家去啦！」

「有女就肯去，難怪比人話你中央空調啦～」

「呢個人咪上次喺巴士見到嗰個人？」邱茗然一眼就認到迎面行嚟嘅三個男仔中嘅其中一個，「借咗我$2嗰個⋯」





邱茗然見到對方身邊仲有兩個男仔，唔知點解第一眼望落去就覺得對方係嗰類得閒落老蘭識女嗰種人，又或者身邊大量女嗰類人

「觀感⋯唔太好⋯」邱茗然將視線移開當咩都冇睇到直行，「上次冇望清楚，今次望清楚啦⋯個氣場都幾明顯係嗰類人⋯」

「佢應該認唔到我，都係喺巴士咁啱撞過一次—」「嗨！」

邱茗然喺心入面講嘅說話都未講完，嗰個人就已經見到佢仲要朝佢揮一揮手行去佢面前

「嗨，你認唔認得我呀？」嗰個男仔先一步行到邱茗然嘅面前

「呃⋯唔認得⋯」邱茗然抬起頭望住佢，眼前呢個男仔比佢高足足一個頭，佢扮唔認得咁露出尷尬嘅表情搖搖頭

「嗰日借咗你$2搭車嗰個！」對方見邱茗然唔認得就即刻講道

「哦哦～好似係⋯」邱茗然嘅戲都做足，佢點點頭後即刻講道：「$2好小事啫。」





「難得今日見到你，我還番$2比你啦～」佢喺褲袋中拎咗$2出嚟遞比邱茗然

「哦好呀⋯」邱茗然本來想由得佢算，都只係$2又唔係$20，但人地都拎到出嚟，佢唔收又唔太好嘅，「唔該。」

邱茗然微微點頭，然後想繞開佢地喺佢地身邊行開，但對方好似知佢想點一樣即刻行過一步擋喺佢面前

三個男仔企喺佢面前，就好似一道人牆一樣

「你唔好咁樣搞住人啦～」喺佢身邊嘅朋友喺度食花生咁笑，「人地都怕咗你啦！」

「都係想識個朋友啫～」佢笑一笑之後望向邱茗然，但邱茗然完全笑唔出，嘴角都只係因為尷尬而微微上揚，「加個IG？」

「我冇IG。」邱茗然諗都冇諗就衝口而出講大話





「人地唔想加你呀～」佢嘅朋友笑道

「下次再見嘅時候加我呀～」對方好似都唔想落自己面便笑道，然後就同另外兩個男仔一齊走咗

「怪人⋯」邱茗然連忙頭也不回向前行，「真係周街識女⋯」

「喂李雨揚，你唔係有個friend都係呢間學校咩？上次你個friend唔係著呢間嘅校服咩？」企左邊嘅朋友提道，「你個friend會唔會識佢？」

「我都唔知佢咩名⋯唉～早知問埋啦～」李雨揚回頭望向早就快步行得好遠嘅邱茗然婉惜咁嘆氣

李雨揚知佢所指嘅係張萱淇，但都冇咩大用途，畢竟佢連人地叫咩名都唔知，佢好難做到問張萱淇呢個舉動

「問佢嘅話佢一定話我又溝女啦～」李雨揚稍微諗下問張萱淇嘅方案，但都已經諗到張萱淇會答佢啲咩

「啱啱見到個怪人⋯」邱茗然即刻send message比張萱淇同佢分享，「上次搭車問我借咗$2嗰個，一行上嚟就問人拎IG」





「吓⋯咁勇敢？」張萱淇喺兩秒內就回覆邱茗然，「一定係啲成日周圍拎女電話嗰啲人啦」

「第一眼望落去都覺得係」「你唔洗驚呀！下次再見到佢我一定打到佢走！」

「你當佢係你個補習同學咁打？」「關咩事？只係要好好保護你，免受疑似渣男嘅人打擾」

「哦哦～咁我都希望你唔好比渣男動搖」「我冇蠢到呢個地步」

張萱淇盤腿坐喺梳化，正當佢想再對邱茗然講啲咩嘅時候，李雨揚就搵佢啦，佢即刻就唔記得咗自己嘅好朋友嘅存在

殷書賢沖完涼用毛巾將頭髮抹乾，喺父母番嚟之前佢先盡情享受下唔洗著外套嘅自由

「手機呢？」殷書賢番房坐喺書枱前，靠住椅背舒服咁睇手機





殷書賢慣性咁打開IG睇，一㩒入去就見到一個陌生嘅account




IG Link: https://www.instagram.com/nd_cotttoncandy/?hl=zh-tw