【校園】想成為您的治癒: 57. 玩笑
「你有冇聽明佢最後嗰part講咩？」趙遠寧問謝澤謙，佢感覺自己聽完都唔係好了解咩事一樣
「有呀，跟書咁講囉。」謝澤謙講道，「佢唔係話聽日再講詳細啲咩？」
「係呀，不過打算番去再睇下啫⋯」趙遠寧將本物理書塞番入書包入面，「喂你估下殷書賢走咗未呀嗱，我地要唔要去圖書館截佢？」
「宜家都5半啦，佢應該都走咗⋯原來都係啱啱走～」謝澤謙行到樓梯口，眼尾望到快佢大半條樓梯嘅殷書賢
謝澤謙連忙推住趙遠寧由中間嘅扶手向左行到牆邊，趙遠寧一頭霧水都唔知發生咩事
「殷書賢喺前面。」謝澤謙嘅笑意溢出，佢細聲咁對趙遠寧指一指下層講道
「咁做咩唔上前追佢？」趙遠寧下意識細聲問道
「佢同嗰個女仔一齊⋯！」謝澤謙細聲回答
兩個人攝手攝腳行到中間嘅欄杆扶手邊上探頭往下望，果然見到殷書賢同邱茗然一齊
謝澤謙同趙遠寧冇特登冇上前打擾，只係一直默默咁跟住睇好戲
「我仲以為你唔玩呢啲添。」邱茗然提起閃避球比賽嘅時候講道
「我冇報，係佢地寫咗⋯」殷書賢聽到咩聲一樣，回頭朝斜上方望一眼
「做咩呀⋯？」邱茗然見殷書賢望上去，佢嘅視線都跟住殷書賢郁朝上方嘅樓梯望去
「冇。」見到上面咩人都冇之後，殷書賢先收回視線，「係佢地寫咗我名。」
「嚇死⋯！差啲比佢見到⋯！」謝澤謙比殷書賢突然嘅回頭嚇親，佢啱啱即刻將趙遠寧行到樓梯嘅另一端
「佢咁都聽到！？」趙遠寧難以置信咁望向謝澤謙，佢兩個已經將聲量壓到好低，幾乎係氣音，「痴線㗎⋯？」
喺聽到兩個人行遠嘅聲音之後，謝澤謙同趙遠寧先再行；出到學校門口見到兩人離佢地有一段距離
「你係唔係搭巴士？」邱茗然問道，其實佢都只係隨便搵嘢講下，因為其實佢地都已經好明顯係行緊去巴士站
「係呀。」「殷書賢！」
殷書賢啱啱行到巴士站，後面就傳嚟兩把重疊住嘅聲音大叫佢個名
「邊個⋯？」邱茗然都聽到，佢同殷書賢同步回頭望嘅時候心裏出咗個問號
「搞咩⋯」殷書賢望到謝澤謙同趙遠寧朝佢飛奔過嚟嘅時候，佢就覺得大事不妙
「Wow～」謝澤謙同趙遠寧完全無視殷書賢嘅無奈，衝上前就搭住殷書賢嘅膊頭，好似左右護法咁
「咩、咩事突然間⋯」邱茗然默默咁退開咗兩步，成件事突然好尷尬
邱茗然望住隔離三個男嘅喺度拉拉扯扯，佢自己都有啲尷尬，下意識咁加快咗腳步行
「你地都搭巴士呀？」趙遠寧都唔知係真知定真係唔知
邱茗然探頭一望，喺佢諗緊佢係唔係應該出於禮貌回答之際，殷書賢先一步開口：「行到嚟巴士站咁你覺得？」
「我地陪你等車呀～」趙遠寧搭住殷書賢嘅膊頭，佢幾乎成個人都靠住殷書賢，用佢嚟借力一樣
「你唔好阻住人啦！」謝澤謙拉住趙遠寧嘅後領，然後瞄一眼邱茗然示意，「行啦！」
「好呀。」殷書賢留意到謝澤謙嘅小動作，即刻拉住趙遠寧嘅書包，將趙遠寧拉番過嚟
謝澤謙佢地一見到自己同女仔一齊就期待緊啲咩咁，完完全全誤會咗成件事，有時殷書賢的確幾無奈，但佢都賴得解釋
「愈係解釋就愈係好似極力掩飾緊啲咩咁⋯」殷書賢心入面嘅想法係咁樣，「只要我知冇嘢就得啦⋯反正解釋都冇人聽⋯」
「唔⋯幾時有車呀⋯」邱茗然探到望向遠處，想睇下有冇巴士嘅身影，但似乎未有車，「唉～好尷尬～」
「走啦趙遠寧，你唔好喺度阻住晒！」謝澤謙拉住趙遠寧嘅衫領行離巴士站
「你啲朋友特登等你？」邱茗然望住兩人行遠咗之後先對殷書賢講道
「佢地補課。」殷書賢搖搖頭，「補完課番屋企。」
「哦⋯」邱茗然微微點頭，眼尾望到駛緊嚟嘅巴士，伸手指住巴士帶住少許興奮嘅語氣：「有車！」
兩個人行到上層坐低，邱茗然自然咁就坐低喺殷書賢隔離靠走廊嘅位
「你今日唔聽筆記呀？」邱茗然見殷書賢冇拎耳機出嚟戴，只係安靜咁坐喺窗邊
「唔啦。」殷書賢講道，然後微微耷低頭，手拉住自己嘅衫袖整理兩下
「你⋯有冇比老師問過點解成日都著住冷衫？」邱茗然好奇問道，因為夏天都著住冷衫，通常都應該會比人問
「有，之前Miss Hui問過。」殷書賢邊講邊將右邊嘅衫袖拉起
「咁你點答佢？佢比你一直著住冷衫唔理？」邱茗然追問
「我發冷。」殷書賢講咗個好似只係講笑一樣嘅回答出嚟，「佢就冇理。」
「認真㗎⋯？」邱茗然面對殷書賢呢個態度，佢有啲半信半疑
「講笑。」殷書賢以平淡嘅語氣講道，「我唔會特別理。」
「仲以為真係⋯」邱茗然反一下白眼，佢望殷書賢一眼，隨意就搵個話題，「Miss Hui做班主任都唔錯，Miss Hui好好人～」
「還好，係有時煩啲，一到考試前就追住要我地溫書。」殷書賢瞄一眼邱茗然，「佢睇分嚴。」
「所以Miss Hui一直都係做精英班嘅班主任⋯」邱茗然悠閑咁睇手機，反正今日嘅功課都已經做好
兩個人忽然間都安靜咗落嚟，邱茗然好似有咩想講咁望向殷書賢，但又冇開口講啲咩
「你上次唔係話你個friend叫你問我名，但你最後點解冇同佢講？」邱茗然諗多咗兩秒，佢都係開口問殷書賢
「佢自己要知咪佢自己問。」殷書賢理直氣壯咁講道
「咁你點解最後都幫佢問？」邱茗然擺出好奇嘅表情追問，殷書賢淡然咁望咗佢一眼但咩都冇講，「因為⋯你本來都唔知我叫咩名⋯」
邱茗然有啲無奈，係呀，殷書賢話過佢冇特別留意呢啲事，所以佢唔知佢叫咩名係正常
「唔知就問，你唔知我叫咩名都可以問我。」殷書賢一本正經咁講道，但似乎喺邱茗然睇起嚟係一本正經咁胡說八道
IG Link: https://www.instagram.com/nd_cotttoncandy/?hl=zh-tw