【校園】想成為您的治癒: 59. 偏心

「邊個嚟⋯？我幾時follow咗呢個人⋯？」殷書賢有啲疑惑，佢帶住滿頭問號㩒入去睇呢個人嘅story，「哦⋯係佢呀⋯」

殷書賢一見到story嘅內容，即刻就知道，原來係邱茗然，佢都唔記得咗自己follow咗佢

「點解佢嘅story唔係電視劇就係食⋯」殷書賢有啲無奈

佢睇咗邱茗然今日po嘅三個story，係lunch、番到屋企食零食同埋「1000%推薦呢套劇！」

殷書賢㩒咗入去邱茗然嘅personal page，無聊順便咁睇下佢啲post





「咁文青嘅⋯同佢啲story兩個style嚟⋯」殷書賢更無奈，佢有啲懷疑自己啱啱睇嘅story同po呢啲post嘅人係咪同一個人

最新嘅一個post係前幾日po，一張有女神光、帶住甜美笑容回眸一笑嘅相，配上一個完全冇關係嘅caption：「喜歡所以陪伴」

呢句說話正係早前邱茗然同張萱淇傾計嘅時候，對於「中意一個人會點」嘅回答

呢個時候，電腦嘅discord發出通知，係謝澤謙喺group問打唔打機

「一場」殷書賢望一望時間之後回覆，然後拎起外套著好





⋯

「食飯～」「食飯。」

邱茗然拎起碗筷食飯，今日邱旻顥冇番唔食飯，就算佢唔講邱茗然都估到佢一定係約咗女朋友

「哥哥唔番嚟食，陣間留番碗湯比佢。」媽媽伸手拍一拍爸爸提醒道

「好呀，我宜家去留咗先。」爸爸即刻放低手上嘅碗筷起身行入廚房





邱茗然安靜咁低頭食飯，偶爾望向電視，睇下劇情講到邊度

「仲睇唔夠電視劇咩？日日放學番嚟就喺度睇⋯食飯都要睇⋯」媽媽見邱茗然專注咁望住電視便講道

「咁食飯睇電視係咁㗎啦⋯」邱茗然聽到媽媽咁樣一句，佢心入面就有啲唔中意

「如果你將睇劇嘅精力擺多啲落讀書就最好。」媽媽講嘅嘢果然同邱茗然預計嘅一樣

「我又唔係冇溫書⋯」邱茗然坐番好唔望電視，心情一下子沉落去

「我見親唔係食緊嘢就睇緊手機睇緊iPad⋯」媽媽似乎唔信邱茗然講嘅嘢

「可能佢真係有溫書呢～」爸爸從廚房行出嚟，一坐低就幫邱茗然講說話，「我地又唔係24小時喺佢隔離⋯」

「你真係努力啲上心啲啦⋯番到嚟屋企就睇手機睇iPad，考DSE啦，陣間讀唔到大學你唔好怨。」媽媽又講道





「下一句一定又係講哥哥⋯」邱茗然已經冇出聲，佢最討厭咁樣，佢都知道媽媽下一句會講咩

「睇下哥哥嗰陣，晚晚溫書溫到3、4點先瞓，你學下哥哥努力啲啦⋯！」媽媽真係提起邱旻顥

可能媽媽嘅本意可能係想邱茗然更加努力，所以先會拎邱旻顥同邱茗然做比較，但喺邱茗然嘅耳中，聽起嚟特別令人煩躁

「我都有溫到3、4點啦⋯」邱茗然細聲咁講道，「做咩下下都要話我冇溫書⋯」

「我知你有努力，哥哥又好你又好。」爸爸嘗試緩和呢個突然急轉直下嘅氣氛，「食飯先啦～茗然，你中意食呢個，快啲趁熱食啦！」

「哥哥晚晚都溫書，你晚晚都睇手機，睇下你啲成績最後出嚟點⋯」媽媽又講道，邱茗然愈聽愈委屈，眼眶一下子紅起嚟，「我睇結果啫。」

「做咩成日都要搵我同哥哥比較啫！」邱茗然忍唔住皺起眉頭大聲反駁媽媽，「宜家我考咗DSE啦咩？確定我一定考得差啦咩？做咩一定要拎我同哥哥比啫？」





「我冇拎你同哥哥比較，我只係想你同哥哥一樣叻一樣努力，唔係成日拎住個手機睇⋯！」媽媽輕皺起眉頭，佢覺得邱茗然誤會咗佢嘅意思

「咁咪即係比較⋯！」邱茗然更委屈，「我又唔係用嚟襯托哥哥有幾叻！做咩成日都要咁樣比較啫？」

「你⋯！」媽媽即刻嬲到窒咗講唔到嘢，「你發咩脾氣啫宜家？講事實你又唔中意？」

「咩事實啫？我又未考宜家，咁同未審先判有咩分別？」邱茗然不忿反駁，「呯」一聲將碗筷放低然後番房

成件事嚟得太突然，邱茗然嘅情緒爆發都太快，爸爸媽媽都嚟唔切比反應

「你睇下佢⋯！咩態度？」媽媽望向爸爸又嬲又無奈咁抱怨，「連態度都同旻顥差咁遠⋯！」

「你偏心就偏心啦⋯」爸爸無奈咁執嘢拎起碗筷行入廚房，「邊有人偏心到你咁明顯㗎⋯？」

「我講事實又係我偏心？」媽媽不解問題所在，「咁佢真係冇咁努力喎～」





「你睇唔到又唔代表佢冇做，咁佢最後考出嚟係點咪知，你宜家日日都咁講冇意思㗎。」爸爸解釋道，佢冇偏心邊個，只係以事論事，「你成日話你冇偏心，但你自己諗下你係咪真係冇？」

媽媽靜咗落嚟冇出聲，望住緊閉嘅房門，媽媽一人沉思回想，似乎佢真係偏心得太明顯⋯

但佢冇可能先低頭同邱茗然道歉，畢竟佢係媽媽，父母都有身為父母嘅面子，特別係對於道歉呢一回事，自己絕唔可以先低頭




IG Link: https://www.instagram.com/nd_cotttoncandy/?hl=zh-tw