【校園】想成為您的治癒: 50. 人以群分
「但我宜家冇中意嘅人，好難話你知喎～」邱茗然笑道
「假設啫、如果啫～咁你總有一日會中意其他人㗎嘛～」張萱淇好奇道，「我覺得我真係會奮不顧身去追。」
「我覺得⋯我可能只係會想一直陪喺嗰個人身邊，無論咩事都好⋯」邱茗然嘅手垂落嚟，雙手拎住紙包飲品盒放鬆咁搭喺大腿上，「就係無論開心定唔開心都想陪佢一齊嗰種，不過唔知呀～有中意嘅人先再算～」
「哦～係悄然嘅愛～」張萱淇用手比咗個心，「仲以為你會話去表白之類。」
「我又唔係你⋯」邱茗然無奈咁笑，佢同張萱淇唔一樣，張萱淇會係願意去追嘅嗰種人，但佢唔係
不過對邱茗然嚟講，自然上次表白fail咗，為佢嘅暗戀畫上句號之後，佢就冇再中意過邊個
可能因為媽媽日日都提住DSE，提到佢好似洗咗腦咁，都冇「中學畢業前要著住校服拍一次拖」呢類嘅想法
⋯
邱茗然喺就嚟6點嘅時候番到屋企，一推開屋企門就發現自己係一個會發光嘅電燈膽
「一入屋就有強光⋯」邱茗然望一眼廚房，即刻覺得光到咩都睇唔到
「今晚媽咪同老豆食完先番。」邱旻顥見到邱茗然番嚟就講道
「哦好呀，你煮飯呀？順便咁煮埋我嗰份。」邱茗然將皮鞋除落嚟換拖鞋，行入廚房八卦一番
邱茗然行到邱旻顥嘅右邊，李逸彤喺左邊，拎住刀切嘢邱旻顥忽然覺得壓力大增
「其實你地唔洗企到咁埋⋯好逼⋯」邱旻顥面前嘅空位逼到兩隻手都夾埋咗少少，「好大壓力⋯」
「我陪你嘛～」李逸彤嘅手挽住邱旻顥嘅手臂，「怕你悶。」
「哦～咁好呀？」邱旻顥望向李逸彤寵溺地笑了笑
「哎呀⋯救命呀⋯」目睹一切嘅邱茗然即刻打個冷震，「我先撤退啦～」
邱茗然即刻從廚房急步行出嚟行番房換衫，一換完衫就灘喺床度睇手機
邱茗然一直喺IG，有時見到人地啲相有@人嘅時候都八卦咁㩒一下，睇下@咗邊個
「咦⋯原來佢有IG。」邱茗然睇story嘅時候，story嘅下一頁變咗建議追蹤
就係咁邱茗然就偶然咁發現到殷書賢嘅IG，佢好順手就㩒入去打算睇下
「都冇嘢睇嘅⋯」邱茗然望住顯示po量嘅0有啲無奈，「仲以為會有咩可以睇下添⋯話說佢明明咩都唔po，做咩要鎖咗account⋯？」
邱茗然好快就㩒咗個request，完全冇一絲猶疑，畢竟好多人都係咁，見到係識嘅人就自己會去follow
邱茗然一直喺床上面灘到夜晚，直到李逸彤入嚟同佢講可以食飯，邱茗然先懶洋洋咁爬起身
「開心啦邱茗然，今晚唔洗聽住DSE同你啲學習檢討食飯。」邱旻顥一坐低就即刻對邱茗然講道
「哼哼⋯」邱茗然敷衍咁笑兩聲，然後低聲地講道，「咁食狗糧都好過聽媽咪一直囉嗦嘅⋯」
「你講咩話？」邱旻顥明明聽到都要再問一次
「冇咩～只係話我搵到男朋友之後就唔怕你啲閃光彈！」邱茗然輕哼一聲，撅起嘴講道
「幾時搵咗男朋友唔同我講呀？」邱旻顥嘅臉上掛住一個微笑，李逸彤夾餸入口嘅同時瞄一眼邱旻顥
「喺學校有冇人暗戀邊個呀？」李逸彤聽到戀愛話題就即刻感興趣，「應該有啦？」
「冇喎。」邱茗然搖搖頭，夾咗塊午餐肉就擺入口，「冇中意邊個。」
「冇留意邊個咩？」李逸彤更感興趣，女仔有暗戀嘅人好正常，「你偷偷話我知，我唔會同邱旻顥講！」
邱旻顥即刻一頓望向李逸彤，李逸彤只係聳肩然後若無其事咁繼續食飯
喺夜晚臨瞓前，邱茗然仲灘喺床度睇手機，睇綜藝睇到一半嘅時候，忽然間彈咗個message出嚟吸引咗邱茗然嘅注意
「呢間鋪啲衫好好睇真係！！！」許洛霏喺見到邱茗然share喺story嘅po之後回覆咗邱茗然嘅story
「我幾中意佢啲款，好多時都喺呢度買」邱茗然見到係佢感興趣嘅嘢就先回覆
許洛霏直接send咗其中一件衫嘅po比邱茗然，邱茗然好快就like咗
「我買咗呢件，我發現佢啲斯文款我都幾中意」「呢件我都有，我上次喺門市見到就即刻買咗」
「佢啲文青系我都有買幾件」「佢啲文青款我都有買，嗰條格仔裙都好好睇」
「可以去野餐嗰陣著」「之前見有個女仔著得好好睇，想試下就買咗」
「嗰條裙著去迪士尼都好唔錯」「我都係咁諗！」
邱茗然同許洛霏傾咗一陣，發現許洛霏同自己嘅衣著style都差唔多，中意嘅衫類型都比較相似
「估唔到許洛霏都唔係想像中咁難相處～」邱茗然喺將頁面轉番去韓綜嘅頁面時面帶笑容喺心裏道，「可能因為佢嘅朋友圈令人將佢地都歸類咗⋯」
或者許洛霏其實一直都係比較容易相處嘅人，只係所在嘅圈子嘅問題，令其他人對佢嘅評價都變成同佢圈子入面嘅人一樣
畢竟所有人都覺得「物以類聚，人以群分」呢個道理係可以套用喺所有人身上⋯
⋯
邱茗然用力咁撐起眼皮，跟住前面嘅人上車
「嘟—」「嘟—」「嘟—」
邱茗然拍完卡就行入車廂，行到佢平日企嘅位置，自然就企喺殷書賢嘅面前
「早晨⋯」邱茗然以疲倦嘅聲線對殷書賢打招呼
「早晨。」殷書賢將右耳嘅耳機除咗落嚟
殷書賢打量邱茗然，邱茗然右手捉住扶手，左手攬住LS科用嘅厚file，成個人側向扶手嗰邊微微靠住玻璃企
邱茗然感覺自己喺企穩之後，雙眼嘅眼皮有啲重，對眼都睜唔開一樣，邱茗然企喺度補眠
「應該仲有5、6個站先到⋯可以恰到一陣⋯」邱茗然嘅耳仔聽住巴士嘅到站提示，喺心入面計算
邱茗然一直平行自己嘅同時補眠，一直跟住巴士行駛嘅車速微微搖擺着；殷書賢望咗邱茗然一眼之後再次將右邊嘅耳機戴番，聽住筆記講解嘅同時望向窗外一閃而過嘅街景
IG Link: https://www.instagram.com/nd_cotttoncandy/?hl=zh-tw