【校園】想成為您的治癒: 49. 深陷
張萱淇走向媽媽所在嘅位置，喺仲有一少段距離嘅時候將李雨揚幫佢拎住嘅兩pack嘢飲拎番
「我走啦，下次補習見～」張萱淇捧住兩pack嘢飲，行前兩步之後一個轉身回頭對李雨揚講道
「幾時一齊出去？食唔食飯？」李雨揚順口咁問一句
「唔知呀～睇下點先啦～」張萱淇有啲故意嘅意味，特登唔比一個確實嘅答覆李雨揚
張萱淇喺轉個身之後嘴角忍唔住上揚，雖然李雨揚嘅主動邀約令佢好開心，但佢都擔心李雨揚真係對個個都係咁，畢竟佢兩個嘅common friend都話李雨揚係中央空調⋯
「其實佢淨係對我一個係咁就夠啦⋯」張萱淇喺心裏道嘅同時，臉上又不禁變成失落嘅笑容，「雖然佢應該對個個都係咁⋯」
張萱淇回頭望向李雨揚，李雨揚一個人行去比錢，張萱淇不禁喺度諗，李雨揚陣間join嗰班人入面一定又有好幾個女仔
「真係呀⋯又溝女⋯」張萱淇喺心裏略帶點失落講道
⋯
晏晝食完飯之後，殷書賢佢地幾個行番學校，喺行番學校嘅路上，張思群同趙遠寧兩個人忽然一個轉彎行去7仔
「買支嘢飲先～」張思群打開雪櫃，拎咗支嘢飲
殷書賢跟喺謝澤謙隔離企喺放糖嘅貨架前，謝澤謙隨手拎起包糖睇下研究下
「之前食過呢隻，超甜超膩。」謝澤謙將包糖遞比殷書賢
「遞比我做咩？」殷書賢望住遞到自己面前嘅糖問道
「係喎你唔食糖。」謝澤謙聳一聳肩，然後將糖放番低喺架上，「我買筒薄荷糖先～你要唔要？」
「你請？」殷書賢下意識問道
「好好好⋯請你食，當預祝你考狀元⋯」謝澤謙敷衍一笑，下一秒就行入去搵張思群，但殷書賢自己揀
殷書賢望住貨架上嘅各種甜食，本來就唔太食糖呢類甜嘢嘅殷書賢有啲眼花撩亂，淨係糖都有好多種類，唔同牌子唔同味，價錢都已經唔一樣或者差好遠
因為一直都唔太會食，所以一直都唔會多望兩眼，到宜家真係認真望嘅時候先發現，原來「糖」都只係一個統稱，佢嘅實際種類多到無從下手
「揀咩好⋯？」殷書賢有啲苦惱，抬起頭由上而下望去，一眼就望到放喺上面朱古力
殷書賢下意識一樣自動提手拎咗包啡色包裝嘅M&M落嚟
「我做咩攞朱古力⋯？」殷書賢回神過來望住手中嘅朱古力，自己都有啲困惑
殷書賢又提手，打算將朱古力放番去，但喺將朱古力放低嘅前一秒，殷書賢又收回拎住朱古力嘅手
「算啦⋯食一次⋯」殷書賢好似喺度說服自己一樣，然後拎住朱古力行去謝澤謙嗰邊
「你揀完啦？」謝澤謙眼尾留意到殷書賢塞咗嘢去自己隻手度，「朱古力？你食㗎咩？」
顯然地連謝澤謙都有啲訝異，佢識嘅殷書賢，從來都冇買過朱古力，今日殷書賢居然會買朱古力
「嗯。」殷書賢淡然回答道，「多謝晒。」
⋯
邱茗然拎住盒嘢飲坐喺張萱淇前面嘅座位聽張萱淇一直喺度抱怨
「佢仲要同我講話好可惜！」張萱淇抱怨李
雨揚喺超級市場對佢講嘅嘢，諗起李雨揚一臉可惜嘅模樣，張萱淇即刻覺得嬲上加嬲，「真係激死人⋯！」
「咁你可以同佢講唔比㗎～你唔中意嘅話～」望住張萱淇呢個氣沖沖嘅表情，邱茗然覺得好笑，「可能佢會真係聽你講呢～」
「佢先唔會呀！」張萱淇不悅地撅起嘴，「佢都可以喺我面前flirt晒女咁，下次就嚟叫我幫佢拎電話拎IG㗎啦！」
「明明淇淇係中意啦～仲死唔認～」邱茗然偷笑，因為自己都曾經偷偷咁對一個人抱住呢種小心思，所以望住張萱淇嘅反應佢就明白
「你做咩偷笑呀！」張萱淇見邱茗然偷笑，即刻就知佢諗咩，伸手輕輕咁打咗邱茗然一下，「你諗多咗啦！」
「咁你係真係好明顯係嘛！」邱茗然都唔扮，直接指出張萱淇收起嘅感情，「你當我唔知你咩？又唔係第一日識你～你之前中意過唔！」
「喂呀！」張萱淇喺邱茗然再講落去之前，迅速伸手掩住邱茗然嘅嘴，「唔準講呀！」
「唔⋯！」邱茗然極力咁想將張萱淇嘅手推開，「得得得！唔講唔講！」
邱茗然投降，佢地知道對方太多大大小小嘅秘密，一旦變得好討厭對方要絕交嘅話大概會好危險
「邱茗然你一世都唔可以同我絕交呀！太危險啦！」張萱淇諗到自己嘅秘密，即刻用真心提醒邱茗然
「你先係唔可以同我絕交呀！」邱茗然笑道，「你都知太多嘢！」
「唉～就係因為你知我太多嘢啦～想瞞都瞞唔住⋯」張萱淇無奈地嘆氣托住額角，指尖一直喺枱上畫圈圈，「其實佢係咩人我知，但有時愈叫自己唔好陷入去，反而會愈陷愈深⋯」
邱茗然咬着飲管，安靜咁聽住張萱淇講嘢，佢都認同張萱淇所講，有時人就係咁樣，明知山有虎，偏向虎山行
「你唔好抱住要改變佢嘅想法去中意佢，因為你改變唔到佢，只會改變咗自己去迎合佢⋯」邱茗然緩緩地開口講道，「但中意係冇錯嘅，我覺得⋯本來情感就唔係我地可以控制嘅事。」
「我知～我知你都暗戀過人～」張萱淇一臉自豪地講道，佢意有所指，邱茗然聽得出但亦冇解釋嘅打算
「咁嗰種中意係有啲崇拜嗰種中意，係真係初戀情竇初開嗰種囉～」邱茗然唔會否認，佢嘅初戀永遠都係一樣，唔會改變啲咩，「不過我放低咗啦，你知啦～」
「咁你覺得你真係中意一個人會點？」張萱淇忽然間提出一個假設性問題，剎邱茗然一個措手不及
IG Link: https://www.instagram.com/nd_cotttoncandy/?hl=zh-tw