【校園】想成為您的治癒: 51. 強制參賽

「噫—」巴士喺埋站嘅時候剎車，巴士向前chok咗一下

邱茗然睜開眼醒一醒，未回神嘅佢即刻有啲失平衡一樣向後跌咗一步，但下一秒嘅佢好快就捉番重心企番穩

「嚇死我⋯好彩企得穩⋯」邱茗然好快咁回頭望咗一眼車頭，低聲地喃喃自語安慰自己噗噗跳嘅心

殷書賢啱啱都向前踏咗一小步，喺就嚟撞到邱茗然嘅一刻，殷書賢連忙將手從褲袋抽出嚟捉住扶手

「嗯？企咁埋做咩？」邱茗然收回視線，一回頭就見到同佢企近咗一小步嘅殷書賢同佢四目交投，「好逼呀⋯！」





本來車廂入面已經夠逼夠多人，殷書賢仲要向前企咗一小步，邱茗然頓時覺得壓迫感迎面而嚟

「剎車企唔穩。」殷書賢將右耳嘅耳機除落嚟，解釋完就向後行番一步，背貼住後面嘅玻璃

「啱啱嚇死，我差啲就跌⋯！好彩我眼明手快、反應敏捷～」邱茗然對殷書賢笑着講啱啱嘅經過，雖然佢只係想讚自己

「嗯，勁喎。」殷書賢只係淡然咁點一下頭，聲線完全冇起伏，只係平靜咁講咗一句和應一下

「呿⋯」邱茗然細聲地呿一聲，然後吐一吐舌頭後撇開臉望向窗外





邱茗然喺巴士再次行駛前進嘅時候，從裙袋中拎咗盒薄荷糖出嚟，然後先自己食咗一粒

「要唔要為今日嘅自己加油？」邱茗然將薄荷糖遞到殷書賢嘅面前，露出同平日一樣嘅活潑笑容

「有咩關係⋯？」殷書賢望住突然一臉精神嘅邱茗然不禁露出淡淡嘅笑容

「打起精神呀～」邱茗然笑道，「咁樣先可以有力量上一日堂呀～」

「咁⋯多謝。」殷書賢仍舊保持禮貌，拎咗粒薄荷糖放入口，薄荷嘅感覺好上腦，成個人都醒晒





邱茗然將盒糖放番入裙袋，細細聲咁哼着歌望向窗外，睇起嚟心情好好一樣；殷書賢聽到邱茗然細聲哼歌，嘴角唔明顯咁微微上揚一下

「真係唔尷尬。」殷書賢喺心裏輕描淡寫一樣講咗一句

⋯

喺小息嘅時候，謝澤謙拎住張紙行番埋位

「你玩唔玩？」謝澤謙喺經過殷書賢嘅座位時問道

「玩咩？」殷書賢短暫咁抬頭望咗謝澤謙一眼，然後又耷低頭做功課

「今朝早早會講嗰個，閃避球比賽，班際嘅。」謝澤謙將張紙遞比殷書賢，「你冇聽到咩？」

「冇留心聽佢講。」殷書賢將張紙連同謝澤謙嘅手推開





「我去呀！幫我寫名呀！」張思群捧住疊書行過嚟，將書放喺自己嘅枱上，「趙遠寧你玩唔玩？」

「吓？我唔啦⋯」趙遠寧一臉嫌棄咁搖搖頭，「你叫殷書賢啦。」

「你玩⋯」「唔玩。」

謝澤謙都未問完，殷書賢就已經先一步開口，謝澤謙同張思群對望一眼， 然後又默默咁同趙遠寧對望一眼

「你真係唔玩呀？最後一次喎，上年你都有玩啦～」張思群打算說之以情，勸殷書賢一齊報名

「上年係你地喺Miss填名嘅時候大嗌我個名逼我玩。」殷書賢抬頭望一眼時間，見到時間差唔多就將功課收番入櫃桶，將筆放番入筆袋入面

「叮噹叮噹⋯叮噹叮噹～」上堂嘅鐘聲響起，殷書賢拎起書同筆袋去上堂





喺殷書賢離開座位之後，張思群同謝澤謙對望然後笑一笑，佢地都同對方諗緊同一樣嘢

兩人不約而同咁望向趙遠寧，趙遠寧望住面前嘅兩個有想法嘅人，默契咁比咗個Okay手勢

喺兩日之後，負責班際閃避球比賽嘅學生會出咗賽程表⋯

「賽程表喺後梯，去睇下我地班對邊班。」張思群行到上去佢地課室所在嘅樓層時講道

其他三人跟住佢由前梯行到去後梯，啱啱好隔離班嘅人睇完賽程表轉身繞過佢地番課室

「睇下先～」張思群行到賽程表嘅前面，「我地對C班喎～下星期三lunch嗰陣。」

「C班派邊個呀？」謝澤謙行到張思群隔離同佢一齊睇貼喺賽程表旁嘅參賽學生名單，「佢地派佢喎～正呀！」

雖然距離唔算好近，但係就企喺正前方嘅殷書賢都係可以見到紙上嘅字，眼利嘅佢好快就發現到參賽學生名單有啲奇怪





「你地⋯邊個填咗我名⋯？」殷書賢定睛望住名單沉着氣問道，名單上面居然有佢個名

「趙遠寧都玩嘛，咁我地冇理由掉低你一個食飯。」謝澤謙搭住殷書賢嘅膊頭

殷書賢有啲無奈，其實佢冇咩興趣玩呢啲，佢連PE堂都唔太中意上，因為著住外套之後再咁樣跑跑跳跳一定出晒汗，啲衫黏住個人超唔舒服

「一次啦，最多下次唔填你名。」謝澤謙以為殷書賢嬲，即刻就輕撞佢一下稍微氹一氹

「你下年係讀中七定留班？」殷書賢無奈咁問謝澤謙，「今年都最後一次啦⋯」

「喺DSE之前，就應該好好咁玩下放鬆下！Study leave再努力都唔遲。」謝澤謙笑道，「該玩時玩，該努力時努力，咁樣先平衡到人生㗎嘛～」

殷書賢冇出聲，有時佢都覺得人生應該要咁，喺仲可以去癲去玩嘅年紀應該要去玩得開心，但有時佢都好似冇得揀⋯





「我都冇得退出啦宜家。」殷書賢淡然講道，佢冇嬲，只係有啲無奈

「陣間lunch食咩好？」張思群見殷書賢冇咩嘢，即刻就轉移話題到陣間嘅午飯，「照舊？」

「照舊囉，食嚟食去都係嗰間㗎啦⋯」趙遠寧莫名其妙咁原地轉咗個圈

轉咗半個圈面向樓梯嘅方向時，邱茗然捧住疊簿行上嚟，趙遠寧就停咗落嚟望咗兩眼

邱茗然捧住簿喺佢地幾個隔離經過嘅時候，本來已經有啲氧化嘅橡筋，因為拉得太恆而承受唔住，「啪」一聲就斷開

邱茗然本來只係輕輕咁攬住疊簿，橡筋一斷，成疊簿由中間開始凹入去然後跌落地，邱茗然喺啲簿未滑落晒之前迅速將啲簿攬實，但都只係救到幾本

「尷尬尷尬⋯」邱茗然喺心入面道，佢眼睛嘅餘光都係見到有人喺隔離，但因係尷尬嘅關係佢都唔係幾想抬頭望

邱茗然蹲低喺地上好快咁執番好啲簿放到自己懷中攬住，趙遠寧轉個身蹲低幫佢一把，將喺地上嘅簿執起疊好




IG Link: https://www.instagram.com/nd_cotttoncandy/?hl=zh-tw