【校園】想成為您的治癒: 23. 期望

「陸運會之前嘅統測，今日派番比你地啦。」Miss企喺老師枱前講道，「照舊跟分數高低派啦。」

「真係殘忍⋯跟分派⋯」謝澤謙喺心裏道，「呢個制度太殘忍啦～」

「滿分90，最高分殷書賢，87。」Miss喺講出名嘅時候，殷書賢起身行出去雙手接過統測卷

大家都習以為常，聽到都已經唔會有太大反應；殷書賢拎住份卷番到位，一坐低就掀卷

「3分⋯錯喺邊？」殷書賢逐頁check一次，呢啲時候佢最緊張，佢緊張嘅係邊度失咗3分，怕下次又有類似題目嘅時候又犯同一樣嘅錯





去到同成績有關嘅話題時，殷書賢就格外專注，喺Miss開緊model answer嘅時候，殷書賢就戴上眼鏡，就算係自己啱嘅題目，聽多次都冇壞，聽多次當係加深記憶

「睇下殷書賢⋯又turn on啦⋯」謝澤謙望向殷書賢，見到佢一臉認真嚴肅時喺心裏默默笑道，「真係得讀書先可以令佢露出呢個表情⋯」

謝澤謙稍微挺直腰，喺聽Miss講解前先偷偷地伸個小懶腰，陣間講解嘅時候佢先唔想分心

「咦～」謝澤謙偶然望向課室外面嘅走廊，見到孖堂放break嘅隔離班嘅同學，邱茗然喺佢地課室外面經過，「真係好難唔好奇，到底係邊個主動先呢～」

謝澤謙同殷書賢係四個人入面識得比較耐，了解上嚟講，謝澤謙對殷書賢嘅性格都係清楚嘅





「所以，點會唔好奇～」謝澤謙收回視線拎起筆準備聽書

「有機會咁問⋯圈低先。」殷書賢用螢光筆圈起錯嘅題目，提醒自己要記番呢啲題目類型，拎起筆記番啲計分位，只有知道點計分先知要寫到啲咩準確嘅答案

「如果唔可以將所有成績保持喺第一位，最後會拉低平均分。」

「人望高處，成績好嘅人先有選擇，我係為你好。」

「我地為你好先會有期望，所以書賢，再努力啲考番第一番嚟，保持什至要超越第一名嘅水準。」





「所以我一定要有好成績⋯咁樣先唔會辜負佢地對我嘅期望⋯」殷書賢忽然諗起媽媽對佢講過嘅說話，呢種成績至上嘅想法深深地刻喺佢嘅腦海中，「未來先會有更好嘅選擇⋯」

父母嘅期望對殷書賢嚟講，係唔可以辜負嘅事，佢唔想成為父母眼中冇用嘅兒子，所以要完美咁達到佢地嘅期望，先係嗰個令佢地驕傲嘅兒子

殷書賢托一托眼鏡，頓時變得更集中，拎住筆快速地寫下一個又一個計分點同小筆記

C班嘅第二堂開始，今日邱茗然特別緊張，因為接住落嚟要派嘅，係佢用咗好多時間溫嘅數學統測

「唔高分唔緊要，但一定要合格呀⋯！」邱茗然雙手緊緊握住，佢嘅心都緊張地噗噗跳，「數學唔係我嘅強項，但唔好唔合格呀⋯！」

邱茗然由拎到卷到番埋位嘅小路程上都唔敢睇分數，直到坐低喺位，邱茗然緊張地掀開比佢摺起、寫住分數嘅角落

「合格合格合格⋯」邱茗然邊喺心中默念邊掀開角落，見到分數後即刻高興地鬆一口氣，「Yes⋯！呼⋯」

分數係佢心中覺得可以接受嘅分數，雖然唔係真係班上第一嗰種高分，但係佢心中算係理想嘅分數





「嘻嘻⋯再努力再努力～」邱茗然輕拍自己嘅心口兩下，細聲地鼓勵自己

邱茗然回頭同張萱淇對望，兩人比對方睇咗自己嘅分數，互相豎起拇指比個like對方

⋯

第二個小息時

E班嘅班主任Miss Hui特登上嚟課室一趟，企喺課室門口提大家：「朝早唔記得提大定，Jupas嗰份模擬選科表聽日要交，大家記得賣好帶番嚟。」

「好彩我填好咗啫～」張思群自豪地講道，然後問趙遠寧，「係填晒未呀？」

「填晒啦～以我宜家呢個成績，DSE穩定正常發揮嘅話，Band A一定得！」趙遠寧自信地講道





殷書賢拎出模擬選科表，若有所思地望上面空白一片嘅Band A，佢仲未填好

「聽日交啦喎，你仲未填呀？」趙遠寧望到殷書賢嘅Band A空白一片，其他都填好，就差最重要嘅Band A，「Band A嘅話，以你嘅成績應該想讀嘅都讀到。」

「嗯。」殷書賢平靜地回答

「你A1擺醫學院，唔係咩？」張思群問道，「A2、3嘅話，你想讀咩都可以擺啦～」

「未考慮好點擺。」殷書賢猶疑地聳肩

「你爸媽唔係想你讀醫咩？」趙遠寧道，「你宜家嘅成績完全夠，你考慮啲咩？」

「都係⋯」殷書賢聽完趙遠寧咁講便微微點頭，輕輕一笑，佢嘅父母的確好希望佢入到醫學院

夜晚食完飯後，殷書賢就番房打算溫書，雖然嚟緊都冇測驗，但都想打好啲基礎，做下練習題都係好事





「叩叩。」殷媽媽手上拎住一碟切好嘅蘋果企喺殷書賢嘅房門前，敲兩下門就推開佢嘅房門入去，「切咗蘋果比你。」

「唔該。」殷書賢禮貌地接過碟放到枱上，然後又繼續做練習題

「最近點呀？讀書跟唔跟得上？」殷媽媽關心地問道

「嗯，跟得上。」殷書賢平靜地點頭，目光始終停留喺練習題上

「咁就好，嚟緊DSE要保持水準呀！」殷媽媽提到DSE嘅同時，殷書賢頓時眉頭一皺，「嗰日見到你張Jupas模擬選科紙，你填成點呀？擺咗咩？」

「都係醫學院嗰啲。」殷書賢微微抬起頭，但好快又將心思放番喺枱上嘅練習，「有啲Chemistry嗰啲。」

「讀到醫學院就最好啦～」殷媽媽忍唔住驕傲嘅笑容，行到殷書賢嘅床邊坐低，「你都知，我同爸爸最希望你將來做到醫生，始終係一份專業。」





「嗯。」殷書賢簡短地回答，佢嘅餘光都可以見到佢媽媽聽到佢揀咗醫學院嘅時候，臉上嘅笑容係幾開心幾驕傲

殷媽媽望住殷書賢認真溫書嘅表情，心入面覺得特別安慰，佢個仔又乖，讀書又叻，仲好上進，佢從來都唔會覺得人地個仔比較好，因為佢個仔就係人地眼中嘅「別人家的孩子」

而且殷書賢從來唔會令佢地失望，呢個仔令佢覺得特別驕傲，佢覺得佢真係教咗個又乖又叻嘅仔出嚟

畢竟「別人家的孩子」呢個「榮譽」唔係個個都可以有，係優秀嘅孩子先可以得到嘅稱號

「咔。」背後傳嚟閂門嘅聲音，殷書賢先緩緩回頭望向門口




IG Link: https://www.instagram.com/nd_cotttoncandy/?hl=zh-tw