【校園】想成為您的治癒: 22. 好奇心
「你地可唔可以專心聽書？唔好以為收喺櫃桶就冇人知。」陳sir忍無可忍地講道，呢啲情況其實好常出現，可以話見怪不怪，但都唔可以容許學生一直咁樣做
「陣間中文堂默書呀！」「我唔想罰抄呀！」
C班嘅同學即刻講道，陳sir聽到之後點點頭示意明白：「今日嘅課程都差唔多，比我教埋呢度少少，最後十分鐘比你地溫書啦Okay？但前提係宜家你地要聽咗書先。」
陳sir都知道佢地緊張成績係好事，所以都間中妥協比佢地溫書，呢啲好事唔係成日有；不過邱茗然先唔理咁多，中文默書對佢嚟講比數學重要得多
⋯
「叮噹叮噹⋯叮噹叮噹～」喺中文堂完結之後就係食飯時間，邱茗然拎齊嘢之後就行去後面嘅座位
「食飯～食咩呀？」邱茗然問執緊嘢嘅張萱淇，「你想買番嚟食定食完先番嚟呀？」
「買番嚟食啦～今日想喺學校食。」張萱淇講道，然後就離開學校，去離學校唔遠嘅餐廳買外賣
兩個少女番到嚟學校，喺小食部搵咗個位坐低食飯；此時趙遠寧同張思群先嚟到小食部搵位坐，等埋出去買飯嘅謝澤謙同殷書賢番嚟
「坐邊呀？咁多位⋯」趙遠寧問道，放眼望去小食部仲有好多位，因為大多數人都會出去食飯，喺學校食飯嘅都係中一中二
「是旦啦～坐邊都一樣啫～」張思群直接行到一張空枱前坐低
張思群同趙遠寧手上都拎住中文書，因為晏晝嘅中文堂到佢地有默書，所以佢地都書不離手，可能係學生嘅共通點
「咦，佢地番嚟啦，食飯！」趙遠寧見到謝澤謙同殷書賢行入小食部
謝澤謙行到座位坐低，佢抬頭望一眼後忍唔住偷笑，然後又若無其事咁坐低；佢地各自拎番自己嘅飯盒，邊溫書邊食飯
「謝澤謙你笑咩？」趙遠寧瞄到謝澤謙偷笑便好奇道，「自己喺度偷笑。」
「係咪特登揀呢度坐⋯？」本來已經收起笑意嘅謝澤謙，比趙遠寧咁樣一問又忍唔住笑問，目光朝佢地斜前方嘅嗰枱望
謝澤謙咁樣一望，連帶其他三人都跟住佢嘅視線望去，殷書賢望一眼後就默默低頭食飯，張思群收回視線後嘅第一件事係望向殷書賢
「冇心。」張思群認真地回答，佢冇心坐呢度，佢冇留意到原來嗰日sports day見到嘅女仔就坐佢地斜前方嘅枱
「殷書賢！」謝澤謙特登叫咗殷書賢一聲，殷書賢淡然咁望咗謝澤謙一眼後，就夾起一啖飯放入口
「好似比佢地捉住咗啲有趣嘅把柄咁⋯」殷書賢喺心中無奈地道，如果唔係sports day嗰日比佢地見到，宜家就唔會咁煩
佢地四人各自拎住中文書背書，殷書賢食完飯、喺佢地番課室前起身去廁所，順便掉飯盒
「淇淇，我去個toilet～」邱茗然拎埋張萱淇食完嘅飯盒起身，喺行出去嘅時候順手掉埋飯盒，「你去唔去呀？」
「我唔啦，你去啦～我喺度等你。」張萱淇搖搖頭，趁食完飯又未打鐘嘅時間睇多陣手機
邱茗然去完廁所從女廁行出嚟，就見到殷書賢行喺佢前面
「係喎⋯我未send番相比佢⋯！」邱茗然呢刻先醒起自己未send相比殷書賢，冇辦法呀，因為佢冇殷書賢嘅IG亦冇殷書賢嘅手機號碼，「喂喂！」
殷書賢聽到聲音好似朝佢傳嚟，自然就回頭望，見到邱茗然走向佢
「我未send番相比你！」邱茗然廢話少講直入主題，「我drop番張相比你呀～你開air drop⋯」
殷書賢拎出手機，同邱茗然邊send相邊行番去小食部；坐喺小食部嘅張思群同趙遠寧因為面向嗰邊走廊嘅關係，所以將兩人並肩而行嘅情景睇得一清二楚
「謝澤謙，睇下。」趙遠寧微微抬一抬下巴示意，謝澤謙回頭，沿住兩人嘅視線望去
「呀～」謝澤謙露出一個已知道一切嘅笑容，然後微微點頭示意了解
「Okay啦～收唔收到？」邱茗然望向殷書賢嘅手機螢幕
「收到。」殷書賢嘅手機彈出air drop嘅request
殷書賢行到小食部嘅入口，好快就見到謝澤謙佢地幾個望住佢偷笑，佢當咩都冇睇到，只係喺心入面無奈咁嘆氣
「點呀？」殷書賢行到番去佢地嘅座位，無奈地開口問嘅同時拎起放喺枱上嘅中文書
「仲話冇嘢？」謝澤謙用手肘輕撞殷書賢，「前兩日sports day都比我地捉到啦～」
「點識啫？」張思群好奇咁問
「你地做咩咁好奇？」殷書賢覺得奇怪，佢地平時都唔係啲咁八卦嘅人，平時對學習好奇嘅佢地宜家好奇緊佢，「唔洗溫默書？」
「呀學霸，因為你同女仔一齊呀！」謝澤謙用訝異嘅聲線回答，「你平時淨係同學習相關嘅嘢一齊。」
「收起你地多餘嘅想法。」殷書賢無奈回答
「你答咗點識先。」張思群堅持想知
「偶然識。」殷書賢半敷衍咁講，喺佢地再問之前佢先一步起身，拎埋中文書轉身走
「嘖嘖⋯洗唔洗咁口密⋯」謝澤謙佢地頓時覺得無趣，難得見到殷書賢同女仔一齊，但殷書賢就唔肯講多啲比佢地知，「都唔知係咪兄弟⋯」
殷書賢番到課室坐喺自己位繼續溫書，佢對戀愛呢啲事冇咩興趣同想法，佢只係在乎背默範圍背得熟唔熟，係唔係可以拎滿分，又或者佢嘅成績有冇變差，有冇保持水準，就算只係一個默書都要認真對待
IG Link: https://www.instagram.com/nd_cotttoncandy/?hl=zh-tw