【校園】想成為您的治癒: 24. 沒打算
「都知道係講揀科⋯」殷書賢頓時有種鬆一口氣嘅感覺，佢一早就知佢媽媽入嚟一定會提起Jupas嘅事，「早知嗰日收起張紙先再去沖涼⋯」
殷媽媽嘅「三句不離讀書」殷書賢都已經習慣，只係聽到嗰陣都會覺得好攰
「唉⋯聽日就要交啦⋯」殷書賢拎出比佢壓咗喺練習題最底嘅揀科紙
手自然地朝住放喺筆袋嘅鎅刀伸去，自動地拎起鎅刀然後推出刀片，雙手垂低後，右手好自然咁拎起鎅刀抵喺左手
稍微用力一划，一顆顆小血珠緩緩沿住傷口滲出，殷書賢仍然平靜咁抽咗張紙巾先將刀片抹乾淨，再用消毒酒精抹一次
「呼⋯」殷書賢都好似唔覺得痛一樣，可能已經對呢種感覺麻木咗，佢只係輕呼一口氣，當呢個係短暫嘅休息，然後又坐好繼續溫書
⋯
「你填好未？選科表。」張萱淇拎起放喺眼前嘅梳打，順口問起邱茗然關於選科表嘅事
「填完啦～你填咗咩科呀？」邱茗然回答，「真係揀語言呀？你媽唔阻止你咩？」
「哎～我媽點會阻止我呀～佢都冇所謂嘅～」張萱淇搖搖頭，對讀書嘅事，佢從來都冇咩壓力，就算有都係佢比自己
當初決定要去補習嘅係張萱淇本人，媽媽只係附近比錢佢去補習，其他嘅都係張萱淇為自己安排
「我媽不嬲都係冇咩所謂嗰種人嚟㗎啦～」張萱淇笑道，「都有同佢傾過揀科嘅嘢啦～不過佢都係答「你中意啦。」「係你想讀嘅科咪得。」呢啲。」
「你媽媽咁好嘅～」邱茗然聽到後有少少羨慕，只要張萱淇行喺啱嘅路上做啱嘅事，張萱淇嘅媽媽一直都係處於全力支持張萱淇嘅狀態，「我媽成日都提我要努力努力～讀大學讀大學～DSE啦DSE啦～」
「Okay啦～」張萱淇笑道，「你當聽唔到咪得囉～不過你知你媽宜家全神貫注喺你度～」
「哈哈⋯係呀！」邱茗然敷衍笑咗兩聲，「自從我哥讀咗大學之後，我媽嘅target就變咗我啦⋯！」
「係呢～之前你中意嗰個師兄，係唔係同你哥哥同一間U？」張萱淇好奇道
「係呀，好似係同一科添。」邱茗然稍微諗一諗，好似真係同一科
「女朋友係唔係同一科？」張萱淇好奇追問道
「好似唔同⋯」邱茗然都唔太清楚，佢反而想知張萱淇咁問嘅原因，「做咩突然問起？」
「好奇下啫～」張萱淇微微聳肩，「不過嗰個師兄之前咁受歡迎，佢女朋友唔怕佢上到去中意第二個呀？」
「我見佢地感情好好就真～」邱茗然打開IG，第一個彈出嚟嘅story就係潘景諭嘅story，「根據我哥嘅講法，諭哥哥唔係啲花心嘅人，而且女朋友係好艱難咁追到手，所以唔存在變心嘅可能。」
「哦～你羨慕呀？」張萱淇由講呢個話題開始就一直留意住邱茗然嘅表情，一個抿唇一個皺眉都睇喺眼裏
「呀？冇囉～」邱茗然笑着搖頭，「我又唔係仲中意佢～」
「通常有新target先會放低得咁快喎～」張萱淇一副懷疑嘅表情笑問，「唔通你⋯」
「冇呀冇呀⋯」邱茗然無奈咁反白眼，望住張萱淇都冇佢咁好氣，緩緩搖頭，「你真係諗太多啦⋯我又冇拍拖嘅打算⋯」
「好囉～」張萱淇半信半疑地點頭，但下一秒又忍唔住好奇：「真係？」
「真係！」邱茗然用力地點頭，聲量都比啱啱人咗，語氣都特別堅定，「都過咗去啦，我都冇留戀嘅打算⋯」
邱茗然嘅初戀，係佢哥哥嘅朋友，係一個顏值好高好Charm嘅男仔⋯初戀難忘，但亦唔可以一直將一個冇可能嘅人握緊喺手中
「希望到時考DSE生生性性⋯！」張萱淇雙手合十祈求半年後嘅事會順利，「咁我就安樂晒～」
「唉～我都希望係咁～」邱茗然無奈地嘆一口氣，「入到大學就咩都唔洗煩～」
「茗然！以後就算唔同U，我地都要咁friend呀！」張萱淇有啲擔心咁講，「以後唔可以因為識咗新嘅friend就疏遠我㗎⋯！」
「知啦知啦！」邱茗然嘅上身微微前傾，「你係我最～好嘅朋友啦～」
「好啦～」張萱淇滿意地笑道繼續食飯
⋯
「呵～欠⋯」殷書賢捉住扶手打咗個喊路，喺心裏默念：「早知琴晚唔溫書溫到咁夜⋯」
巴士駛到埋站停低，車門打開後，殷書賢感覺自己行路都好似迷迷糊糊咁
一番到課室嘅第一件事，殷書賢係趁打鐘去早會前伏低喺枱上補眠
「仲可以瞓一陣⋯」殷書賢喺心中感恩地道，十五分鐘對今日嘅佢嚟講特別有用，「快啲恰一恰先⋯」
或者因為一嚟朝早頭兩堂就係孖堂，上完第一堂之後，大家都得番半條命咁；拎住粉筆企喺黑板前嘅阿sir一轉身就見到個個都一臉倦容
「好啦⋯放個toilet break再繼續。」阿sir好好人，見大家都冇精神就比大家放個小休
邱茗然起身行出課室去廁所，當然係同張萱淇一齊出去
「阿sir真係好～肯放break比我地⋯」張萱淇揼咗自己嘅後腰兩下，「坐都坐到腰痛⋯」
兩人經過E班嘅課室，從走廊嘅玻璃窗望入去，E班上堂安靜得嚟有份嚴肅嘅感覺，令人經過嘅時候都會自動安靜起嚟
「精英班真係精英班⋯上堂個個都唔係耷低頭寫筆記就係專心聽書⋯」張萱淇不禁喺心入面感歎，「嗰種專心嘅feel同其他班嘅專心點解有咁大差別嘅⋯？」
IG Link: https://www.instagram.com/nd_cotttoncandy/?hl=zh-tw