有人話陪人釘耳 下一世都會見到佢「真人真事 一直連載直至放下」: 「10」心動不如行動 上

去到夜晚11 2點，照原定計劃出去旺角百老滙。當然身為男仔嘅我當然直接去接佢一齊去啦，大佬咁夜，一個女仔都唔係咁好嘅。
去到之後我地並冇第一時間就去睇戲，而係去吉魚蛋。我都係呢一刻先發現，原來自己一直冇認真望住佢。食完行過去等多一陣就啱啱好夠鐘開場。開場嘅時候佢問我驚唔驚，我話「梗係驚，我平時都唔睇鬼片嘅」之後佢話「吓，咁你又揀呢套？」我就好自然咁答「你話過想睇吖嘛，你唔驚咪得囉」點知…..原來個個女人都一樣嘅，話想睇，點知一路驚到落場。
雖然話就話冇諗過點，但係佢一驚就縮過嚟，我就開始用隻手攬過去第二邊膊頭，一有啲恐怖位就遮少少，打開隻手少少比佢睇。呢一場戲，我覺得時間過得好快。
到散場嘅時候，如果大家有去過就知要行一條樓梯落，嗰時仲要好夜冇乜人。佢一路行一路話好驚，又話急，想去廁所。我忍唔住笑話「你去啦，我喺門口等你」
之後佢去完出嚟，我話「死啦，你今晚會唔會瞓唔到」佢話「會㗎…唉，點算呢」咁我都冇再講啲咩，只係一直同佢傾偈，因為睇完咩車都冇，而佢又想行返去，咁我就送完佢返去就打的返屋企。佢就住長沙灣所以可以行，我呢就住觀塘，所以就冇辦法啦，一定係打的返去㗎喇」
呢日之後我開始問自己，你越踩越深，到時過到去你點算
但係原來好多嘢都阻止唔到，感情，呢樣嘢真係話嚟就嚟。但同時都係話走就走。一齊要雙方嘅同意，而分開只要一方同意，另一方只可以傷住離開。