有人話陪人釘耳 下一世都會見到佢「真人真事 一直連載直至放下」: 「11」心動不如行動 中

呢一日之後，我開始好驚，驚自己失去呢一切。
有一日，我同屋企人食飯，自己喺到飲酒，突然間佢send msg話「不如去食甜品」，呢刻嘅我又將一切嘅猶豫拋走。答佢「好啊，咁我食完飯搵你」
食完飯之後，因為我仲飲緊，所以我就帶埋去佢樓下飲，同佢講聲話到咗，就繼續。
佢落到嚟之後，見到我喺到飲，又醉醉地，佢就問我咩事，之後好自然地傾完先去食。
傾傾吓講到做咩飲酒，我就好直接咁答佢「我唔知我哋宜家咁樣，點算。真係可以？就算一齊咗，我仲有個零兩個月就走喇…」佢就安慰我咁話「如果我地一齊咗，你離開我會等你，所以唔使擔心或者驚，照平常咁就得」
去到食甜品，我其實就唔食嘅，咁但係佢鐘意就陪佢食啦。我就叫咗個心太軟，佢就叫咗個雪糕加啲生果嗰啲。食完之後，佢無啦啦話送我返去，我話吓「我住觀塘喎，你送完我返去又返返嚟？」佢好直接咁答「有咩問題？」其實我好開心，因為可以有多啲時間同佢一齊。
送到我返去之後，我有啲唔捨得，咁我就提議「不如散吓步傾吓偈先，我好飽。」佢「冇所謂啊，好吖」
其實我真係好飽，去到一個公園見到啲小朋友喺到，我哋坐低咗傾偈。之後我無啦啦飽到想嘔，同佢講叫excuse me就衝咗去坑渠到嘔….講真我自己都覺得柒。之後嘅每一次食甜品，佢都會話，我想食心太軟，但係我記得你嘔搞到我唔想食，嗰pet嘢…..Eeeeee，核突。
就係咁樣開心嘅一日又完咗