《藍藍》〈科幻/奇幻〉: 第五章 藍天白雲•是外面的世界嗎
第五章 藍天白雲•是外面的世界嗎
你問我答時間又到了…「琴日爸爸帶我出咗去睇醫生, 簡直令我大開眼戒 !! 你有冇出過去呀~？」藍藍今日又走到露台, 同蟹仔🦀見面嗰時, 好自豪咁咁問佢。
「我當然有出過啦！我之前咪同你講過, 我媽媽係空姐 ✈️囉, 佢有時都會帶我出trip㗎！同你一樣, 我都係坐咗喺個背囊入面, 個背囊有個玻璃罩畀我望到出面嘅嘢！不過, 我唔係去B4果層, 我係去B6嗰層, 因為嗰度係搭機場快線🚝, 係一架銀色嘅列車。你之前搭嗰架藍色列車, 應該係最普通去短程嘅地方, 通常都好快到。小妹妹, 我仲有咩嘢要解答你呢, 哈哈哈~😆」蟹仔反客為主, 好得戚咁答！
「原來係咁！即係話, 我入到去有一個好多掣嘅空間, 嗰個叫做 'Lift', 而撳唔同嘅掣就會去到唔同深度嘅地底樓層……🤔 咁, 有冇辦法可以上到我哋呢個露台嘅"地面"呢層呢？」藍藍問。
「你問得好好呀！呢個呢… 我曾經到過地面, 但…都係因為搭緊銀色嗰架高速機場列車。 但事實上我只係喺列車入面, 我冇真正到過外面嘅"地面", 而 'Lift' 啲掣嘅排列嚟睇, B1似乎係最高最接近地面的樓層, B10再低啲制全部"D"字頭, 去到底嗰個制寫住 "D350" 應該就係最底層。其實我咁耐以嚟, 媽媽只有帶過我去 B字頭的樓層, 從來都未去過 D字頭。所以其實我都係知多你少少嘢炸…！🤔」蟹仔解說。
「係呀~ 我都見到 Lift 入面真係有無數咁多個掣。 不過咁, 我最想就係可以行出去地面睇下… 🙄」藍藍續說。
「但係咁, 地面嗰度成日都有啲幽浮飄來飄去, 乜你唔驚咩？事實上嗰啲係乜嘢嚟根本冇人知… 畀著我就唔會去冒險, 只有跟住媽媽係最安全！」蟹仔反問。
「咁又係… 我覺得佢會將我哋吞噬, 但係見到出面有紅、藍、綠嗰啲水管建設, 始終應該有人出過去整呢啲嘢, 所以我唔會完全沫殺呢個希望, 我仲希望可以出到去好似嗰個幽浮咁飄嚟飄去, 哈哈哈！不過你講得啱, 跟住媽媽呢啲大人其實都係好安全, 只不過咁, 大人成日都管住我哋嘅生活, 我就覺得比較冇咁自由, 我真係好想出去探險~」藍藍充滿期盼咁講 🥺。
又過咗好多日, 藍藍今日失驚無神想走落梳化底後面嗰個地下室睇下。佢記得爸爸曾經撳過"あける"呢個密碼, 所以佢趁住四周圍冇人嘅時候, 走去嘗試照撳, 睇下開唔開到, 結果真係畀佢開到…
好大膽嘅藍藍, 於是自己沿住樓梯"爬"落去, 一直爬到樓梯底。 過冇幾耐, 樓梯上面進入嚟嗰度門就自動閂咗啦。隨住道門閂咗, 藍藍身處嘅地方啲自然光就自動著起, 喺呢度佢見到嘅係一條好長好長嘅走廊, 而且佢亦認得去到盡頭就會出到去搭 Life嘅暗門 🚪。
藍藍就心諗：「好明顯盡頭就係呢間屋嘅大門口, 會出到去外面嘅世界, 而嗰部Lift就會去到唔同嘅地方... 如果係咁, 咁我就唔急住開嗰度大門, 等我周圍搵下呢個走廊入面仲有冇其他嘅暗掣暗門先, 話唔定會搵到爸爸, 就可以嚇佢一跳, 呵呵… 😆」
藍藍只係撞彩嘅心態, 周圍搵, 又喺個牆身到摸嚟摸去, 結果真係被佢摸中, 其中一個牆身嘅門就被佢打開咗啦…
呢間房入面好黑, 藍藍步步為營, 慢慢走咗入去。入到去之後, 道門照舊, 就係會自己閂埋, 藍藍見到有一個好大嘅球型嘅、透明嘅玻璃圓球罩, 放喺呢房間嘅正中心, 而玻璃球罩入面竟然係爸爸, 爸爸挨低咗喺一張軟墊, 好舒服嘅櫈上瞓著咗, 而且仲發出輕微嘅鼻鼾聲…zzz 😴 藍藍知道爸爸瞓咗覺, 所以都放輕腳步慢慢行過去。玻璃罩右面其中有一個缺口, 係可以足夠一個大人行入去, 藍藍就由呢道爬咗入去。
入到去之後, 佢發現玻璃罩嘅內側全部都係環迴立體嘅螢光幕畫面, 外面睇係完全透明, 睇唔到內側原來有畫面。除咗門嘅位置之外, 呢個玻璃罩嘅螢幕畫面係零死角。 畫面入面見到嘅係色彩鮮豔嘅景色, 引到藍藍爬咗上去櫈上面嘅扶手位置偷睇 👀。佢好輕, 好輕力, 盡量唔發出聲音咁爬上, 以免嘈醒爸爸。等佢爬到上去之後, 佢就跪咗喺上面, 自己喺度睇住個螢幕四周 🔘。
藍藍望住個熒幕好驚訝：「wow~ 好靚呀~ 呢度究竟係邊度嚟, 點解同我認識嘅地方係完全唔同嘅… 呢個世界真係好大, 大到真係好奇妙好難想像, 究竟爸爸會唔會帶我嚟呢度玩, 唔知哥哥姐姐, 又或者蟹仔有冇嚟過呢…🥺🥺」
其實藍藍見到嘅畫面係一個一望無際、碧海藍天嘅大海, 由畫面上面嘅鏡頭出發, 似乎佢嘅視覺係喺空中, 一路慢慢, 慢慢咁在空中向前移動。
移動嘅時候, 見到下面是一片大海, 海洋入面有好多海豚喺水面度跳躍, 睇得籃籃好興奮。直至到鏡頭視覺越嚟越飛近沿岸嘅地方, 開始見到海岸丶沙灘同埋遠處嘅陸地 🏖️⛰️。由遠處望到呢個陸地, 已經係同藍藍所知嘅陸地地面係好唔同, 呢個畫面嘅陸地綠油油的, 有好多樹木🌴🌳🌲, 而藍藍喺露台嘅外面只係灰濛濛一片嘅大地🪨同埋只有黑漆漆嘅天空🌌。
視覺鏡頭開始飛入沙灘上空, 呢度見到好多人穿著泳衣喺度玩緊水上活動🏊, 例如游水、浮潛、水上電單車等等, 沙灘上仲有好多人喺度玩緊堆沙, 每個人都玩得好開心咁。
藍藍正睇得入晒神, 爸爸嘅鼻鼾聲突然慢咗落嚟。藍藍知道爸爸脾性唔准佢自己周圍去, 怕被爸爸鬧, 所以就算再唔想走都唔得, 要响爸爸醒之前離開。最後佢走偷偷地返返上去 cube。
上到 cube, 藍藍第一件事就係衝咗入去 Lice嘅房道。 Lice瞓到成咗死豬咁🐷, 大字型攤咗喺地上度瞓, 藍藍冇理咁多, 一下就撲上前去到 Lice哥哥身邊搖醒佢。
「喂喂喂~ 大發現呀…!! 你有冇去過爸爸個玻璃球入面呀？裏面好正, …」藍藍一五一十講晒所見所聞畏 Lice聽。
Lice瞓到正冧畀人搖醒當然不滿, 口裏就發牢騷咁話：「咩事呀… 人哋瞓緊覺㗎~」續說：「吓~ 你咁大膽自己偷偷地走咗落下層… 爸爸從來都唔畀我哋落去㗎~！」
藍藍於是走上露台搵蟹仔, 問下佢有冇見過呢啲風景。
蟹仔都感到好好奇就答佢：「吓~ 你見嘅所謂碧海藍天、大海… 我完全冇概念… 你話個大海係一望無際我反而會好驚, 咁即係話嗰個"海"仲恐怖過嗰隻"幽浮", 咁肯定會吞食咗我哋, 你都識講有幾隻海豚喺海上度跳, 佢哋一定係掙扎緊, 因為個海食緊佢哋, 真係唔敢想像跌咗落去會點… 咁個海最後係咪食咗個陸地？」
藍藍回憶返之前見到嘅畫面就答：「你咁講… 我諗諗下, 你又好似幾合理… 但… 沙灘海邊上面玩緊嘅人係好開心, 一啲都唔似被個海食緊… 」
蟹仔再補充：「我之前都同你講過我媽媽係空姐, 佢曾經帶過我去外星旅行。我開頭以為我哋住緊嘅地方係一個平面, 但當我哋嘅飛船越飛越高嘅時候, 望返落地面上面其實係一個大球體🌚。之後我哋嘅飛船🛸喺天空中左搖右擺咗幾下之後, 突然一下一chok, 已經去到一個唔知乜嘢嘅地方, 之後响太空浪浪下, 就見到灰色嘅星球叫 Moon🌕了。但係我哋每次都係Moon, 奇怪嘅就係Moon後面仲有一個更加大嘅星球叫 Earth🌍, 係一個藍色白色嘅星球, 超級靚, 但係我哋從來都冇喺嗰度降落過… 諗起都好想去睇下。唔通… 你睇到嗰個地方就係 Earth ？」
爸爸係玻璃罩入面嘅畫面, 以及蟹仔描述嘅見聞, 無一樣嘢唔係藍藍嘅腦入面不斷重複又重複。 有一日佢終於搵到機會, 佢自己偷走咗出去探險…😱
佢解開咗屋企嘅大門鎖🚪, 走咗出去搭 Lift。佢記得蟹仔曾經講過, 要去搭機場快線就係要去B6嗰層, 可惜佢諗漏咗一步, 以佢嘅高度, 佢根本撳唔到B6較高嘅位置, 而且返屋企的B1會係更加高, 會更加撳唔到… 就係咁, 當佢入到𨋢Lift之後, 部Lift門自動閂咗, 而且冇目的咁樣上落上落, 嚇得藍藍不知所措… 呢個時候…
呢個時候…𨋢就停咗…喺B6嗰層打開咗, 然後有一個人入咗嚟…👤
門外面嗰個人係一個年輕貌美嘅大人, 佢身穿一件紅色嘅制服, 黑色短裙黑色絲襪, 和一對黑色嘅平底鞋, 而且拖住個喼。當 Lift門開咗之後, 呢個大人見到細細粒嘅人仔藍藍都覺得好驚訝😱, 佢就講：「咦~ 點解有個咁靚嘅人仔嘅！ 陰功豬囉, 一定係走失咗啦, 等姐姐先帶你返屋企先, 姐姐抱, 唔使驚~！」
藍藍見到對方都係一個咁友善嘅大人, 又都幾靚女唔似係壞人, 而且自己都不知所措, 所以冇反抗咁被對方抱走咗。
呢個姐姐撳咗B1, 原來都係同藍藍去同一層樓的。姐姐帶咗藍藍出 Lift向左邊走, 而唔係右邊藍藍屋企。然後個姐姐走到自己的住所了。佢打開門後, 入面同藍藍嘅屋企閒隔都係一無一樣, 唔同嘅只係呢度嘅牆身顏色都係全粉紅而唔係白色。
姐姐一路抱住藍藍走過一模一樣嘅長走廊, 行上一模一樣嘅樓梯, 咁嘅熟悉環境更加令到藍藍放心💙, 所以佢扭住姐姐想自己行。落地後, 佢行到上去之後, 第一樣見到嘅就係… 蟹仔…🦀
蟹仔和藍藍大家眼定定望住對方, 原來呢度係蟹仔同佢所提起嘅空姐媽媽嘅屋企🏫！
待續~