宇宙傳送門: 3.0 第三幕 最終幕 開幕

現時夜晚十一點四十七分，我、林日辰、然人都離開咗我哋借住嘅大廈，出發去郭俊言所在嘅位置。

唔知係咪幾日冇出去出面，啲霧好似散咗少少，起碼冇咁焗。

「點解要帶埋佢嚟呢你？」我用電筒照住然人手上嘅圈圈。

「小白佢想跟嚟。」然人摸住圈圈咁答。

「你可以同佢溝通….，等等，小乜白吖？佢叫圈圈吖。」





「但佢全身白色喎，應該叫小白。」

「小白係狗名嚟㗎。你叫佢小白，佢都唔會應你。」

「唔係吖，佢應吖。小白….小白…」

「圈圈….圈圈…..呢度吖圈圈….」

我同然人兩個開始對住圈圈叫名，不過佢兩個名都冇反應，仲合埋咗眼，應該係瞓着咗。





「夠啦，你兩個小朋友。唔好係條街度嘈啦，靜啲咁行啦。」林日辰單手插住袋咁係我同然人之間行過。

「…」

「呢個..，我聽講係我昏迷嘅期間，你好似對我做咗啲嘢喎。」我對住然人指住自己隻雀腳。

話說我都好似差唔多適應咗隻雀腳，接合嘅位置都已經冇咁痛，開始可以感受到隻雀腳各處嘅肌肉。

「嗯。當時你冇加速心跳嘅話，你應該都冇得救。」





「….」加速心跳？佢知道我能力嘅嘢？

「心跳嘅頻率就係你嘅鎖匙，我有冇講錯？」

「點解你會知？」

「感知力。」

「….你到底係咩人嚟？」

「大家都係人類，嚟…….」然人講到一半，突然停低咗，望向左手邊。

「做咩？」

「…..好多人。」





「吓！？呢個時間？」我一瞬間成個人緊張咗，睇嚟會有麻煩。

「但佢哋係反方向，跳緊落去？佢哋好似係….。」

我一聽到然人話係反方向，個人先放心返「俾你嚇死…。反方向就唔關我哋事啦，行快兩步啦都係。」

然人帶住我哋直路轉左，進入咗一條小巷。

周圍又黑，又有霧，我同林日辰各自拎住一枝電筒，但都跟係引路人，然人嘅後面。

然人就好似有夜視功能咁，唔需要光都可以好順暢咁係黑暗中行走。

然人絕對唔係我呢個宇宙嘅人，但佢話佢都係人類，即係佢係進化咗嘅新人類？人進化咗，頭頂就會生朵花出嚟？





「即係你可以控制到我嘅心跳？」我問然人。

「稍為加快同減慢都可以做到嘅。」

「….」如果係咁嘅話，即係然人就係我個能力嘅搖控器？

「呢度直路行三分鐘左右，轉右就係。」然人指住前面嘅一條雙程馬路。

前面條雙程馬路中間有條石壆，石壆上面每隔幾米就有條電燈柱。

中間有幾條電燈柱仲有啲微弱嘅黃光散落，某啲黃光下，我隱約見到有個人影係度。「嗰啲係咪人嚟？」

「係。但幾日前已經感知唔到。估計已經死咗。」

「吓..？」





就算然人咁講都好，我哋仍然係好小心，好警戒咁行過去。

我哋差唔多要接近第一條電燈柱下嘅懷疑屍體，我係幾米距離度停低咗，大家都跟住我停留。

電燈柱向下照嘅黃光，加上我哋手上電筒向前照嘅白光，面前呈現出嚟嘅景像，不禁令我倒抽一口涼氣。