宇宙傳送門: 2.34 第二幕結幕

現時朝頭早十一點三十三分，我同林日辰暫時達成咗共識。

林日辰係知道我嘅能力到底係咩一回事之前，佢暫時唔會俾我死住，因為唔知會有咩後果。

而我係要暫時唔報仇，同埋唔避開林日辰，加上最後一個條件，就係帶我去揾郭俊言嗰班人。

雖然林日辰覺得我去嘅話，死亡嘅機率都高，不過佢都認同嗰班人的確係未來會造成威脅，佢話都符合佢嘅原則。

我唔知林日辰呢啲咁嘅人會有啲咩原則，但有佢一齊去，起碼佢會保護我。





我哋決定咗入夜嘅時候先出發，就係要趁郭俊言嗰班人瞓覺嘅時候。而且仲要暪住家姐，佢嘅話就一定唔會贊同我去。

傾掂數之後，我哋三個一齊係間房度出嚟。

家姐見我哋幾和平咁樣，好奇咁問我咩情況。

除咗去揾郭俊言嗰part之外，我將其他共識都講咗俾家姐知。

「其他人會嚟殺你？」





「佢係咁講囉。反正我哋都係利用佢做私人保鏢。」

「佢真係信得過？」

「嗯….，暫時信住先。」

「係喎，李生都係冇出過嚟吖？」我由醒返到而家都未見過李生。

「係，..唉～」





於是，我嚟到李生間房嘅門前，手拎住咗杯麵，然後敲門。

「李生….。」

「…..」

感覺上我應該講啲安慰嘅說話，但我完全諗唔到。老土嘅說話講嚟都冇意思，諗起我當時啱啱面對阿媽嘅死亡，我都係咩都聽唔入耳。

「嗰時，李生都知，你當時都見到，所以我知道係咩感覺。最痴線嘅係，個兇手而家仲係我面前。」

「….」

「當時真係….。所有唔好嘅諗法都出晒嚟。好彩嘅係，我唔係一個人。」

「….」





「李太真係一個好温暖嘅人，同埋佢煮嘅排骨真係好好食。」

「….」

「可以嘅話，我希望李生你唔好一個人去面對。」

「….」

「你可以出嚟對住我哋盡情咁喊，大叫，發爛渣，咁會好好多。」

「….」

我見佢都冇出過聲就唔諗住再煩佢，到佢想出嚟嘅時候，佢自然就會出嚟。





「我放低咗個杯麵係你門….」

面前嘅房門突然打門咗，門後嘅係幾日冇見過嘅李生，睇到佢個樣真係殘咗好多，對眼又腫晒咁。

「….我想你幫下我。」佢用微弱嘅聲線向我請求。

「？」

入到去間房，首先迎嚟嘅係各種難聞嘅味，夾埋一齊形成一股惡臭，我不自覺都皺咗眉頭。

然後見到張床同附近有唔少嘅血跡，床上面有被擒住咗啲嘢，見到個形狀都大約估到係李太嘅遺體。

「我想好好咁….」李生欲言又止咁，好似又想喊。

「我明。」李生應該係想揾個方法安置好李太嘅遺體。





我環望一下間房，見到有個木製嘅衣櫃，然後我提議不如折咗個衣櫃，暫時用嚟當做係棺材。

於是乎，我就叫埋其他人嚟幫手，家姐同李生就幫李太嘅身體清洗乾淨。

我同然人一齊整個櫃，我冇問到林日辰，因為我知道佢大多數唔會幫手。

李生再一次見到林日辰嘅時候，用擔心嘅眼神望住我。

當初見到嘅殺人凶手，如今竟然係度幫自己。

我用眼神同點頭回應返李生，表示冇問題。

呢個單位有嘅工具只係得一個細嘅鋸架，但好彩個木衣櫃本身都唔厚，又比較細，所以細鋸架都夠用。





我哋輪流去鋸個衣櫃，左砌右砌咁，最後用咗兩個幾鐘，都算好勉強咁砌咗個長方形出嚟。

之後，將清潔完嘅遺體，再換好乾淨嘅衫褲，放入個臨時棺材入面。

呢個棺材應該挨唔到好耐，但而家又冇得火化，又揾唔到地方埋葬，唯有係咁先。

棺材同樣放係嗰間房，然後李生係個棺材上面，用刀刻咗三個名。

陳慧琳、李可欣、李柏軒。對龍鳳胎嘅名係李生佢兩公婆一早就諗好。大家一齊企係棺材前面，祈求嘅只有一樣嘢，一路好走。

最後將間房閂咗門。

「唔該…」李生同我、然人，仲有家姐道謝，李生對林日辰依然係唔自在，不過我諗其他人都係。

時間一轉眼就嚟到夜晚嘅十一點三十九分，我終於等到家姐瞓咗。

我已經同李生講咗，我哋要出去揾物資，要佢睇水，冇講到我哋嘅真正目的出嚟，如果李生都去嘅話，只會係一個負累。

雖然李生都好出奇點解要呢個時候去，但最後都說服咗佢。

同埋，然人都話如果有任何人接近佢哋，佢都可以感知到。

而家一切都準備就緒，郭俊言，我要嚟兌現我嘅承諾。