宇宙傳送門: 2.28

現時唔知咩時間，我亦都唔知我係咪已經死咗。

我慢慢咁擘大雙眼，第一眼見到自己係一個幽暗，拉埋咗窗簾嘅睡房。

我醒返第一個感覺係非常之咁口渴同肚餓。我諗我應該係未死，可以呼吸，而且都感覺到自己嘅心跳。

正當我郁一郁個身嘅時候，感覺到對手有啲唔對路，我抬高對手一望，俾繩綁住咗。

呢個時候，我聽到有人閂門嘅聲音，我下意識望過去門口，雖然嗰個人已經出咗去。





我嘗試一下掙脫對手出嚟，但係因為太肚餓，根本冇乜力。

我坐起身，環望一下個房間，只係一間好普遍嘅睡房，我瞓嘅嗰張床嘅床頂就有幾張相係度，係一個完全唔識嘅女仔。唔睇相都唔知呢間係女仔房嚟。

然後望一下櫃上面嘅鐘，現時係晏就嘅三點十二分。

我將雙腳放係地下，努力咁回想起昏迷前嘅最後一刻，到底發生咗咩事。

雙腳接觸到地面嘅時候，右腳感覺到痛楚。等等，我諗返起我俾班面具人撳低咗個人，之後….





「咁鍾意用呢隻腳嚟踢我，不如送俾我啦。」

係喎，我俾郭俊言斬咗隻右腳。回想到呢度，我個人起晒雞皮。

所以我係冇咗隻右腳？定係佢冇徹底咁斬晒落嚟？雖然同以前感覺好唔同，但我仲可以感覺到成隻右腳。

係有醫生係度？係呢間睡房做咗手術？照計我當時就算冇死到，最少都斷咗隻右腳先啱。

被斬嘅位置係膝頭哥對落少少。我之所以一路唔敢望落去，係因為我感覺到呢隻唔係我以前隻右腳嚟。





不過，終需要面對，我鼓起勇氣望落自己隻右腳。

首先見到條染有血嘅西褲，再落去係一條傷疤圍繞住被斬嘅位置，傷疤連接住嘅係一隻右腳小腿，一隻綠色皮膚嘅腳。

唔單止係膚色，連骨頭都唔同樣，確實唔係人類嘅腳嚟。

我再抬起成隻腳，愈係望我就愈覺得恐怖。只有四隻腳趾，每隻腳趾都有利爪，前面三隻腳趾，後面一隻。

呢個樣根本就係一隻雀嘅腳嚟，不過係綠色同冇羽毛。

我嘅呢隻雀腳嘅長度同比例都完全配合返我個人。

我望住隻雀腳，成個人呆咗。

我又嘗試下去郁一郁啲腳趾，第一隻腳趾屈一屈，第二隻屈一屈，直到最後四隻一齊同時屈，做咗個抓嘅動作。





冇錯，呢隻雀腳真係受我控制，真係我隻腳嚟。

究竟發生咗咩事？我係俾人改造咗？咁高技術？又係邊到揾隻咁嘅雀腳返嚟？

快啲諗下，諗下最後暈低前發生咩事。係啦，家姐佢哋入咗嚟，仲有另外兩個人。

一個男人同細路，嗰個男人….。我模糊嘅記憶開始變得清晰，慢慢可以見到嗰個男人個樣。

正當我記起之際，門俾人打開咗，正正就係嗰個男人同嗰個細路。

「你已經瞓咗兩日啦。」嗰個男人係我面前放低一碗麵同水。

「….係你。」面前出現嘅就係之前殺死我媽嘅嗰個痴線佬。